ޕާސްޕޯޓު ޕްރިންޓުުކުރުމަށް ބޭނުންކުރާ ޕާސްޕޯޓު ބުކްލެޓްގެ ސްޓޮކް ހުސްވެގެން އީ-ޕާސްޕޯޓު ދޫކުރުން ހުއްޓާލައިފައި އޮންނަތާ ދެ މަސްދުވަސް ފާއިތުވެއްޖެ އެވެ.
އީ-ޕާސްޕޯޓު ޕްރިންޓުކުރަން ބޭނުންވާ ޕާސްޕޯޓު ބުކްލެޓްގެ ސްޓޮކް ރާއްޖެއިން ހުސްވެގެން އީ-ޕާސްޕޯޓު ދޫކުރުން ހުއްޓާލީ މެއި 8، 2026 ގަ އެވެ. އަދަދު އަށް އެނގިފައިވާ ގޮތުގައި އީ-ޕާސްޕޯޓު ޕްރިންޓުކުރަން ބޭނުންވާ ޕާސްޕޯޓް ބުކްލެޓް ރާއްޖެއަށް ނުލިބި ލަސްވަނީ އެއަށްވާ ފައިސާ ނުދައްކައިގެންނެވެ.
އީ-ޕާސްޕޯޓު ޕްރިންޓުކުރާ ބުކްލެޓު ހުސްވުމުގެ ސަބަބުން، އިމިގްރޭޝަނުން މިހާރު ހުރިހާ އެންމެންނަށް ވެސް ދޫކުރަމުން ދަނީ އާދައިގެ ނޮން-އިލެކްޓްރިކް ޕާސްޕޯޓެވެ.
އީ-ޕާސްޕޯޓަކީ ކިއުއެއްގައި ނުޖެހި، އަމިއްލައަށް ޗެކިންވެވޭ އީ-ގޭޓުގެ ހިދުމަތް ބޭނުންކުރެވޭ އެއްޗެކެވެ. އީ-ޕާސްޕޯޓުގައި ހުންނަ ޗިޕެއްގައި ރައްކާކޮށްފައި ހުންނަ ޑޭޓާގެ އިތުރުން ނަގާފައިވާ ފޮޓޯ ނުވަތަ އިނގިލީގެ ނިޝާނުގެ ޒަރިއްޔާއިން ޕާސްޕޯޓުގެ ވެރި ފަރާތް އެ ގޭޓުން ކަށަވަރު ކުރާނެ އެވެ.
މިއީ، ރާއްޖެއިން އީ-ޕާސްޕޯޓު ޕްރިންޓުކުރާ ބުކްލެޓު ހުސްވެގެން އީ-ޕާސްޕޯޓު ދޫކުރުން މެދުކެނޑުނު ދެވަނަ ފަހަރެވެ. މީގެ ކުރިން 2024 ގައި ވެސް ގިނަ ދުވަސްތަކެއް ވަންދެން، އީ-ޕާސްޕޯޓު ދޫކުރުން އިމިގްރޭޝަނުން ހުއްޓާލައިފައި އޮތެވެ.
