ރާއްޖޭގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ ދެ ވަނަ ދުވަހު ރާއްޖޭގެ އެތުލީޓުން ހޯދި ކާމިޔާބީއާ މެދު ހިތްހަމަ ޖެހޭ ކަމަށް ކޯޗު ހުސެއިން އަރީފް (އިބޫ) ބުނެފި އެވެ.
މިއަދު ކުރިއަށްދިޔަ ހީޓުތަކުގެ ތެރެއިން ރާއްޖޭގެ ހޫދު އަހުމަދު (ހޫބްސް) އޭނާ ވާދަކުރި ހީޓުގެ އެއް ވަނަ ހޯދައި، ރައުންޑް ތިނަކުން ޖާގަހޯދިއިރު, ރާއްޖޭގެ ޖޫނިއާ ޓީމުގެ ހުރިހާ އެތުލީޓުން ވަނީ ޖޫނިއާ ރައުންޑް އެކެއްގެ ހީޓުތައް ކާމިޔާބުކޮށް ޖޫނިއާ ރައުންޑް ތިނަކުން ޖާގަ ހޯދައިފަ އެވެ.
އިބޫ ބުނީ މިއަދު ދިވެހި ސާފަރުންގެ ފަރާތުން ޖުމްލަކޮށް ފެނުނު ކަންކަމާއި ޕާޕޯމެންސާ މެދު ހިތްހަމަ ޖެހޭ ކަމަށާއި، ހާއްސަކޮށް ޖޫނިއާގެ ހުރިހާ ކުދިން ރައުންޑް ތިނަކަށް ދިއުމަކީ މާ ހިތްހަމަ ޖެހޭ ކަމެއް ކަމަށެވެ. މީގެ އިތުރުން، ސީނިއާ މެންސްގެ ހޫބްސް އަދި ހިޝާމް ރައުންޑް ތިނަކަށް ދިޔުން އެއީ ލިބުނު ރަނގަޅު ކާމިޔާބީއެއްގެ ގޮތުގައި އިބޫ ފާހަގަކުރި އެވެ.
އިބޫ ބުނީ, މެންސް ކެޓަގަރީގެ ރީ-ކޮލިފައިން އަށް ދިޔަ އެތުލީޓުންނާ މެދު ވެސް އުންމީދު އެބައޮތް ކަމަށެވެ.
"ވަރަށް އުންމީދު އެބައޮތް ރީ-ކޮލިފައިން އަށް ދިޔަ ކުދިންނާ މެދު ވެސް. ދެން ހޫބްސް އާއި ހިޝާމް ދިޔައީމަ އެކަމާ ވެސް ހިތްހަމަ ޖެހިފައި މި ހުރީ." އިބޫ ބުންޏެވެ.
އިބޫ ބުނީ މުޅި ޓީމު އޮތީ އެކަތިގަނޑެއްގެ ގޮތުގައި ކަމަށާއި، ހާއްސަކޮށް ޓީމުގެ ކެޕްޓަން، އަހުމަދު އާގިލް (އަންމަޑޭ) އާއި ޓީމު މެނޭޖަރުގެ ފަރާތުން ބޮޑު އެއްބާރުލުމެއް ލިބޭ ކަމަށެވެ.
