ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގައި، ރާއްޖޭގެ ގައުމީ ޓީމުގެ ފަރާތުން ވާދަކުރާ ހޫދު އަހުމަދު، މުބާރާތުގެ ތިން ވަނަ ބުރުން ފުރުސަތު ހޯދައިފި އެވެ.
ހޫދު، ތިން ވަނަ ބުރަށް ދަތުުރުކުރީ ހީޓު 12 ގައި ވާދަކޮށް، އެއް ވަނަ ހޯދައިގެންނެެވެ. ހޫދަކީ މި ފަހަރުގެ މުބާރާތުގައި ހީޓެއް ކާމިޔާބުކޮށް ތިން ވަނަ ބުރުން ފުރުސަތު ހޯދި ދިވެހި ފުރަތަމަ އެތުލީޓެވެ.
ކޮންމެ ހީޓެއްގެ އެއް ވަނަ އާއި ދެ ވަނަ އަށް ތިން ވަނަ ބުރުގެ ސީދާ ޖާގައެއް ލިބޭއިރު، ހޫދު އަކީ މި ފަހަރުގެ މުބާރާތުގައި ރާއްޖޭގެ ގައުމީ ޓީމުގެ ސާފަރުންގެ ތެރެއިން، ތިން ވަނަ ބުރުގެ ޖާގަ ހޯދި ފުރަތަމަ އެތުލީޓު ވެސް މެ އެވެ.
އިއްޔެގެ ހީޓުތަކަށް ބަލާއިރު، ރާއްޖޭގެ ބީ ޓީމު ކަމަށްވާ ޓީމު ތުލުސްދޫގެ ފަރާތުން ވާދަކުރާ، އަހުމަދު ހިޝާމް ޝަހީމް ވަނީ ހީޓު ތިނެއްގެ ދެ ވަނަ ހޯދައި، ތިން ވަނަ ބުރަށް ދަތުރުކޮށްފަ އެެވެ.
މިއަދު ހެނދުނު ކުރިއަށްދިޔަ ހީޓު 12 ގައި، ހޫދު ވަނީ ހަތް ރާޅުގެ ތެރެއިން، އެންމެ ރަނގަޅު ދެ ރާޅުން 9.16 ޕޮއިންޓް ސްކޯކޮށްފަ އެވެ. ހޫދުގެ އެންމެ ރަނގަޅު ދެ ރާޅުގެ ސްކޯ އަކީ 4.33 އާއި 4.83 އެވެ. ދެ ވަނަ އަށް ދިޔަ ދެކުނު ކޮރެއާގެ ޖިންޔުކް ޔަންގް އަށް ސްކޯކުރެވުނީ، 6.86 އެވެ. ޖިންޔުކް، ހަ ރާޅުގައި އަޅައިގެން، އޭނާގެ އެންމެ ރަނގަޅު ދެ ރާޅުގެ ސްކޯ އަކީ، 3.33 އާއި 3.53 އެވެ. ތިން ވަނަ އަށް ދިޔަ، ސައުދީ އަރަބިއްޔާގެ އަބްދުﷲ އަލްހަޒްމީގެ ސްކޯ އަކީ 0.23 އެވެ. އޭނާ އަށް މާ ރަނގަޅަށް ޕާފޯމެއް ނުކުރެވުނެވެ.
މުބާރާތުގައި އިއްޔެ ވާދަކުރި ރާއްޖޭގެ ސާފަރުންނަށް ތިން ވަނަ ބުރުގެ ޖާގައެއް ނުލިބި ވާދަކުރަން ޖެހިފައިވަނީ، ދެ ވަނަ ބުރު ކަމަށްވާ ރެޕޯ ހީޓުތަކުގަ އެެވެ. އެ ގޮތުން، މިއަދު ރާއްޖެ ޓީމުގެ އަހުމަދު އާގިލް (އައްމަޑޭ)، އިސްމާއިލް ރަޝީދު (ސްމައިލީ)، އިސްމާއިލް މިގްލާލް (ކުޑަ އިއްސެ)، ހަސަން ނާސިހު، ރެޕޯ ހީޓުތަކުގައި ވާދަކުރާނެ އެވެ.
