ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ ފުރަތަމަ ހީޓުތަކަށް ފަހު ރާއްޖޭގެ އެތުލީޓުން ރިކޮލިފިކޭޝަން (ރެޕޯ) ހީޓުތަކުގައި (ރައުންޑް 2) ވާދަކުރަން ޖެހިއްޖެ އެވެ.
މި މުބާރާތުގެ ރައުންޑް އެކެއްގެ ހީޓުތައް މިއަދު ކުރިއަށް ގޮސްފައިވާއިރު, ރައުންޑް އެކެއްގެ ގެ ހީޓު ދޭއްގައި ރާއްޖޭގެ އިސްމާއިލް ރަޝީދު (ސްމައިލީ) ވާދަކޮށްފައިވާއިރު, އެނާ ދިޔައީ، ހީޓުގެ ތިން ވަނަ އަށެވެ. ސްމައިލީ އަކީ ރާއްޖޭގެ ބީ ޓީމް (ތުލުސްދޫ ޓީމު) ތަމްސީލުކުރާ އެތުލީޓެކެވެ.
މި ހީޓުގެ އެއް ވަނަ އަށްދިޔައީ ތައިލެންޑްގެ ނަތައްކްރޮން އެވެ. އޭނާ ވަނީ 12.13 ސްކޯކޮށްފަ އެވެ. ހީޓުގެ ދެ ވަނަ އަށްދިޔަ ޗައިނާގެ ޗެންޒީ ވޮންގް ވަނީ 10.47 ސްކޯކޮށްފަ އެވެ. ތިން ވަނަ އަށް ދިޔައީ ސްމައިލީ އެވެ. އޭނާ އަށް ސްކޯކުރެވުނީ 9.27 އެވެ.
ރައުންޑް އެކެއްގެ ހީޓު ތިނެއްގައި ވެސް ވާދަކޮށްފައިވަނީ ރާއްޖޭގެ ބީ ޓީމުގެ ސާފަރެކެވެ. މި ހީޓުގައި އަހުމަދު ހިޝާމް ޝަހީމް ވަނީ 8.66 ސްކޯކޮށް ހީޓުގެ ދެ ވަނަ ހޯދައިފަ އެވެ. މި ހީޓުގެ އެއް ވަނަ އަށް ދިޔައީ, ސްރީ ލަންކާގެ ކަވިސްކަރަ އެވެ. އޭނާ ވަނީ 11.60 ސްކޯކޮށްފަ އެވެ.
ރާއްޖޭގެ ކެޕްޓަން އަހުމަދު އާގިލް (އައްމަޑޭ) ވާދަކުރީ ހީޓު ހަތަރެއްގަ އެވެ. މި ހީޓުގައި ވާދަކޮށް އައްމަޑޭ ދިޔައީ ތިން ވަނަ އަށެވެ. އައްމަޑޭއާ އެކު, މި ހީޓުގައި ވާދަކުރީ, ކޮރެއާގެ ކަނޮއާ ހާޖީ އަދި ފިލިޕީންސްގެ ޖޯން މާކް އެވެ. މި ހީޓުގެ އެއް ވަނަ އަށްދިޔައީ ފިލިޕީންސްގެ ޖޯން މާކް އެވެ. އޭނާ ވަނީ 13.57 ސްކޯކޮށްފަ އެވެ. ދެ ވަނަ އަށްދިޔަ ކޮރެއާގެ ކަނޮއާ ހާޖީ އަށް ލިބުނީ 10.07 ގެ ސްކޯ އެކެވެ. ތިން ވަނަ އަށް އައްމަޑޭ ދިޔައީ 8.83 ސްކޯކޮށްގެންނެވެ.
ރާއްޖޭގެ އިސްމާއިލް މިގްލާލް ވާދަކުރީ ހީޓު ނުވައެއްގަ އެވެ. މި ހީޓުގައި އޭނާގެ އިތުރުން ދެން ވާދަކުރީ, އިންޑޮނޭޝިއާގެ އައި މޭޑް ޕަޖާރް އާއި ފިލިޕީންސްގެ ރެމާ މަގުލާނާ އެވެ. މި ހީޓުގެ އެއް ވަނަ އަށްދިޔަ ޕަޖާރް 13.00 ސްކޯކުރިއިރު, ރެމާ އަށް ލިބުނީ 7.93 ގެ ސްކޯއެކެވެ. ތިންވަނަ އަށްދިޔަ މިގުލާލަށް ލިބުނީ 4.96 ގެ ސްކޯއެކެވެ.
ރައުންޑް އެކެއްގެ ހީޓުތައް މާދަމާ ވެސް ކުރިއަށް ދާނެ އެވެ. މާދަމާ ރާއްޖޭގެ ހޫދު އަހުމަދު ވާދަކުރާނީ ހީޓު 12 ގަ އެވެ.
ފުރަތަމަ ރައުންޑްގެ އެއް ވަނަ ދެ ވަނަ ސީދާ ރައުންޑް ތިނަކުން ޖާގަ ލިބޭއިރު، ތިން ވަނަ އާއި ހަތަރު ވަނަ ދާނީ ރިކޮލިފައިން ހީޓު (ރައުންޑް 2) އަށެވެ.
