ކުލަގަދަ ރަސްމިއްޔާތަކާ އެކު, އޭޝިއަން ސާފިން ޗެމްޕިއަންޝިޕް, ކ. ތުލުސްދޫގައި ފަށައިފި އެވެ.
އިއްޔެ ހަވީރު ކ. އަތޮޅު ތައުލީމީ މަރުކަޒުގައި މުބާރާތް ހުޅުވުމުގެ ގޮތުން ދިވެހި ސަގާފީ ހަރަކާތްތައް ހިމެނޭ ގޮތަށް، ކުލަގަދަ ރަސްމިއްޔާތެއް ބޭއްވިގެންދިޔަ އެވެ.
މި ރަސްމިއްޔާތުގައި މުބާރާތުގައި ބައިވެރިވި ޓީމުތަކުގެ އެތުލީޓުންނާއި އޮފިޝަލުން ވަނީ ބައިވެރިވެފަ އެވެ. މި ރަސްމިއްޔާތު ޝަރަފުވެރިކޮށްދެއްވީ، ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) އެވެ. އޭގެ އިތުރުން، މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) އާއި ކުޅިވަރުގެ ވުޒާރާގެ ފަރާތްތަކާއި މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ހިންގުންތެރިން ބައިވެރިވި އެވެ.
މި މުބާރާތް ހުޅުވުމަށް ބޭއްވި ރަސްމިއްޔާތަށް ފަހު މީޑިއާތަކާ ވާހަކަ ދައްކަމުން ކުޅިވަރާ ބެހޭ ވަޒީރު ރާފިއު ވިދާޅުވީ, މި މުބާރާތާއެކު، މުޅި ދުނިޔެ އަށް ރާއްޖެ އަކީ މި ފެންވަރުގެ މުބާރާތްތައް ބޭއްވޭނެކަން ހާމަވެގެންދާނެ ކަމަށެވެ.
މީގެ އިތުރުން ރާފިއު ވިދާޅުވީ، މި މުބާރާތަކީ 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސްގެ ކޮލިފައިން މުބާރާތަކަށްވުން އެއީ މި ފަހަރުގެ މުބާރާތް ހާއްސަވާ އެއް ސަބަބު ކަމަށެވެ.
"އަޅުގަނޑު އުންމީދުކުރަނީ ބޮޑު އޯޑިއަންސް އަކަށް މި މުބާރާތް ފެނިގެންދާނެ ކަމަށް. އަޅުގަނޑުމެން އަކީ މި ފެންވަރުގެ މުބާރާތްތައް ބޭއްވޭނެ ގައުމެއްކަން އެނގިގެންދާނެ." ރާފިއު ވިދާޅުވި އެވެ.
މީގެ އިތުރުން، އެމްއެސްއޭގެ ރައީސް މުހައްމަދު ސޮބާހް (ޗޭ) ވިދާޅުވީ, މިއަހަރުގެ މުބާރާތުގައި މިދިޔަ އަހަރުގެ މުބާރާތުގައި ބައިވެރިވި ސާފަރުންނަށް ވުރެ މޮޅެތި ސާފަރުން ބައިވެރިވެފައިވާ ކަމަށެވެ. އެކަމަކު ވެސް ރާއްޖޭގެ ދެ ސާފަރުން އޭޝިއަން ގޭމްސް އަށް ކޮލިފައިވުން އެއީ އަމާޒެއް ކަމަށް ސޮބާހު ވިދާޅުވި ވިދާޅުވި އެވެ.
މި ފަހަރުގެ މުބާރާތުގައި 20 ގައުމަކުން 100 އަށް ވުރެ ގިނަ އެތުލީޓުން ބައިވެރިވެފައިވެ އެވެ. އޭގެ ތެރޭގައި ރާއްޖޭގެ ދެ ޓީމު ވެސް ހިމެނެ އެވެ. ރާއްޖޭގެ ދެ ވަނަ ޓީމަަަށް ނަން ދެވިފައިވަނީ، ތުލުސްދޫ ޓީމުގެ ނަމުންނެވެ.
ރާއްޖޭގެ ކުޅިވަރު ތާރީހުގައި ވެސް ޖެހިޖެހިގެން ދެ ވަނަ ފަހަރަށް އެއް ރަށެއްގައި އޭޝިއާ ލެވަލްގެ މުބާރާތެއް ހޯސްޓްކުރުމުގެ ފުރުސަތު ލިބިގެން ގޮސްފައި މި ވަނީ، ތުލުސްދޫ އަށެވެ. ތުލުސްދޫ އިން ފުރަތަމަ ފަހަރަށް މިދިޔަ އަހަރު، އޭޝިއަން ސާފިން ޗެމްޕިއަންޝިޕް ހޯސްޓްކުރިއިިރު، ކަންކަން ރަނގަޅަށް ހަމަޖެހިފައި ހުރުުމުގެ ނަތީޖާ އަކީ، މި ފަހަރު ވެސް މުބާރާތް ހޯސްޓް ކުރުމުގެ ފުރުސަތު ލިބުމެވެ.
