މާލޭގެ ފެންބޮޑުވުމުގެ މައްސަލަ ހައްލު ވާނީ ޗައިނާގެ ސަރުކާރުގެ އެހީގައި ތަރައްގީ ކުރަން ރާވާފައިވާ މާލޭގެ މަގު ހެދުމުގެ މަޝްރޫއު ނިމުމުން ކަމަށް ރައީސް ޑރ. މުހައްމަދު މުއިއްޒު އަދި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
އެ މަޝްރޫއު ފެށޭނެ ދުވަހެއް ނޭނގެ އެވެ.
މިހާރު މާލެއަށް ކުރަމުންދާ ވިއްސާރައާއެކު މާލޭގައި ވެސް އަނެއްކާވެސް ފެންބޮޑުވެފައިވަނިކޮށް، މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މާލެއަށް ދިމާވެފައިވާ ފެން ބޮޑުވުމުގެ މައްސަލަ ހައްލުކުރުމަށް ދިމާވެފައިވާ އެންމެ ބޮޑު ގޮންޖެހުމަކީ މާލޭގެ މަގުތައް ހެދުމުގައި ބިމަށް ފެން ހިނދޭ ގޮތަށް ކޮށްފައިވާ ޑިޒައިނާ އެއްގޮށް މަސައްކަތް ނުކުރުން ކަމަށެވެ.
މި ސަރުކާރުން މިހާރު އިއުލާނުކޮށްފައިވާ މާލެ އަދި ވިލިމާލޭގެ މަގު ހެދުމުގެ މަޝްރޫއުގެ ދަށުން އެންމެ ބޮޑު އިސްކަމެއް ދޭނީ ފެން ބޮޑުވުމުގެ މައްސަލައަށް ދާއިމީ ހައްލެއް ހޯދުމަށް އެކަށޭނަ ސްޓޯމްވޯޓާ މެނޭޖްމަންޓް ސިސްޓަމެއް ގާއިމުކުރުމަށް ކަމަށްވެސް މިނިސްޓަރު ވިދާޅުވި އެވެ.
މާލެ އިއްޔެ އޮތީ ފެނު އަޑީގައި
"މި ޕްރޮޖެކްޓަކީ މުޅި މާލެ ސާވޭ ކުރެވި ޑިޒައިން ކުރެވިގެން ކުރިއަށް ގެންދެވޭނެ މަޝްރޫއަކަށްވާތީ، މަޝްރޫއު ނިމޭއިރު މާލެއަށް ދިމާވެފައިވާ ފެން ބޮޑުވުމުގެ މައްސަލަ އެއްކޮށް ހައްލުވެގެންދާނެ،" މުއްތަލިބު ވިދާޅުވި އެވެ.
ރައީސް މުއިއްޒު އިއްޔެ އެކްސްގައި ކުރެއްވި ޕޯސްޓުގައި ވިދާޅުވީ މާލޭގެ ހުރިހާ މަގުތައް ރަނގަޅު ފެންވަރަކަށް ހެދުމަށް ފަށާ މަޝްރޫއުގެ އެންމެ މުހިއްމު އެއް އަމާޒަކީ މާލޭގައި ފެންް ބޮޑުވުން ހައްލުކުރުން ކަމަށެވެ.
"އެ މަޝްރޫއު ނިމިގެން ދާއިރު މާލޭގައި ޒަމާނުއްސުރެ ބޮޑުވެފައިވާ ފެެންބޮޑުމުގެ މައްސަލައަށް ދާއިމީ ހައްލެއް ލިބިގެންދާނެ،" ރައީސް ވިދާޅުވި އެވެ.
މާލޭގެ މަގުތައް ހެދުމުގެ މަޝްރޫއަކީ ޗައިނާގެ ހިލޭ އެހީގެ ދަށުން ހިންގާ މަޝްރޫއެކެވެ. މި މަޝްރޫއުގެ މަޝްރޫއުގެ ފީސިބިލިޓީ ސްޓަޑީއަށް ބޭނުންވާ ފައިސާ ހޯދަން ޗައިނާ އެއިޑާއެކު ލެޓާސް އޮފް އެކްސްޗޭންޖް (އެލްއޯއީ) ގައި ސޮއިކޮށްފަ އެވެ. އެ މަޝްރޫއުގެ އަގު 100 އެތައް މިލިއަން ޑޮލަރަކަށް އަރާނެ ކަމަށް، މި އަހަރު ޖެނުއަރީ މަހު މުއްތަލިބު ވިދާޅުވެފައިވެ އެވެ.
މާލޭގެ ފެންބޮޑުވުމުގެ މައްސަލަ ހައްލުކުރަން މި ސަރުކާރުން މެއި މަހު މަޝްރޫއެއް ފެށި އެވެ. އާރުޑީސީއާ، އެމްއެންޑީއެފް އަދި އިންފްރާސްޓަރަކްޗާ މިނިސްޓްރީ ގުޅިގެން ފެށި އެ މަޝްރޫއުގެ ފުރަތަމަ މަސައްކަތެއްގެ ގޮތުގައި ކުރިއަށް ގެންދިޔައީ މާލޭގައި އެންމެ ބޮޑަށް ފެންބޮޑުވާ ސަރަހައްދު ކަމުގައި މާފަންނުގައި ފެންބޮޑުވުމުގެ މައްސަލަ އަށް ހައްލެއް ހޯދައި ދިނުމެވެ. އެ ސަރަހައްދަށް ޖަމާވާ ފެން ކަނޑަށް ދާ ގޮތަށް ފަހިކޮށް، މާލޭގައި ހުރި ޕަންޕް ސްޓޭޝަންތައް ރަނގަޅު ކުރުމުގެ މަސައްކަތް ފެށި އެވެ. އޭރު ކުރި މަސައްކަތެއްގެ ނަތީޖާއެއް އިއްޔެ ނުފެނި، މުޅި މާލެ އޮތީ ފެނު އަޑީގަ އެވެ.
