ރާއްޖެއިން ފުރާ ބިދޭސީން "އިމުގާ" ޓްރެވެލާ ޑިކްލެރޭޝަން ފޯމު ފުރިހަމަ ކުރަން ނުޖެހޭ ގޮތަށް މޯލްޑިވްސް އިމިގްރޭޝަނުން ހަމަޖައްސައިފި އެވެ.
އިމިގްރޭޝަނުން މިއަދު ބުނީ މިއީ ރައީސް ޑރ. މުހައްމަދު މުއިއްޒުގެ ވިސްނުމާ އެއްގޮތަށް ނިންމި ނިންމުމެއް ކަމަށާއި މި ނިންމުން ތަންފީޒުކުރަން ފަށާނީ އޮގަސްޓު 15، އިން ފެށިގެން ކަމަށެވެ.
މި ވެރިކަމުގައި އިމިގްރޭޝަން ކޮންޓްރޯލަރުގެ މަގާމަށް އައްޔަންކުރި މުހައްމަދު ޝަމްއާން ވަހީދުގެ ފުރަތަމަ ނިންމެވުމަކީ ރާއްޖެ އަންނަ އަދި ރާއްޖެއިން ފުރާ ދިވެހިން "އިމުގާ" ފޯމު ފުރަން ނުޖެހޭ ގޮތް ހެއްދެވުމެވެ. އެގޮތަށް ނިންމީ ނޮވެމްބަރު 20، 2023 ގަ އެވެ.
ރާއްޖެއިން ފުރާ ބިދޭސީން މި ފޯމު ފުރަން ނުޖެހޭގޮތަށް ނިންމި ސީދާ ސަބަބެއް އިމިގްރޭޝަނުން ނުބުނެ އެވެ. ނަމަވެސް އެ އިދާރާގެ އަމާޒަކީ ދަތުރުފަތުރު ކުރާ އެންމެހާ ފަރާތްތަކަށް ވީހާވެސް ލުއިފަސޭހަ އިންތިޒާމްތަކެއް ހަމަޖައްސައިދިނުން ކަމަށް އެ އިދާރާގެ ބަޔާނުގައި ބުނެފައިވެ އެވެ.
މިއީ ކޮވިޑް-19 ގެ ސަބަބުން ރާއްޖެ އަންނަ ކޮންމެ މީހަކު ވެސް އަދި ރާއްޖޭން ބޭރަށް ދަތުރުކުރާ ކޮންމެ މީހެއް ވެސް ޖުލައި 15, 2020 އިން ފުރިހަމަ ކުރަން ޖެހުނު ފޯމެކެވެ. މި ފޯމް އޮންލައިންކޮށް ފުރިހަމަ ކުރަން ޖެހޭ ގޮތަށް ބަދަލުކުރީ މާޗު 14, 2021 ގަ އެވެ.
މިއަދުގެ ނިންމުމާއެކުވެސް، ރާއްޖެއަށް ދަތުރުކުރާ ބިދޭސީން އިމުގާ ފޯމު ފުރަން ޖެހޭނެ ކަމަށް އިމިގްރޭޝަނުން ވަނީ ބުނެފަ އެވެ. ރާއްޖެ ދަތުރުކުރާ ބިދޭސީން އެ ފޯމު ފުރަން ޖެހޭނީ ކުރިން ވެސް އަމަލުކުރަމުންދިޔަ އުސޫލާ އެއްގޮތަށް، ރާއްޖެ އައުމުގެ 96 ގަޑިއިރު ކުރިންނެވެ.
