ރާއްޖޭގައި މި މަހު 17-24 އަށް ކުރިއަށްދާ އޭޝިއަން ސާފިން ޗެމްޕިއަންޝިޕް ހާއްސަވާ އެއް އެތުލީޓަކީ ކ. ތުލުސްދޫ އަށް އުފަން އަހުމަދު އާގިލް (އައްމަޑޭ) އެވެ. އެއީ، އަމިއްލަ ފަސްގަނޑުގައި މި މުބާރާތް ކުރިއަށްދިޔުމުގެ އިތުރުން ގައުމީ ސާފިން ޓީމު ގޮވައިގެން ކެޕްޓަނެއްގެ ހައިސިއްޔަތުން ލީޑު ކުރާނީ ވެސް އައްމަޑޭ އަށް ވުމުންނެވެ.
މޯލްޑިވްސް ސާފިން އެސޯސިއޭޝަނުން މި މުބާރާތައް ރާއްޖޭގެ ޓީމު އޭ އަދި ޓީމު ބީ އެކުލަވާލާފައިވާއިރު، މި ދެ ޓީމުގެ ކެޕްޓަނެއްގެ ގޮތުގައި ހަރަކާތްތެރިވާނީ އައްމަޑޭ އެވެ.
"އަދަދު ސްޕޯޓްސް" އާ ވާހަކަ ދައްކަމުން އައްމަޑޭ ބުނީ، އަމިއްލަ ފަސްގަނޑުގައި ބާއްވާ މި މުބާރާތުގައި، ކެޕްޓަނެއްގެ ގޮތުގައި ރާއްޖޭގެ ސާފް ޓީމު ލީޑު ކުރަން ފުރުސަތު ލިބުމުން ހިތްހަމަޖެހިފައި ހުރި ކަމަށެވެ. އަދި، މިއީ ސާފިން ކެރިޔަރުގައި އޭނާ ދެކެމުން އައި ހުވަފެނެއް ހަގީގަތަކަށް ވުން ކަމަށް ވެސް އައްމަޑޭ ބުންޏެވެ.
"ވަރަށް ގިނަ ދުވަސް ވެއްޖެ ރާއްޖޭގެ އެންމެ ޓޮޕް ލެވަލްގައި މި ކަމުން (ސާފިން) އިން ދެވެން އިން އެންމެ މައްޗަށް ދާން މަސައްކަތް ކުރާތާ, އެހެންވެ, އޭގެ ތެރެއިން އެއް ކަންތައް މިއީ. ގައުމީ ޓީމުގެ ކެޕްޓަންކަން ހަވާލުކުރުމުން މިހުރީ ވަރަށް އުފާވެފައި." އައްމަޑޭ ބުންޏެވެ.
އަމިއްލަ ފަސްގަނޑުގައި މިކަހަލަ މުބާރާތެއް ބޭއްވުން އެއީ އައްމަޑޭ އަށް ބޮޑު ހިތްހަމަ ޖެހުމެކެވެ. އެކަމަކު, އެއާއެކު ބޮޑު ޕްރެޝަރެއް ވެސް އޮންނަ ކަމަށް އައްމަޑޭ ދެކެ އެވެ. އެ ގޮތުން، ގާތުގައި އުޅޭ މީހުންނާ ރަށު މީހުންގެ އުންމީދުތަކާ ގުޅިފައި އޮތުން އެއީ އައްމަޑޭ އަށް ބޮޑު ޕްރެޝަރެކެވެ. އެކަމަކު، މި ފަހަރުގެ މުބާރާތައް އައްމަޑޭ ނުކުންނާނީ ޕްރެޝަރުތަކުން ސަލާމަތްވެ، މެންޓަލީ ޕްރިޕެއާ ވެގެން ކަމަށް ފާހަގަކުރި އެވެ.
"އަމިއްލަ ފަސްގަނޑުގަ މުބާރާތް އޮތުން އެއީ ވަރަށް ބޮޑު ހިތްހަމަ ޖެހުމެއް އަސްލު. އެކަމަކު، ބޮޑު ޕްރެޝަރެއް ވެސް އޮވޭ. މިދިޔަ އަހަރު އަސްލު ދަށްކޮށް ދިޔައީ ވެސް އެހެންވެ, އެކަމަކު، މި ފަހަރު މެންޓަލީ އެކަންކަމަށް ޕްރިޕެއާ ވެގެން, މަޖާ ކުރަން ކޮންމެ ހީޓަކަށްވެސް އެރޭނީ." އައްމަޑޭ ބުންޏެވެ.
މި ފަހަރު ގައުމީ ޓީމުން މުބާރާތައް ނުކުންނައިރު, ގައުމީ ކޯޗަކަށް ހުރީ އިބޫ ކަމުން އެއީ ވެސް އައްމަޑޭގެ އިތުރުން ގައުމީ ޓީމުގައި ދެން ތިބި ސާފަރުންނަށް ބޮޑު ހިތްހަމަ ޖެހުމެއް ކަމަށް އައްމަޑޭ ބުންޏެވެ. އެ ގޮތުން, އިބޫގެ ތަޖުރިބާ "ފުލީ" ހިތްސާކުރާނެ ކަމަށާއި, އޭގެ ކަންކަން ދަސްކޮށްގެން މުބާރާތުގެ ފައިނަލް ހީޓުގައި ރާއްޖޭގެ ދެ ރާޅާ އެޅުންތެރިން ރާޅާ އެޅުން އެއީ އުންމީދެއް ކަމަށް އައްމަޑޭ ފާހަގަކުރި އެވެ.
