މާޗް 7، 2021 ގައި ދ. މީދޫ "ޖިހާދު" ކިޔާ މަސްދޯންޏެއްގައި ދަންވަރު 3:45 ހާއިރު ބަންގްލަދޭޝްގެ މުހައްމަދު ޝާހީން ކިޔާ މީހަކަށް ވަޅިން ހަމަލާދީ މަރާލި މައްސަލައިގައި ދައުވާކޮށްފައިވާ އެ ގައުމުގެ މުހައްމަދު މަސްއޫދުގެ މައްސަލައިގައި މިއަދު ވެސް ދައުވާ ނުއިއްވި އަޑުއެހުން ނިންމާލައިފި އެވެ.
އެ މައްސަލައިގައި މެއި 5، 2021 ގައި ދައުވާކޮށްފައި ވަނީ އޭނާއާ އެކު އެ ދޯނީގައި މަސައްކަތް ކުރި ބަންގްލަދޭޝްގެ މުހައްމަދު މަސްއޫދުގެ މައްޗަށެވެ. މުހައްމަދުގެ މައްޗަށް ގަސްދުގައި މީހަކު މެރުމުގެ ދައުވާ އުފުލާފައިވާއިރު، އޭނާ ހުރީ ޝަރީއަތް ނިމެންދެން މާފުށީ ޖަލުގައި ބަންދުކޮށްފަ އެވެ.
މިއަދުގެ އަޑުއެހުމުގައި ކުރިއަށް ދިޔައީ ދައުލަތުގެ ފަރާތުން އެދިފައިވާ ހެކިތައް ރައްކާތެރިކުރުމާ ގުޅޭ ގޮތުން ޝަރީއަތުން ގޮތެއް ނިންމުމާއި ދައުވާއަށް ޖަވާބުދާރީވުމެވެ.
މައްސަަލަ ބައްލަވާ ގާޒީ އިބްރާހިމް އަހުސަން ނިންމެވީ ދައުލަތުން ހުށަހަޅާފައިވާ ހަ ސިއްރު ހެކިވެރިން ތަހުގީގަށް ދީފައިވާ ބަޔާންތަކުން ސިއްރު ހެކިވެރިންގެ ވަނަވަރު އުނިކުރުމަށް ފަހު ދިފާއަށް ދިނުމަށެވެ. އަދި ދައުލަތުން ދިފާއަށް ދޭން ބޭނުން ނުވާ ކްރައިމް ސީން ރިޕޯޓުގައި ހުރި ޝާހީންގެ ފޮޓޯތައް އުނިކުރުމަށް ފަހު އެ ރިޕޯޓު ދިފާއަށް ދޫކުރުމަށެވެ.
މިއަދުގެ އަޑުއެހުމުގައި ދައުވާއަށް ޖަވާބުދާރީވާން ތައްޔާރުތޯ ގާޒީ ސުވާލު ކުރެއްވުމުން ދިފާއީ ވަކީލު އަހުމަަދު ޔާމީން ވިދާޅުވީ ދިފާއުން ބޭނުންވަނީ މިއަދު ދޫކުރަން ނިންމި ބަޔާންތައް ލިބި ދިރާސާކުރުމަށް ފަހު ދައުވާއަށް ޖަވާބުދާރީވުމުގެ ފުރުސަތެއް ދިނުމަށެވެ. އެހެންވެ މިއަދުގެ އަޑުއެހުމުގައި ދައުވާއަށް ޖަވާބުދާރީވުމުގެ ބައި ކުރިއަކަށް ނުގެންދެ އެވެ.
މި ބަޔާން ދައުވާ ލިބޭ ފަރާތަށް ހުށަހެޅުމަށް ކޯޓުން ދިން މުއްދަތަކީ މި މަހު 15، ގަ އެވެ. އަދި ދައުވާ އިއްވުމާއި ޖަވާބުދާރީވުމަށް އަޑުއެހުމެއް މި މަހުގެ ފަހު ހަފްތާގައި ބާއްވަން މަސައްކަތް ކުރައްވާނެ ކަމަށް ގާޒީ ވިދާޅުވުމަށް ފަހު މިއަދުގެ އަޑުއެހުން ނިންމާލި އެވެ.
މި މައްސަލަ މިހާ ބޮޑަށް ދިގުދެމިގެން ދިޔައީ މައްސަލަ ކުރިން ބެލި ގާޒީ އެހެން ކޯޓަކަށް ބަދަލުކުރުމުން، ސެކްޝަނާ ހަވާލުވާން ޖެހޭ ގާޒީގެ މަގާމު ހުސްކޮށް އޮތުމުންނެވެ. އާ ގާޒީއާ އެކީ އަޑުއެހުންތައް ފެށުނީ މިދިޔަ އަހަރު މެއި މަހުގަ އެވެ. އެއަށްފަހު އަހަރެއްހާ ދުވަސް އަނެއްކާ ވެސް މައްސަލަ ލަސްވީ، ކުރިން ދިފާއީ ވަކީލަކަށް އައްޔަންކުރި ވަކީލު އެ މަސައްކަތުގައި ނޫޅޭތީ ދިމާވި ބައެއް އޮޅުންބޮޅުންތަކާ ހުރެ އެވެ.
