ގދ. ތިނަދޫގައި ބޭއްވި މުޒާހަރާ ރޭވުމުގައިި ބައިވެރިވި ބަންގްލަދޭޝްގެ މަސައްކަތްތެރިން ޑީޕޯޓުކުރަން ހޯމް މިނިސްޓްރީން ނިންމުމުން ފާޑުކިޔައި، އަސާސީ ހައްގެއް ނިގުޅައިގަނެވޭ ގޮތަށް ވިސާގެ ޝަރުތެއް ކަނޑަނޭޅޭނެ ކަމަށް ޓްރާންސްޕޭރެންސީ މޯލްޑިވްސްއިން މިއަދު ބުނެފި އެވެ.
މިދިޔަ ހަފުތާގައި ތިނަދޫގައި ބޭއްވި މުޒާހަރާއަކީ، ބަންގްލަދޭޝްގައި އެ ގައުމުގެ ސަރުކާރާ ދެކޮޅަށް ކުރަމުންދާ ސިލްސިލާ މުޒާހަރާތަކަށް އެއްބާރުލުން ދިނުމުގެ ގޮތުން ބޭއްވި ސުލްހަވެރި އެއްވުމެކެވެ.
ނަމަވެސް މިކަން "ސިޔާސީ ހަަރަކާތެއް" ގެ ގޮތުގައި ލޭބަލްކޮށް، އެއީ ވިސާގެ ޝަރުތަކާ ހިލާފުވުން ކަމަށް ބުނެ އެކަމުގައި އިސްކޮށް އުޅުނު އެންމެން ޑީޕޯޓުކުރާނެ ކަމަށް ހޯމް މިނިސްޓަރު އަލީ އިހުސާން ވަނީ މި ފަހުން ހާމަކުރައްވާފަ އެވެ.
ހޯމް މިނިސްޓްރީގެ ނިންމުމާ މެދު ކަންބޮޑުވުން ފާޅުކޮށް ޓްރާންސްޕޭރެންސީން ނެރުނު ނޫސް ބަޔާނެއްގައި ބުނީ، ސުލްހަވެރިކަމާއެކު އެއްވެ އުޅުމާއި ޖަމިއްޔާ ހެދުމުގެ ހައްގަކީ އދ. ގެ އިންސާނީ ހައްގުތަކުގެ އާންމު ގަރާރާއި ރާއްޖޭގެ ގާނޫނުއަސާސީން ވެސް ކޮންމެ މީހަކަށް ލިބޭ ހައްގެއް ކަމަށެވެ.
"މި ހައްގުތަކަކީ ދިވެހިރާއްޖޭގެ ގާނޫނުއަސާސީގެ ދެވަނަ ބާބުގައި ވެސް ކަށަވަރުކޮށްފައިވާ ހައްގުތަކެއް. ގާނޫނުއަސާސީގެ 32 ވަނަ މާއްދާއިން ކޮންމެ މީހަކަށް ދައުލަތުގެ ހުއްދައެއް ކުރީން ހޯދުމަކާ ނުލައި، ސުލްހަވެރިކަމާއެކު އެއްވެއުޅުމުގެ މިނިވަންކަން ލިބިދޭ" އެ ޖަމިއްޔާއިން ބުންޏެވެ.
ޓްރާންސްޕޭރެންސީން ބުނީ ގާނޫނު އަސާސީން ލިބިދޭ ހައްގެއް ނިގުޅައިގަނެވޭ ގޮތަށް ވިސާގެ ޝަރުތުތައް ކަނޑައެޅުމަކީ ގާނޫނާ ހިލާފު ކަމެއް ކަމަށެވެ. މިފަދަ އަސާސީރާއްޖޭގެ އެއްވެސް ގާނޫނަކާއި ގަވާއިދަކާ ހިލާފުނުވާހާ ހިނދަކު ރާއްޖޭގައި ތިބޭ ބިދޭސީން ހައްޔަރުކޮށް, ވަޒީފާއިން ވަކިކޮށް އަނބުރާ ފޮނުވާލުމަކީ އެ ޖަމިއްޔާއިން ކަންބޮޑުވާ ކަމަށް ވެސް އެ ބަޔާނުގައި ވެ އެވެ.
މި މައްސަލައިގައި ޓްރާންސްޕޭރެންސީން ގޮވާލީ ހޯމް މިނިސްޓްރީގެ ނިންމުން ބާތިލުކުރުމަށެވެ. އަދި ހުރިހާ ބިދޭސީ މަސައްކަތްތެރިންނާއި އެ މީހުންގެ އާއިލާތަކުގެ މެންބަރުންގެ ހައްގުތައްް ހިމާޔަތްކުރުމާބެހޭ ބައިނަލްއަގްވާމީީ މުއާހަދާގައި ބައިވެރިވެ އެއަށް ޢަމަލުކުރުމަށާއި ބިދޭސީންނަށް އަޅާ ފިޔަވަޅުތަކާއި ތަފާތުކުރުންތައް ހުއްޓާލުމަށް އެ ޖަމިއްޔާއިން ގޮވާލާފައި ވެ އެވެ.
ޓްރާންސްޕޭރެންސީގެ ބަޔާން ނިންމާލަމުން ދިވެހި މުޖުތަމައު އާއި އިގުތިސޯދުގައި ބިދޭސީ މަސައްކަތްތެރިން އަދާކުރާ ދައުރު ހަނދާންކޮށްދެމުން، ރާއްޖޭގައި ދިރިއުޅޭ ބިދޭސީންގެ އަސާސީ، ގާނޫނީ އަދި ބައިނަލްއަގްވާމީ އިންސާނީ ހައްގުތައް ކަށަވަރުކުރުމަށް މަސައްކަތްކުރުމަށް ވެސް އެ ޖަމިއްޔާއިން ގޮވާލާފައި ވެ އެވެ.
