ބިދޭސީ މަސައްކަތްތެރިން ބައިތިއްބާނެ އެކޮމޮޑޭޝަން ފެސިލިޓީތައް ތަރައްގީކުރުމުގެ މަސައްކަތް މެލޭޝިއާގެ އަލްޓައިޒް ޑިޖިޓަލް ކިޔާ ކުންފުންޏަކާ ހަވާލުކުރުމުގެ މަސައްކަތް ހޯމްލޭންޑް މިނިސްޓްރީން ފަށައިފި އެވެ.
މެލޭޝިއާގެ ނޫސްތަކުގައި ރިޕޯޓުކޮށްފައިވާ ގޮތުގައި އެ ގައުމުގެ ޖީ3 ގްލޯބަލް ބެރްހާދުގެ ސަބްސިޑަރީ އަލްޓައިޒް ޑިޖިޓަލްއާ ހަވާލުކުރީ ނޭޝަނަލް އިންޓަގްރޭޓަށް މައިގްރަންޓް ވޯކާސް ޑޯމިޓޮރީ މަޝްރޫއު އެވެ.
މި މަޝްރޫއާ ބެހޭ މައުލޫމާތު "އަދަދު" އާ ހިއްސާކުރައްވަމުން ހޯމް މިނިސްޓަރު އަލީ އިހުސާން ވިދާޅުވީ، މިއީ މެލޭޝިއާ ކުންފުނިން ލިބުނު އަންސޮލިސިޓަޑް ޕްރޮޕޯޒަލްއަކާ ގުޅިގެން ފަށައިގެން އުޅޭ މަސައްކަތެއް ކަމަށާއި، މިކަން ކުރަން ނިންމީ ބިދޭސީ މަސައްކަތްތެރިން ބައިތިއްބާ ތަންތަނުގެ ހާލަތު ރަނގަޅުކުރަން ސަރުކާރުން ގެންގުޅޭ ސިޔާސަތާ ގުޅޭތީ ކަމަށެވެ.
"އެ މީހުންގެ ޕްރޮޕޯޒަލްއަކީ ޑޯމިޓޮރީތަކެއް ޑިވެލޮޕް ކުރުން. މިކަމަކާ އަޅުގަނޑުމެންގެ ސަރުކާރުގެ ސިޔާސަތެއް ވެސްމެ. އަޅުގަނޑުމެން ބޭނުން ވަކިން ބިދޭސީ މަސައްކަތްތެރިން، އަންސްކިލްޑް ލޭބާ ކެޓެގަރީގައި މިއުޅޭ މީހުން، ވަކި ތަނެއްގައި ގެންގުޅެން،" އިހުސާން ވިދާޅުވި އެވެ.
"މުޅި ރަށު ތެރޭގައި ގިނަ ވެގެން، ރަށު ތެރޭގައި އެތަން މިތަނުގައި އެއްވެސް ގަވާއިދަކާ ގާނޫނަކަށް ނުފެތޭ މިންގަނޑުތަކަށް ނުފެތާ ކަހަލަ އެކޮމޮޑޭޝަންތަކުގައި މިތިބޭ ތިބުން ހުއްޓުމަކަށް ގެންނަން"
އަލްޓައިޒްގެ ހުށަހެޅުން އިކޮނޮމިކް ކައުންސިލުގައި މަޝްވަރާކުރުމަށް ފަހު މިފަދަ އެކޮމޮޑޭޝަންތައް އެޅުން އެ ކުންފުންޏަށް އެކަނި ކުރެވޭ ގޮތަށް އެކްސްކްލޫސިވިޓީ ދޭން އެއްބަސްވެ، ސަރުކާރުން ވަނީ އެ ކުންފުނީގެ ފަހުގެ ހުށަހެން ތައްޔާރުކޮށް ހުށަހަޅަން އެ ކުންފުންޏަށް އަންގާފަ އެވެ.
މިގޮތަށް އެއްބަސްވުމުގައި ސޮއިކޮށްފި ނަމަ ރާއްޖޭގައި މަސައްކަތް ކުރާ ހުރިހާ ބިދޭސީ މަސައްކަތްތެރިން ތިބެން ޖެހޭނީ އެ ކުންފުނިން އިމާރާތްކުރާ ތަންތަނުގަ އެވެ. މިކަމާ ގުޅޭގޮތުން އިހުސާން ވިދާޅުވީ، އަލްޓައިޒްއަށް އެކްސްކްލޫސިވިޓީ ދޭން ނިންމީ އެ ކުންފުނިން އެގޮތަށް ހުށަހަޅާފައިވާތީ ކަމަށެވެ.
"އެކްސްކްލޫސިވްލީ އޭތި ދޭކަމަށް އެ މީހުން ރިކުއެސްޓް ކޮށްފައި މި އިނީ. އެކްސްކްލޫސިވްލީ ނުދެންޏާމުން ތިމަންނަމެންނަށް މި ވަރުގެ އިންވެސްޓްމަންޓެއް ނުކުރެވޭނެޔޭ،" އޭނާ ވިދާޅުވި އެވެ.
ބިދޭސީ މަސައްކަތްތެރިން ބައިތިއްބާ އިމާރާތްތައް އެޅުމުގެ މަޝްރޫއުގެ މަސައްކަތުގެ ދަށުން މާލެ އާއި ހުޅުމާލޭގައި އެއް ލައްކަ މީހުންގެ ޖާގައިގެ އިމާރާތްތައް ތަރައްގީކުރެވިގެން ދާނެ އެވެ.
އެގޮތުން މި ތަންތަން ފަރުމާކުރުމާއި އިމާރާތްކުރުމާއި މިތަނުގައި ތިބޭ މީހުންގެ ކަންކަން ބަލަހައްޓާނެ ޑިޖިޓަލް ނިޒާމު ގާއިމުކޮށް، މި ހުރިހާ މަސައްކަތަކަށް ފައިސާ ހަރަދުކުރާނީ އެ ކުންފުނިންނެވެ. ނަމަވެސް އެތަނުގެ ހިދުމަތްތައް ފޯރުކޮށްދިނުމާއި ހިންގުމާއި ބެލެހެއްޓުމުގެ ހުރިހާ މަސައްކަތެއް، ލިބޭ އާމްދަނީ ބަހާ ގޮތަށް، ކުރާނީ ދިވެހި ސަރުކާރުން ކަމަށް އިހުސާން ވިދާޅުވި އެވެ.
ޕަބްލިކް ޕްރައިވެޓް ޕާޓްނާޝިޕްގެ ދަށުން އަލްޓައިޒްއާއެކީ މިތަން ހިންގާނީ ސީދީ މިނިސްޓްރީންތޯ ނުވަތަ ސަރުކާރު ހިއްސާވާ ކުންފުންޏަކުންތޯ މުސްތަގުބަލުގައި ނިންމާނެ ކަމަށް އޭނާ ވިދާޅުވި އެވެ. އަދި މިކަމަށް ހަރަދު ވާނެ ވަރެއް ވެސް އެނގޭނީ އެ ކުންފުނީގެ ފަހުގެ ހުށަހެޅުން ލިބުމުން ކަމަށް އޭނާ ވިދާޅުވި އެވެ.
މެލޭޝިއާ ނޫސްތަކުން ރިޕޯޓުކޮށްފައި ވަނީ، އަލްޓައިޒްއަށް މި މަސައްކަތް ދެނީ ބިން ހަވާލުކުރާ ތާރީހުން ފެށިގެން 30 އަހަރު ދުވަހަށް، އަދި އެ މުއްދަތު ނިމުމުން އޮޓޮމެޓިކުން އިތުރު 30 އަހަރު އެތަންތަން ހިންގޭ ގޮތަށެވެ. މި މުއްދަތުގެ ތެރޭގައި އެހެން އެއްވެސް ކުންފުންޏަކަށް ރާއްޖޭގައި ބިދޭސީ މަސައްކަތްތެރިން ބައިތިއްބާނެ ތަންތަން އަޅައިގެން އެއްވެސް ބަޔަކަށް އެ ހިދުމަތެއް ނުދެވޭނެ އެވެ.
އަލްޓައިޒްގެ މައިގަޑު މަސައްކަތަކީ ޓެލެކޮމިއުނިކޭޝަން ދާއިރާގެ ހިދުމަތްތަކާއި އުފެއްދުންތައް ފޯރުކޮށްދިނުމެވެ. އެހެންވެ އެ ކުންފުނިން ރާއްޖޭގައި އަޅާ ތަންތަން ވެސް ހުންނާނީ އެންމެ ފަހުގެ ޑިޖިޓަލް ވިއުގައަކުން ގުޅާލެވި، އެތަނުގައި ދިރިއުޅޭ މީހުންގެ ހުރިހާ ކަމެއް ފަސޭހައިން ބެލެހެއްޓޭ ގޮތަށް ކަމަށް އިހުސާން ވިދާޅުވި އެވެ.
ބިދޭސީ މަސައްކަތްތެރިން މިހާރު ދިރިއުޅޭ ގިނަ ތަންތަނަކީ އާންމު ދިރިއުޅުމުގެ ހާލަތަށް ނުފެތޭ ތަންތަނެވެ. މިކަން ހައްލުކުރަން ކުރީ ސަރުކާރުގައި އެކޮމޮޑޭޝަން ގަވާއިދެއް އެކުލަވާލި ނަމަވެސް، މިއަދާ ހަމައަށް އެންމެ އެކަށީގެންވާ މިންވަރަށް އެ ގަވާއިދު ތަންފީޒެއް ނުކުރެ އެވެ.
