ރެޑްބުލް އިން އިންތިޒާމުކޮށްގެން ކުރިއަށް ގެންދާ ހާފް ކޯޓް ބާސްކެޓްބޯޅަ މުބާރާތުގެ ކޮލިފައިން ބުރުތައް ފަށައިފި އެވެ.
މި މުބާރާތުގެ ކޮލިފައިން ބުރުތައް ބާއްވަން ނިންމާފައިވަނީ ކުޅުދުއްފުށި ސިޓީ, ވަން އެންޑް އޮންލީ ރީތިތައް އަދި މާލެ ސިޓީގަ އެވެ. އަދި ނެޝަނަލް ފައިނަލްސް ކުޅޭނީ މާލެ ސިޓީގަ އެވެ.
ނެޝަނަލް ފައިނަލްސްގައި ވާދަކުރާނީ ކޮލިފައިން ބުރުތަކުގެ ޗެމްޕިއަން ޓީމެވެ. މިހާތަނަށް ކުޅުދުއްފުށި ސިޓީ އަދި ވަން އެންޑް އޮންލީގެ ކޮލިފައިން ބުރު ނިމިފައިވާއިރު, މާލެ ސިޓީ ކޮލިފައިން ފަށާނީ މާދަމާ އެވެ.
މާލެ ސިޓީ ކޮލިފައިން ބުރުގެ މެޗުތައް ކުރިއަށްދާނީ އެކުވެނި އައުޓް ޑޯ ބާސްކެޓް ކޯޓުގަ އެވެ. މާލެ ސިޓީ އިން ހަތަރު ޓީމު ނެޝެނަލް ފައިނަލްސްގައި ކުޅޭނެ އެވެ.
މި މުބާރާތުގެ ނެޝަނަލް ފައިނަލްސް އަށް ކުޅުދުއްފުށި ސިޓީގެ ކޮލިފައިންގެ ޗެމްޕިއަންކަން ހޯދައިގެން އައިލެންޑް ބޯއީޒް ދަތުރުކޮށްފައިވާއިރު, ވަން އެންޑް އޮންލީގައި ކުޅުނު ކޮލިފައިން ބުރު ކާމިޔާބުކޮށް ޓީމް 69 ވެސް ވަނީ ނެޝަނަލް ފައިނަލްސް އިން ޖާގަ ހޯދައިފަ އެވެ.
މި އަހަރުގެ ހާފް ކޯޓް 3 އޮން 3 ބާސްކެޓް މުބާރާތުގައި ދުނިޔޭގެ 25 ގައުމަކުން 8000 އަށްވުރެ ގިނަ ކުޅުންތެރިން ބައިވެރިވާނެ ކަމަށް ބެލެވެ އެވެ.
މި މުބާރާތުގެ ނެޝަނަލް ފައިނަލްގައި ވާދަކޮށް ޗެމްޕިއަންކަން ހޯދާ ޓީމަށް އެމެރިކާގެ ނިއުޔޯކް ސިޓީގައި ކުރިއަށްދާ މި މުބާރާތުގެ ވޯލްޑް ފައިނަލްސްގައި ވާދަކުރުމުގެ ފުރުސަތު ދިނުމަށް ރެޑް ބުލް މޯލްޑިވްސް އިން ވަނީ ނިންމާފަ އެވެ.
މީގެ ކުރިން ރެޑް ބުލް މޯލްޑިވްސް އިން ވަނީ ފޯ ޓު ސްކޯ ނަމުގައި މުބާރާތެއް ކުރިއަށް ގެންގޮސްފަ އެވެ. އެ މުބާރާތުގެ ޗެމްޕިއަންކަން ހޯދީ ޓީއެފްޓީ އެވެ. އެ ޓީމަށް ވަނީ މިއަހަރު ޖަރުމަނުގައި ކުރިއަށްދާ ވޯލްޑް ފައިނަލްސްގައި ވާދަކުރުމުގެ ފުރުސަތު ދީފަ އެވެ. މީގެ އިތުރުން ރެޑް ބުލް އިން ވަނީ ވިންޑް ރައިޑާސް ނަމުގައި ކައިޓް ސާފިން މުބާރާތެއް ބ. ގޮއިދޫގައި ބާއްވައިފަ އެވެ. އެ މުބާރާތުގެ ވިންޑް ރައިޑާގެ މަގާމު ހޯދި ހަސަން މާހިރު (ހަންޓޭ) އެވެ.
