އާއިލާގެ އެއްވެސް މީހަކަށް ނާޖައިޒު ގޮތެއްގައި ވަޒީފާ ހޯދައިދީފައިނުވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޝަހީމްގެ ދަރިފުޅު އަބްދުﷲ މާހިލް ޝަހީމް އަށް މެލޭޝިއާގައި ހުންނަ ދިވެހި ހައި ކޮމިޝަންގެ އިސް މަގާމެއް ލިބިވަޑައިގަތުމާއި އަދި ޝަހީމްގެ އެއްބަނޑު އެއްބަފާ ކޮއްކޮ އަހުމަދު ޝިފާޒް އަލީ ސައީދު ޓޫރިޒަމް މިނިސްޓްރީގެ ނައިބަކަށް އައްޔަންކޮށްފައިވުމާއި ގުޅިގެން، އާންމުންގެ ފާޑުކިޔުން އިސްލާމިކް މިނިސްޓަރަށް ވަރަށް ބޮޑަށް ވަނީ އަމާޒުވެފަ އެވެ.
ފާޑުކިޔުންތާއި ގުޅޭގޮތުން ޝަހީމް މިއަދު ފޭސްބުކް އާއި އެކްސް ގައި ކުރެއްވި ޕޯސްޓެއްގައި ވިދާޅުވީ އޭނާގެ އާއިލާގެ މީހުންނަށް ސަރުކާރުގައި ހިދުމަތް ކުރުމުގެ ފުރުސަތު ލިބެނީ އެމީހަކު "ކިޔަވައިގެން ހުރި ދާއިރާއަކުން" ކަމަށެވެ.
"އަޅުގަނޑުގެ ދަރިޔަކު، ނުވަތަ އާއިލާގެ މެންބަރަކު ކިޔަވައިގެން ހުރި ދާއިރާއަކުން ހިދުމަތްކުރަން އެމީހަކަށް ލިބޭ ފުރުސަތަކީ އަޅުގަނޑު ނާޖާއިޒް ގޮތުގައި ހޯދައިދޭނެ ފުރުސަތެއް ނޫން. ދައުލަތުގެ މުދަލާއި މަގާމާއި ފައިސާ ނާޖާއިޒު ގޮތުގައި ބޭނުން ނުކުރާނެކަމުގެ ފުރިހަމަ ޔަގީންކަން އަރުވަން،" އޭނާ ވިދާޅުވި އެވެ.
ޝަހީމްގެ ދަރިފުޅު އަބްދުﷲ މާހިލް އައްޔަން ކޮށްފައިވަނީ މަހަކު 100،000ރ. ގެ އުޖޫރައެއް ލިބޭ މަގާމަކަށެވެ. ޝަހީމްގެ އަނބިކަނބަލުން ފާތިމަތު އާފިޔާ އަކީ ވެސް މާލޭ ސިޓީ ގްރޫޕް އޮފް ހޮސްޕިޓަލްސްގެ ގަވާނިން ބޯޑުގެ މެންބަރެކެވެ.
ޑރ. މުހައްމަދު މުއިއްޒުގެ މަތިބަރު ސަރުކާރުން ސިޔާސީ މަގާމުތަކުގެ އަދަދު ހާމަކޮށްފަ އެއްްނުވެ އެވެ. ސިޔާސީ މަގާމުތައް މަދުކުރުމުގެ ބަދަލުގައި އަދިވެސް ގެންދަނީ، އާއިލާ އާއި ގާތް ފަރާތްތަކަށް ވަޒީފާ ދެމުންނެވެ.
