ގަރުނެއްހާ ދުވަސްވީ ބަންޑާރަ މިސްކިތް ތަޅާލައި އެތަނުގައި އާ މިސްކިތެއް އަޅަން ނިންމައިފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް މީޑިއާތަކަށް ވިދާޅުވީ ބަންޑާރަ މިސްކިތް ހުރި ތަނުގައި އާ މިސްކިތެއް އެޅުމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށެވެ.
މިގޮތުން ބަންޑާރަ މިސްކިތް ހުރި ތަނުގައި އައު މިސްކިތް އެޅުމުގެ މަސައްކަތް މި ހިނގާ ރޯދަ މަހަށްފަހު ފަށާނެ ކަމަށް ޝަހީމް ވިދާޅުވި އެވެ.
"ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަސް ފަހުން ފެށިގެންދާނެ އިންޝާ ﷲ. މިކަމަށް ބޭނުންވާ އެހީތެރިކަން ދީލަތި ފަރާތަކުން ވަނީ ހަމަޖެހިފަ. މިއާއެކު މާލެ ގެ ބޮޑެތި ހުރިހައި މިސްކިތެެއް އާވެގެން ދިޔައީ الحمد لله،" ޝަހީމް ވިދާޅުވި އެވެ.
މިކަމާ ގުޅިގެން ކުރިގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން ވިދާޅުވީ ބަންޑާރަ މިސްކިތަކީ މާލޭގައި މިހާރުހުރި ތާރީހީ ބިނާއެކޭ ބުނެވިދާނޭ ހައެއްކަ ބިނާ ތެރޭ ހިމެނޭ ބިނާއެއް ކަމަށެވެ.
ތާރީހާއި ސަގާފަތާއި އާދަކާދަތައް ދަމަހައްޓާ ދިރުވުމަށްބޮޑެތި އިދާރާތައް ހުންނައިރު، އެ އިދާރާތަކުގެ ބޭނުމެއް ނެތް ކަމަށް މުހައްމަދު މުއިއްޒު އަދުނާން ވިދާޅުވި އެވެ.
ވިޔަފާރިވެރިންގެ މިސްކިތް ބިނާ ކުރީ 1927 ވަނަ އަހަރު އެވެ. އެއީ އޭރު ރާއްޖޭގައި ވިޔަފާރިކުރަން އުޅުނު ވޯރާ ވިޔަފާރިވެރިން ބިނާކުރި މިސްކިތެކެވެ.
މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއް ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ދީލަތި ފަރާތެއް އެހީ ލިބިފައިވާ ކަމަށް ވެސް ޝަހީމް ވިދާޅުވި އެވެ.
މިނިސްޓަރު ވިދާޅުވީ އެ މިސްކިތް އެޅުމަށްޓަކައި ރޯދަ މަހުގެ 27 ވިލޭރޭ ބިންގާ އެޅުމަށް ހަމަޖެހިފައިވާ ކަމަށާއި ރޯދަ މަސް ނިމުމުން ވަގުތީ މިސްކިތް ތަޅާލައި އަމަލީ މަސައްކަތް ފެށޭނެ ކަމަށެވެ.
