ގަރުނެއްހާ ދުވަސްވީ ބަންޑާރަ މިސްކިތް ތަޅާލައި އެތަނުގައި އާ މިސްކިތެއް އަޅަން ނިންމުމާ ދެކޮޅު ހެދި މީހުން މުޒާހަރާ ކުރުމަށް ވިދާޅުވުމަށް ފަހު މިހާރު އެކަމާ ގުޅޭގޮތުން މަޝްވަރާކުރުމަށް ތައްޔާރަށް ހުންނެވިކަން އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ހާމަކުރައްވައިފި އެވެ.
ބަންޑާރަ މިސްކިތް ތަޅާލައި އެ ތަނުގައި ޒަމާނީ ބޮޑު އާ މިސްކިތެއް އެޅުމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާކަން ޝަހީމް ހާމަކުރެއްވީ އިއްޔެ އެވެ. އެއާއެކު އެ މިސްކިތަކީ މާލޭގެ ސަގާފީ ތަރިކައެއް ކަމަށްވާތީ އެ ތަން ތަޅާލުމާ ދެކޮޅަށް އެތައް ބަޔަކު އަންނަނި އަޑުއުފުލަމުންނެވެ.
ބަންޑާރަ މިސްކިތް ތަޅާލުމާ ދެކޮޅަށް ސޯޝަލް މީޑިއާގައި ހިޔާލު ފާޅުކޮށްފައިވާ މީހުންގެ ތެރޭގައި ތާރީހު ދިރާސާކުރައްވާ ނާޖިހު ދީދީ އާއި ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާނު އާއީ ލިޔުންތެރިޔާ އަދުނާން ހަލީމް އާއި ތާރީހު ދިރާސާކުރާ ޝަމްއޫން ޖަލީލު (ލޫކަސް ޖަލީލު) ހިމެނެ އެވެ. މި އެންމެން ވެސް ގަބޫލުކުރަނީ މިއީ ހިމާޔަތްކުރަން ޖެހޭ އާސާރީ ތަރިކައެއް ކަމަށެވެ.
އޭގެ ތެރެއިން ލޫކަސް ޖަލީލު ވަނީ އެ ނިންމުމާ ދެކޮޅަށް މުޒާހަރާ ކުރާނެ ކަމަށް އެކްސްގައި ލިޔެފަ އެވެ. އެ ޕޯސްޓަށް ޝަހީމު ދެއްވި ރައްދުގައި އޮތީ "ފައްޓަވާ" އެވެ.
ޝަހީމް މިއަދު ލިޔުއްވި ގޮތިގައި އާ މިސްކިތެއް އެ ބިމުގައި ގާއިމުކުރަން ނިންމީ އެއީ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފައިވާ މިސްކިތަކަށް ނުވާތީ އެވެ.
"މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން،" ޝަހީމް ލިޔުއްވި އެވެ.
އިއްޔެ ޝަހީމް ވިދާޅުވި ގޮތުގައި ތަނަކަށް 98 އަހަރު ވުމަކީ ސަގާފީ ތަރިކައަކަށް ވާން ޖެހޭ ސަބަބެއް ނޫނެވެ.
މިނިސްޓަރު އެ ވިދާޅުވާ ގޮތަށް ބަންޑާރަ މިސްކިތަކީ ތަރިކައިގެ ލިސްޓުގައި ހިމެނޭ ތަނެއް ނޫނެވެ. ނަމަވެސް މިކަމާ ދެކޮޅަށް އަޑު އުފުލި މީހުން ވަނީ މިއީ ރާއްޖޭގެ ތާރީހީ ހާދިސާއަކީ ގުޅާ ތަރިކައެއް ކަމަށް ބުނެ މި މިސްކިތް ރައްކާތެރިކުރަން ގޮވާލާފަ އެވެ.
