އުމްރާއަށް ގެންގޮސްދޭނެ ކަމަށް ބުނެ ކޮންމެ އަހަރަކުވެސް އެތައް ބަޔަކަށް ލަނޑު ދެމުންދާތީ އެކަން ހުއްޓުވުމަށް ހައްޖާއި އުމްރާއަށް ހާއްސަ ގާނޫނެއް އެކުލަވާލުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް ވިދާޅުވެއްޖެ އެވެ.
ޝަހީމް އަދަދު އަށް ވިދާޅުވީ ސްކޭމްތައް މަދުކުރުމަށް އެހެން ގައުމުތަކުގައި ވެސް އޮންނަ ގޮތަށް ރާއްޖޭގައި ހައްޖާއި އުމްރާއަށް ހާއްސަ ގާނޫނެއް އައުމުން އެފަދަ އަމަލުތައް ހިންގާ މީހުންނަށް ހަރުކަށި އަދަބުތައް ގާނުނުގެ ދަށުން ކަނޑައެޅިގެންދާނެ ކަމަށެވެ.
"ހައްޖާއި އުމްރާގެ ކަންތައްތައް މެނޭޖްކުރުމާއި ބެހޭ ގާނޫނު ވަރަށް ގިނަ ގައުމުތަކުގައި އޮވޭ. ރާއްޖޭގައި ވެސް އަޅުގަނޑުމެން އެބަ މަސައްކަތް ކުރަން ގާނޫނެއް ވުޖޫދު ކުރުމަށް. މިކަހަލަ މީހުންނަށް އަދަބު ދެވޭނެ ސީދާ ގޮތެއް ކަނޑައަޅަން އެބަޖެހޭ. އެއީ ވަރަށް މުހިންމު ކަމެއް ގާނޫނެއް އޮތުން،" ޝަހީމް ވިދާޅުވި އެވެ.
މިހާރު އަމަލުކުރަމުންދާ އުމްރާއާ ބެހޭ އުސޫލުގެ ދަށުން ކޮންމެ ކުންފުންޏަކަށް ވެސް އުމްރާއަށް މީހުން ގެންދެވޭއިރު، އެއްވެސް ފައިނޭންޝަލް ގެރެންޓީއެއް ދޭން ނުޖެހެ އެވެ.
އެކަމާ ގުޅޭގޮތުން ޝަހީމް ވިދާޅުވީ އެކުލަވާލާ ގާނޫނުގެ ދަށުން އުމްރާއަށް މީހުން ގެންދަން ފައިނޭންޝަލް ގެރެންޓީއެއް ދޭން ޖެހޭ ގޮތަށް ކަންކަން ބައްޓަން ކުރުމުގެ ވިސްނުން ގެންގުޅުއްވާ ކަމަށެވެ.
"އުމްރާއާ ބެހޭ އުސޫލުތައް ހެދިފައި އޮންނަ ގޮތުން ކޮންމެ ކުންފުންޏަކަށްވެސް ހަމަ މީހުން ގެންދެވޭ ގޮތަށް އޮންނަނީ އެނގޭތޯ ކުރީއްސުރެވެސް. ދެން އޭގައި ފައިނޭންޝަލް ވަކި ގެރެންޓީއެއް އެހެން ބަހައްޓާ އެކަހަލަ ކަމެއް ނޯވޭ. އެކަމަކު އަޅުގަނޑުމެން އެބަ ވިސްނަން މިހާރު މިކަންތައް މިހެން ދިމާވެ ތަކުރާރުވަމުންދާތީވެ ފައިނޭންޝަލް ގެރެންޓީ ބަހައްޓަން ގޮތްތަކެއް ރާވަން،" މިނިސްޓަރު ވިދާޅުވި އެވެ.
ޝަހީމް ވިދާޅުވީ ރާއްޖޭގައި އުމްރާއަށް މީހުން ގެންދާ ރަނގަޅު ގްރޫޕްތައް ވެސް އުޅޭ ކަމަށެވެ. ނަމަވެސް މިނިސްޓްރު ވިދާޅުވީ ރައްޔިތުންގެ އިތުބާރު އޮންނަ ގޮތަށް އެކަން ކުރަން ޖެހޭ ކަމަށެވެ.
މިގޮތުން މުހައްމަދު މުއިއްޒުއާ މަޝްވަރާ ކުރައްވައިގެން ވީހާވެސް އަވަހަށް ހައްޖާއި އުމްރާއާ ބެހޭ ގާނޫނު ވުޖޫދު ކުރުމުގެ މަސައްކަތް ކުރައްވާނެ ކަމަށް ޝަހީމް ވިދާޅުވި އެވެ.
ރާއްޖޭގައި ފަހަކަށް އައިސް ކޮންމެ އަހަރަކު ކަހަލަ ގޮތަކަށް އުމްރާގެ އަޅުކަން އަދާކުރަން ގެންދަނެ ކަމަށް ބުނެ އެކި ގްރޫޕްތަކުން މީހުންނަށް ލަނޑު ދޭ މައްސަލަ އިސްލާމިކް މިނިސްޓްރީން ބަލައި، ފުލުހަށް ވެސް ބައެއް މައްސަލަތައް ހުށަހަޅާފައިވެ އެވެ.
