ސޮކަ ވެޓެރަންސް އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން 12 އަހަރުން ދަށުގެ ކުޅުންތެރިންނަށް ބޭއްވި މައިލޯ އެކެޑަމީ ޗެމްޕިއަންޝިޕްގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަންގެ އެކެޑަމީން ހޯދައިފި އެވެ.
މާޒިޔާ އިން ޗެމްޕިއަންކަން ހޯދީ ފައިނަލުގައި ސުޕަ ޔުނައިޓެޑް ސްޕޯޓްސް (ސަސް) ބަލިކުރުމަށް ފަހު އެވެ.
މި އަހަރުގެ މުބާރާތުގައި ޖުމްލަ، 24 އެކަޑަމީއަކުން 40 ޓީމު ބައިވެރިވެފައިވި އެވެ. އެ ގޮތުން މި ޓީމުތަކުގެ މެދުގައި، ޖުމްލަ 216 މެޗު ކުޅެފައިވާއިރު، އެއީ 40 ޓީމު 10 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެއް ވަނަ ހޯދި ޓީމާއި 10 ގުރޫޕުން ދެ ވަނަ އަށް ދާ ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދާ ހަ ޓީމަށް މުބާރާތުގެ ދެ ވަނަ ބުރުން ފުރުސަތު ދީފައިވެ އެވެ.
މި ފަހަރުގެ އެކެޑަމީ ޗެމްޕިއަންޝިޕްގައި މާލޭގެ އެކެޑަމީތަކުގެ އިތުރުން، ރަށްރަށުގެ އެކެެޑަމީ ޓީމުތައް ވެސް ވަނީ ބައިވެރިވެފަ އެވެ. އޭގެ ތެރޭގައި، ފ. ދަރަނބޫދޫ, އާއި އދ. މަހިބަދޫ، އަދި ލ. ގަމުގެ އެކެޑަތަކުގެ ޓީމުތައް ހިމެނެ އެވެ.
މިއީ، އެކެޑަމީ ޗެމްޕިއަންޝިޕް ކުރިއަށްދިޔަ ތިން ވަނަ ފަހަރެވެ. އެ ގޮތުން، 2022 ވަނަ އަހަރުގެ މުބާރަތުގައި 12 ޓީމަކުން ބައިވެރިވި އެވެ. ޖެހިގެން އައި އަަހަރު، 2023 ވަނަ އަހަރު މި މުބާރާތުގައި 24 ޓީމަކުން ކުޅުނެވެ. އަދި އަހަރުން އަހަރަށް މުބާރާތަށް ލިބެމުން އަންނަ ތަރުހީބު ވަނީ އިތުރުވެފަ އެވެ.
