ގަވާއިދާ ހިލާފަށް އުޅޭ ބިދޭސީން ހޯދުމަށް މިއަދު ހިންގި އޮޕަރޭޝަނެއްގައި 50 މީހަކު ހައްޔަރުކޮށް އިމިގްރޭޝަން ޑިޕާޓްމަންޓާ ހަވާލުކޮށްފައިވާ ކަމަށް ފުލުހުން މިއަދު ބުނެފި އެވެ.
އެ އޮޕަރޭޝަން ފެށި ކަމަށް ފުލުހުން ބުނީ މިއަދު މެންދުރުގެ ވަގުތެއްގަ އެވެ. އަދި މިރޭގެ ނިޔަލަށް 50 މީހަކު ހައްޔަރު ކުރި ކަމަށް ބުންޏެވެ. އެމީހުންނާމެދު އަމަލު ކުރާނެ ގޮތެއް ފުލުހުން ނުބުނެ އެވެ.
ގަވާއިދާ ހިލާފަށް އުޅޭ ބިދޭސީން ހޯދަން މިއަދު އޮޕަރޭޝަން ކުރިއަށް ގެންދިޔައީ ލޯކަލް މާރުކޭޓާއި މާލެ ތެރޭގައި ހިންގާ މާރުކޭޓުތަކާއި ބައެއް އެހެން ސަރަހައްދުތަކުގައި ކަމަށް ފުލުހުން ބުނެ އެވެ.
ގަވާއިދާ ހިލާފަށް އުޅެމުންދާ ބިދޭސީންގެ ހައްޔަރު ކުރުމުގެ އޮޕަރޭޝަނެއް ފުލުހުން ހިންގީ، ގަވާއިދާ ހިލާފަށް އުޅޭ މީހުންގެ ސަބަބުން ގައުމީ ސަލާމަތަށް ނުރައްކާވެދާނެ ކަމަށް ހޯމް މިނިސްޓަރު އަލީ އިހުސާން ބުރާސްފަތި ދުވަހު ވިދާޅުވެފައި އޮއްވަ އެވެ.
ގަވާއިދާ ހިލާފަށް އުޅޭ ބިދޭސީން ހޯދުމަށް ހޯމް މިނިސްޓްރީން ވަނީ މިދިޔަ މެއި މަހު މުޅި ރާއްޖޭގައި ވެސް ބޮޑު އޮޕަރޭޝަނެއް ފަށައިފަ އެވެ. "އޮޕަރޭޝަން ކުރަނގި" ގެ ނަމުގައި ފެށި އެ އޮޕަރޭޝަންގެ ދަށުން މިހާތަނަށް ވަރަށް ގިނަ ބިދޭސީން ވަނީ އިމިގްރޭޝަނާ ހަވާލުކޮށްފަ އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ބޮޑުކަމަށް ސަރުކާރުން ބުނި ނަމަވެސް އެއް ގައުމަކުން އެއް ލައްކައަށްވުރެ ގިނަ ބިދޭސީން ނުގެނެވޭ ގޮތަށް އޮތް އޮތުން އުވާލަން މަސައްކަތް ކުރަމުންދާ ކަމަށް ވެސް ސަރުކާރުން މިދިޔަ ހަފުތާގައި ވަނީ ބުނެފަ އެވެ.
