މާފަންނު ބިސް ބުރު ކައިރީގައި އުޅޭ, އަނިޔާ ލިބިފައިވާ ބުޅަލެއް ހިފައި, ހަވާލުކޮށްދޭ މީހަކަށް 300 ޑޮލަރު ދޭން ހުށަހަޅައިފި އެވެ.
ފޭސްބުކްގައި ހިންގާ މޯލްޑިވިއަން ކެޓަހޮލިކްސް ޕޭޖުގައި ރާއްޖޭގައި ދިރިއުޅޭ, ޕޮލެންޑް އަންހެނަކު ކޮށްފައިވާ ޕޯސްޓެއްގައި ބުނީ, ބިސް ބުރު ކައިރީގައި އުޅޭ މި ބުޅަލުގެ ބޭސް ފަރުވާ ކޮށްދޭން ބޭނުންވާ މީހަކު, ބުޅާ ހިފާ, މިއަދު ހަވާލުކޮށްދޭ މީހަކަށް 300 ޑޮލަރު ދޭން ނިންމާފައިވާ ކަމަށެވެ.
އޭނާ ބުނެފައިވާ ގޮތުގައި އެ ބުޅަލަށް ފަރުވާ ދޭން އިއްޔެ ވެސް މީހަކު މަސައްކަތް ކުރި ކަމަށާއި, ނަމަވެސް އެކަން ކާމިޔާބު ނުވި ކަމަށެވެ. އަދި ބުޅަލަށް ވީ އެންމެ އަވަހަކަށް ފަރުވާ ދޭން ޖެހޭ ކަން އޭނާ ފާހަގަ ކުރި އެވެ.
ބުޅަލަށް ބޮޑެތި އަނިޔަތަކެއް ލިބިފައި ހުރިކަން ޕޯސްޓުގައި އޭނާ ހިއްސާ ކޮށްފައިވާ ފޮޓޯއިން ވެސް ފެންނަން އެބަހުއްޓެވެ.
މިއަދު ބުޅާ ހިފައިދޭ މީހަކަށް 300 ޑޮލަރު ދޭން ހުށަހަޅާފައިވާއިރު, އެއީ 15.40ގެ ރޭޓުން 4621.50 ރުފިޔާ އެވެ.
