ކުށްވެރިންނަށް ފޯނާއި މަސްތުވާތަކެއްޗާއި އެހެނިހެން ސާމާނު ފޯރުކޮށްދެމުން ދިޔަ ކަމުގެ ތުހުމަތު ކުރެވޭ ކަރެކްޝަންސް އޮފިސަރުންތަކެއް ހައްޔަރުކުރަން ބޮޑު އޮޕަރޭޝަނެއް ފަށާފައިވާ ކަމަށް ފުލުހުން ދާދި ދެންމެއަކު ހާމަކޮށްފި އެވެ.
ހޯމް މިނިސްޓަރު އަލީ އިހުސާން ވެސް ބައިވެރިވެވަޑައިގެންނެވާ ނޫސްވެރިންގެ ބައްދަލުވުމެއްގައި ފުލުހުން ބުނި ގޮތުގައި:
- މައްސަލައިގައި ހިމެނެނީ 18 ކަރެކްޝަންސް އޮފިސަރުން
- މިދިޔަ އަހަރު އެކަނި 73.3 މިލިއަން ރުފިޔާ ޖަމާކޮށްފައިވޭ
- އެއް އޮފިސަރުގެ އެކައުންޓެއް އަހަރެއްގެ ތެރޭގައި 24 މިލިއަން ރުފިޔާ ޖަމާކޮށްފައިވޭ
މާފުށީ ޖަލުގައި ކުރިއަށްދާ އޮޕަރޭޝަނާ ގުޅޭ ގޮތުން ފުލުހުން ބުނީ މިހާރު ކުރިއަށްދާ އޮޕަރޭޝަނުގައި ބައެއް ކަރެކްޝަންސް އޮފިސަރުން ހައްޔަރުކޮށްފައިވާ ކަމަށެވެ. އަދި ކުރިއަށް އޮތް ތަނުގައި އޮޕަރޭޝަން ކުރިއަށްދާ ގޮތުގެ ތަފުސީލުތައް ދެމުން ދާނެ ކަމަށް ވެސް ފުލުހުން ބުނެފައިވެ އެވެ.
ފުލުހުން މި އޮޕަރޭޝަން ކުރިއަށް ގެންދިޔައީ މާފުށީ ޖަލަށް މަސްތުވާތަކެއްޗާއި ފޯނު ފޯރުކޮށްދިނުމުގައި ކަރެކްޝަންސް އޮފިސަރުންތަކެއް ބައިވެރިވާ ކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެންނެވެ.
ފުލުހުން ހޯދި ހޯދުމުގައި މިކަމުގައި ޝާމިލުވާ މީހުންގެ އެކައުންޓުތަކަށް ގިނަ އަދަދެއްގެ ފައިސާ ޖަމާކޮށްފައިވާ ކަން ފާހަގަކުރެވުނެވެ. އެގޮތުން މި މައްސަލައިގައި ތުހުމަތުކުރެވޭ 18 ކަރެކްޝަންސް އޮފިސަރުންގެ އެކައުންޓުތަކުގައި މިދިޔަ އަހަރު އެކަނި 73.3 މިލިއަން ރުފިޔާ ދައުރުކޮށްފައިވާ ކަމަށް ފުލުހުން ބުނެފައިވެ އެވެ.
މި ފައިސާ ޖަމާކޮށްފައި ހުރީ ޖަލުގައި ހުކުމް ތަންފީޒުކުރަމުންދާ މީހުންނާއި ޖަލުގައި ހުކުމް ތަންފީޒުކޮށްފައިވާ މީހުންނާއި، ކުށުގެ ވެށީގައި އުޅޭ ކަމަށް ފުލުހުންނަށް ފާހަގަކުރެވިފައިވާ މީހުން ކަމަށް ވެސް ފުލުހުން ބުންޏެވެ.
މި އޮޕަރޭޝަނާ ގުޅޭ ގޮތުން މިނިސްޓަރު އިހުސާން ވިދާޅުވީ، މި މައްސަލައިގެ ތެރެއިން ކަރެކްޝަންސް އޮފިސަރުންނަށް ރިޝްވަތު ދިން މީހުންގެ މައްސަލަތައް ވެސް ބަލައި ގާނޫނު ތަންފީޒުކުރާނެ ކަމަށެވެ.
