ރާއްޖޭގެ ރާޒުވާގެ ލެޖެންޑް ޝަބްނަމް އިބްރާހީމް މަނިކު އުމުރުން 86 އަހަރުގަ އިއްޔެ ނިޔާވެއްޖެ އެވެ.
ޝަބްނަމް އިބްރާހީމް މަނިކަކީ ރާއްޖޭގައި އުފެދުނު އެންމެ މޮޅު ރާޒުވާ ކުޅުންތެރިންގެ ތެރޭގައި ހިމެނޭ ބޭފުޅެކެވެ. އޭނާ ވަނީ ރާއްޖޭގައި ބޭއްވި ރާޒުވާގެ އެކި މުބާރާތްތަކުގައި ވާދަކޮށް ގިނަ ވަނަތަކެއް ހޯދާފަ އެވެ. މީގެ އިތުރުން ރާއްޖޭން ބޭރުގައި ބޭއްވި ގިނަ މުބާރާތްތަކުގައި ވެސް ވަނީ ވާދަކޮށްފަ އެވެ.
ޝަބްނަމް އިބްރާހީމް މަނިކު ރާޒުވާ ކުޅުން ހުއްޓާލިތާ ގިނަ ދުވަސްތަކެއް ވީ ނަމަވެސް އިންޓަނޭޝަނަލް ޗެޝް ފެޑަރޭޝަނުން ނެރޭ ރާއްޖޭގެ ރޭންކިންގެ 11 ވަނައިގައި ގިނަ ދުވަސްތަކެއް ވަންދެން ޝަބްނަމް އިބްރާހީމް މަނިކު ވަނީ ހިމެނިފަ އެވެ.
މީގެ އިތުރުން ޝަބްނަމް އިބްރާހީމް މަނިކު ފާހަގަވެގެންދަނީ, ރާޒުވާ ކުޅެން ކުޑަކުދިން އަދި އާންމުން ނެރެދިނުމަށް ގިނަ ހިދުމަތްތަކެއް ކުރެއްވި ފަރާތެއްގެ ގޮތުގަ އެވެ. އެގޮތުން ރާއްޖޭގެ އެކި ކަންކޮޅުތަކުގައި ރާޒުވާ ޓްރެއިނިންގް ޕްރޮގްރާމްތައް ބާއްވާފައި ވެއެވެ. މީގެ އިތުރުން "ރާޒުވާ ކުޅޭނީ ކިހިނެއް" ނަމުގައި ފޮތެއް ލިޔުއްވާފައިވެ އެވެ.
އިބްރާހިމް ވަނީ ގިނަ އަހަރުތަކެއް ވަންދެން ސަރުކާރަށް ހިދުމަތް ކުރައްވައިފަ އެވެ. އެގޮތުން އަތިރީމާފަންނުގޭ ޓްރޭޑިންގައި މަސައްކަތް ކުރެއްވި އެވެ. އަދި ސަރުކާރު ބޮޑު ސްޓޯރު ނުވަތަ އެމްޖީބީއެސްގައި ވެސް މަސައްކަތް ކުރެއްވި އެވެ. ފަހުން އޮޑިޓް އޮފީހުގެ ވަޒީފާއެއް ވެސް އަދާކުރެއްވި އެވެ.
ޝަބްނަމް އިބްރާހީމް މަނިކު ނިޔާވުމާއެކު, ޗެސް އާއިލާގެ ގިނަ ބަޔަކު އަންނަނީ އޭނާގެ އާއިލާއަށް ތައުޒިޔާ ކިޔަމުންނެވެ. އިބްރާހިމް މަނިކުގެ ޖަނާޒާގައި ކަށު ނަމާދު ކުރެއްވީ ޝެއިހު ހަސަން މޫސާ ފިކުރީ އެވެ.
ޝަބްނަމް އިބްރާހިމް މަނިކު ނިޔާވިއިރު އޭނާގެ 16 ބޭފުޅުން ދުނިޔޭގައި އެބަ ތިއްބެވެ. އެއީ 10 އަންހެން ބޭފުޅުންނާއި ހަ ފިރިހެން ބޭފުޅުންނެވެ. އޭގެ އިތުރުން ކާފަ އަދި މުނިކާފާ ކިޔާ ބޭފުޅުން ވެސް އެބަ ތިއްބެވެ.
