ސްރީ ލަންކާގައި ކުރިއަށްދިޔަ 16 އަހަރުން ދަށުގެ ކިކާސް ޓޯނަމެންޓްގެ އެންމެ މޮޅު ކުޅުންތެރިޔާ އަދި އެންމެ ގިނަ ލަަނޑު ޖެހި ކުޅުންތެރިއާގެ މަގާމު ރާއްޖޭގެ ހުނާން ހަލީމް ހޯދައިފި އެވެ.
ލަންކާގައި ދިރިއުޅެމުން އަންނަ ހުނާން އަންނަނީ އެގައުމުގައި އުމުރުފުރާތަކުގެ މުބާރާތްތައް ވެސް ކުޅެމުންނެވެ. އެ ގޮތުން 20 އަހަރުން ދަށުގެ މުބާރާތްތަކާއި 18 އަހަރުން ދަށުގެ މުބާރާތްތަކުގައި ވެސް ހުނާން އަންނަނީ ކުޅެމުންނެވެ.
"އަދަދު" އާ ވާހަކަ ދައްކަމުން ހުނާން ބުނީ ޓިކާސް މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑު ޖަހި ކުޅުންތެރިޔަކަށް ވުމުން ވަރަށް ހިތްހަމަ ޖެހިފައި ހުރި ކަމަށެވެ. އަދި އުންމީދަކީ ކުރިއަށް ކުޅެން ހުރި މުބާރާތްތަކުން ވެސް ކާމިޔާބު ހޯދުން ކަމަށް ހުނާން ވަނީ ބުނެފަ އެވެ.
"ވަރަށް އުފާވެފަ މިހުރީ ގޯލްޑެން ބޫޓު ލިބުނީމަ. އަބަދުވެސް ޓާގެޓަކީ ގައުމީ ޓީމަށް ކުޅުން. އެހާ ހިސާބަށް ދެވޭތޯ ރަނގަޅަށް ޕްރެކްޓިސްކޮށް މަސައްކަތް ކުރާނަން." ހުނާން ބުންޏެވެ.
ޖޭޓީ ބަންޑާރަ ޗެލެންޖް ޓްރޮފީގެ މެޗެއްގެ ތެރެއިން ހުނާން ބޯޅަ ކޮންޓްރޯލްކުރަނީ
ހުނާންގެ މަންމަ، އައިމިނަތު ޒާހިރާ ފާހަގަކުރި ގޮތުގައި ހުނާން އަކީ ކުޑައިރުން ފެށިގެން ފުޓުބޯޅަ ކުޅެން "މަރު"ދޭ ކުއްޖެކެވެ. އަދި އަހަރަކަށް ވުރެ އަހަރެއް ކުޅުން ރަނގަޅު ކުރަމުން އަންނަ ކަމަށް ހުނާންގެ މަންމަ "އަދަދު" އާ ވާހަކަ ދައްކަމުން ބުނެފައިވެ އެވެ.
ހުނާންގެ ބައްޕަ، މުހައްމަދު ހަލީމް (ބޮޑުޖަޑާ) އަކީ ކުރިން ގައުމީ ފުޓްބޯޅަ ޓީމާއި ކްލަބް ވެލެންސިއާ އަށް ކުޅުނު ލެޖެންޑެކެވެ.
ޖަޑާ ބުނީ, ހުނާންގެ ފަރާތުން ފެންނަނީ އުންމީދީ ކުޅުމެއް ކަމަށެވެ. އަދި އަހަރަކުން އަހަރެއް ކުޅުން ރަނގަޅު ކުރަމުން އައުން މިއީ ލިބޭ ހިތްހަމަ ޖެހުމެއް ކަމަށާއި, ހުނާންގެ ހުވަފެންތައް ހަގީގަތަކަށް ހެދުމަށް ކުރެވެން ހުރި މަސައްކަތްތައް ކުރާނެ ކަމަށެވެ.
"އަޅުގަނޑު ދެން ކުރިން ގައުމީ ޓީމަށް ކުޅުންކަން ހުނާން އަށް އެނގުނު ހިސާބުން ހުނާން, ގައުމީ ޓީމަށް ކުޅެން ޓާގެޓް ކުރި. އެ ފެންވަރު އޭނާގެ ގައިގަ ހުރިކަމަށް ވަންޏާ ގައުމީ ޓީމުގައި ހުނާން ކުޅޭނެ. މިއީ އަޅުގަނޑުވެސް ދެކެން ބޭނުންވާ ދުވަހެއް" ރާއްޖޭގެ ގައުމީ ފުޓްބޯޅަ ޓީމަށް އުމުރުން 17 އަަހަރުގައި ކުޅެފައިވާ ޖަޑާ ބުންޏެވެ.
ހުނާން ވަނީ މީގެ ކުރިން މެންޗެސްޓާ ޔުނައިޓެޑް އެކަޑަމީގައި ހަތަރު އަހަރު ހޭދަކޮށްފަ އެވެ. އަދި ހުނާންގެ ހުނަރު ލަންކާގައި މަސައްކަތްކުރާ ކޯޗުން ފާހަގަކުރާ ކަމަށާއި, އުންމީދަކީ ރާއްޖޭގެ ޖޫނިއާ ސްކޮޑުތަކުން ވެސް ހުނާން އަށް ފުރުސަތު ލިބުން ކަމަށް ޖަޑާ ބުންޏެވެ.
ޖަޑާ ބުނީ, ހުނާން ކުރިއެރުމުގައި އޭނާގެ މަންމަ ކުރަމުން އަންނަ މަސައްކަތް ފާހަގަ ކުރަން ޖެހޭ ކަމަށެވެ. މީގެ އިތުރުން, ރާއްޖޭގެ ގައުމީ ޓީމުގެ ކޯޗު، އަލީ ސުޒެއިން އާއި ކުރިން ގައުމީ ޓީމުގެ ހެޑް ކޯޗުގެ ޒިންމާ ދެ ފަހަރެއްގެ މަތިން ނެގި، އިސްމާއިލް މަހަފޫޒް (އިންމަ) ކޯޗުގެ މަސައްކަތް ފާހަގަ ކުރާ ކަމަށެވެ.
