މި ފަހަރުގެ ޔޫރޯ ފުޓްބޯޅަ މުބާރާތުގައި ވާދަކުރާ ހުރިހާ ގައުމެއްގެ ތެރެއިން މި މުބާރާތް އެންމެ ހާއްސަވާނީ ޖޯޖިއާ އަށެވެ. ޖޯޖިއާގެ ފުޓްބޯޅަ ތާރީހުގައި އެ ޓީމުން ވާދަކުރާ ބައިނަލްއަގުވާމީ ފުރަތަމަ ބޮޑު މުބާރާތަކަށް ވާނީ މި ފަހަރުގެ ޔޫރޯ ފުޓްބޯޅަ މުބާރާތެވެ.
ޖޯޖިއާ އިން މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވީ، ޕްލޭއޮފް ފައިނަލުގައި، 2004 ވަނަ އަހަރުގެ ޔޫރޯ ޗެމްޕިއަންކަން ހޯދި ގްރީސް ބަލިކޮށްފަ އެވެ. ގްރީސްއާ ދެކޮޅަށް ކުޅުނު މެޗުން ޖޯޖިއާ މޮޅުވީ، ޕެނަލްޓީ ޖަހައިގެން، 4-2 އިންނެވެ.
ޔޫރޯ އަށް ކޮލިފައިވުމާ އެކު، ޖޯޖިއާ އަށް ވަނީ ފީފާ ރޭންކިންގައި ވެސް ކުރިއެރުން ލިބިފަ އެވެ. އެ ޓީމު މި ވަގުތު އޮތީ ދުނިޔޭގެ 75 ވަނައިގަ އެވެ.
މި ފަހަރުގެ ޔޫރޯ ކޮލިފައިންގައި، ޖޯޖިއާ ވާދަކުރީ، ކޮލިފައިން ގްރޫޕް ބީގަ އެެވެ. އެ ޓީމަށް އެ ގްރޫޕުން ލިބުނީ، ހަތަރު ވަނަ އެވެ. އެއީ، ސްޕެއިނާއި ސްކޮޓްލެންޑް އަދި ނޯވޭގެ ފަހަތުންނެވެ. ޖޯޖިއާ، އަށް ޔޫރޯ ކޮލިފައިން ޕްލޭއޮފުން ފުރުސަތު ލިބުނީ، ޔުއެފާ ނޭޝަންސް ލީގުގެ ތެރެއިންނެވެ. ޕްލޭއޮފް ފުރަތަމަ މެޗުން ލަގްޒެމްބާގް އަތުން މޮޅުވިއިރު، ފައިނަލުގައި، ގްރީސް ބަލިކުރީ އެވެ.
ޖޯޖިއާގެ ކޯޗުކަމާ ހަވާލުވެހުރީ، ފްރާންސްގެ ކުރީގެ ފުލްބެކް، ވިލީ ސަންޔޯލް އެވެ. ބަޔާން މިއުނިކްގެ އެސިސްޓަންޓް ކޯޗަކަށް، ކާލޯ އަންޗެލޮޓީއާ އެކު މަސައްކަތްކުރި ސަންޔޯލް، ޖޯޖިއާއާ ހަވާލުވީ، 2021 ވަނަ އަހަރު ފެބްރުއަރީ މަހު އެވެ. މަގާމާ ހަވާލުވިތާ ތިން އަހަރު ތެރޭ ސަންޔޯލް ވަނީ އެ ޓީމަށް ބޮޑު މުބާރާތަކުން ފުރުސަތު ހޯދައިދީފަ އެެވެ.
ޔޫރަޕްގެ އެންމެ ބޮޑު ފުޓްބޯޅަ މުބާރާތަށް ޖޯޖިއާ ނުކުންނައިރު، އެ ޓީމުގެ ތަރި އަކީ، އިޓަލީގެ ނަޕޯލީގައި ވިދަމުން އަންނަ، ކްވިޗާ ކްވްރަޝްކޭލިއާ އެވެ. މީގެ އިތުރުން، ޖޯޖިއާ ޓީމުގައި ޔޫރަޕް ލީގުތަކުގައި ކުޅޭ ގިނަ ކުޅުންތެރިން ހިމެނެ އެވެ.
ޖޯޖިއާ އޮތީ، ތުރުކީ، ޗެކް ރިބަޕްލިކް އަދި ޕޯޗުގަލްއާ އެއް ގްރޫޕެއްގަ އެވެ.
