ޓިބްލިޒީ، ޖޯޖިއާ (ޖޫން 28) - ބައިނަލްއަގުވާމީ ފުޓްބޯޅަ މުބާރާތެއްގައި މުޅިން އަލަށް ވާދަކުރާ ޖޯޖިއާ އިން މި ފަހަރުގެ ޔޫރޯގެ ގަދަ 16 އަށް ދަތުރުކުރުމުން އެ ގައުމުގެ ކުރީގެ ބޮޑުވަޒީރު އަދި ވިޔަފާރިވެރިޔާ، ބިޑްޒީނާ އިވަނީޝްވިލީ މުޅި ޓީމަށް 10 މިލިއަން ޑޮލަރުގެ ފައިސާގެ އިނާމެއް ދީފި އެވެ.
ޖޯޖިއާގެ ޑްރީމް ޑިމޮކްރަޓިކް ޕާޓީގެ ފައުންޑަރު، އިވަނީޝްވިލީ ފާހަގަކުރައްވާ ގޮތުގައި، ޕޯޗުގަލް ބަލިކޮށް، ޖޯޖިއާ އިން ޔޫރޯގެ ގަދަ 16 އަށް ދިއުމަކީ އެ ގައުމުގެ ތާރީހުގައި ވަރަށް ހާއްސަ ކަމެކެވެ. އެ ގޮތުން، 2012 ވަނަ އަހަރު ޖޯޖިއާގެ ބޮޑުވަޒީރަކަށް އިންތިހާބުވި، އިވަނީޝްވިލީ ވިދާޅުވީ، އެ ފަދަ ކަމެއް ހާސިލްކުރާ ބައެއްގެ އަގުވަޒަންކުރަން ޖެހޭނެ ކަމަށެވެ.
އިވަނީޝްވިލީ ވަނީ މުޅި ސްކޮޑަށް 10 މިލިއަން ޑޮލަރު (ޖޯޖިއާގެ ފައިސާ ލާރީ އިން ނަމަ 30 މިލިއަން) ހަދިޔާކޮށްފަ އެވެ. އަދި ޔޫރޯގެ ގަދަ 16 ގައި ޖޯޖިއާ އިން ސްޕެއިން އަތުން މޮޅުވެއްޖެނަމަ އިތުރު، 10 މިލިއަން ޑޮަލަރު ހަދިޔާކުރާނެ ކަމަށް ވެސް ވައުދުވި އެވެ.
ޖޯޖިއާ އަށް އުފަން އިވަނީޝްވިލީ އަކީ ރަޝިއާގައި ވިޔަފާރި ފަށައި ފުޅާކޮށް، މި ވަގުތު ފޯބްސް އިން ހޮވާ މުއްސަނދިއްގެ ތެރޭގައި ހިމެނޭ ފަރާތެކެވެ. އިންވެސްޓްމަންޓް ބޭންކިން އާއި މެޓަލް އާއި ކޮމްޕިއުޓަރު ވިޔަފާރި ކުރާ އިވަނީޝްވިލީގެ މިލްކިއްޔާތުގައި، ފަސް ބިލިއަން ޑޮލަރު އެބަހުއްޓެވެ. އަހަރެއްހާ ދުވަހު، ބޮޑު ވަޒީރުގެ މަގާމު ފުރުއްވިޔަސް އިވަނީޝްވިލީ އަކީ އެ ގައުމުގައި އަދިވެސް ނުފޫޒުގަދަ ފަރާތެކެވެ.
މި ފަހަރުގެ ޔޫރޯގައި ޖޯޖިއާ ކުޅުނު ފުރަތަމަ މެޗުން ތުރުކީ އަތުން 3-1 އިން ބަލިވިއިރު، ދެ ވަނަ މެޗުގައި ޗެކް ރިޕަބްލިކްއާ 1-1 އިން އެއްވަަރުވި އެވެ. އަދި ތިން ވަނަ މެޗުގައި، ޕޯޗުގަލް އަތުން ޖޯޖިއާ މޮޅުވީ 2-0 އިންނެވެ.
ގަދަ 16 އިން ޖޯޖިއާ ފުރުސަތު ހޯދީ ވާދަކުރި ގްރޫޕްގެ ތިން ވަނައިގައި ނިންމައި، މުޅި މުބާރާތުގެ ހުރިހާ ގްރޫޕެއްގެ ތިން ވަނަ ޓީމުތަކުގެ ރޭންކިންގެ ތެރެއިން ދެ ވަނަ ހޯދައިގެންނެވެ. މުޅި މުބާރާތުގައި ހިމެނޭ ހަ ގްރޫޕްގެ ތިން ވަނަ ޓީމުތަކުގެ ތެރެއިން ހަތަރު ޓީމަކަށް، ގަދަ 16 އިން ފުރުސަތު ދޭނެ އެވެ.
