ގެލްސެންކާޗެން (ޖޫން 27) - ޔޫރޯ ފުޓްބޯޅަ މުބާރާތުގައި ޖޯޖިއާ އަތުން 2-0 އިން ޕޯޗުގަލް ބަލިވީ، ޖޯޖިއާ އަކީ އާދައިގެ ޓީމެއްގެ ގޮތުގައި ވިސްނައިގެން މެޗަށް ނުކުތުމުން ނޫން ކަމަށާއި ކެޕްޓަން ކްރިސްޓިއާނޯ ރޮނާލްޑޯ ބަދަލުކުރުމަކީ ކުރިން ވެސް ޕްލޭން ކުރެވިފައި އޮތް ކަމެއް ކަމަށް ޕޯޗުގަލް ކޯޗު މާޓީނޭޒް ބުނެފި އެވެ.
ރޭގެ މެޗަށް ނުކުތްއިރު ވެސް ޕޯޗުގަލް އަށް އޮތީ ގްރޫޕްގެ އެއް ވަނައިގެ ގޮތުގައި އަނެއް ބުރު ޔަގީންވެފަ އެވެ. އެހެންވެ، އެ ޓީމުން ރޭގެ މެޗަށް ނުކުތީ ގިނަ ބަދަލުތަކެއް ގެނެސްގެންނެވެ. އެ ގޮތަށް ފެށިއިރު، ޖޯޖިއާ އިން ދެ ވަނަ މިނިޓްގައި، ކްވިޗާ ކްރަވަޝްކޭލިއާގެ ގޯލުން ލީޑުނަަގައި، ދެ ވަނަ ހާފުގައި ޖޯޖެސް މިކައުޓްޒޭ ޖެހި ޕެނަލްޓީން 2-0 ޕޯޗުގަލް ބަލިކުރީ އެވެ.
މާޓީނޭޒް ބުނީ، ކުޅުމަށް ބަލާއިރު ޖޯޖިއާ އަށް މޮޅެއް ހައްގުކަމަށާއި އެ އަށް ދެބަހެއްނުވެވޭނެ ކަމަށެވެ.
"އަހަރެމެން ބަލިވީ ޖޯޖިއާ އަކީ ދަށް ޓީމެއްގެ ގޮތުގައި ދެކިގެނެއް ނޫން. ތެދެއް، ދެން އޮތް ހަގީގަތަކީ ޖޯޖިއާ ކުޅުނީ އެ ގައުމުގެ ފުޓްބޯޅަ ތާރީހުގައި އެންމެ ބޮޑު މެޗު، ޖޯޖިއާ އިން ބޭނުންވި ގޮތަށް އެ މީހުންނަށް ފުރަތަަމަ ގޯލު ޖެހުނު، އަހަރެމެންނަށް ގޯލު ޖަހާނެ ފުރުސަތު ބޭނުންނުކުރެވިގެން އުޅެނިކޮށް، ޖޯޖިއާ އިން ލަނޑު ޖަހައި މެޗުން މޮޅުވާން ހައްގު ހިތްވަރު ދެއްކި،" 2022 ވަނަ އަހަރުގެ ފީފާ ވޯލްޑް ކަޕަށް ފަހު ރަސްމީ މެޗަކުން ފުރަތަމަ ފަހަރަށް ޕޯޗުގަލް ބަލިވި މެޗަށް ފަހު، މާޓީނޭޒް ބުންޏެވެ.
މުޅިން އަލަށް ބައިނަލްއަގުވާމީ ފުޓްބޯޅަ މުބާރާތެއްގައި ވާދަކުރި ޖޯޖިއާ އަތުން ބަލިވުމަކީ، ޕޯޗުގަލް އިން އެ އަށް މާ ބޮޑަށް ފިކުރުކޮށް ހަލާކުވާނެ ކަމެއް ނޫން ކަމަށް މާޓީނޭޒް ބުންޏެވެ. އަދި ރޭގެ މެޗުގައި ރޮނާލްޑޯ ދެ ވަނަ ހާފު ފެށުނުތަނާހެން ބަދަލުކުރީ، ގަދަ 16 ބުރަށް ވިސްނާފައި ކުރިން ވެސް ޕްލޭން ކުރެވިފައި އޮތް ގޮތަށް ކަަމަށް މާޓީނޭޒް ވަނީ ބުނެފަ އެވެ.
ރޮނާލްޑޯގެ ހިތްހަމަނުޖެހުންތަކެއް އެ ބަދަލާ އެކު ފެނިގެންދިޔަ އެވެ. ފުރަތަމަ ހާފުގައި ޕެނަލްޓީއެއް ނުދީގެން، ރޮނާލްޑޯ ކުރި ޝަކުވާއާ ހެދި، އޭނާ އަށް ރެފްރީ ވަނީ ރީނދޫ ކާޑެއް ވެސް ދައްކައިފަ އެވެ. މާޓީނޭޒް ބުނީ، ވީޑިއޯ އެސިސްޓަންޓް ރެފްރީ (ވީއޭއާރް)ގެ ބޭނުން ރަނގަޅަށް ހިފިނަަމަ ޕޯޗުގަލް އަށް ޕެނަލްޓީއެއް ދޭނެ ކަމަށެވެ.
ރޮނާލްޑޯ، 39، ގެ ކެރިއަރުގައި ފުރަތަމަ ފަހަރަށް ބޮޑު މުބާރާތެއްގެ ގްރޫޕް ސްޓޭޖު ނިންމާލާފައި މި ވަނީ ލަނޑެއް ނުޖެހި އެވެ.
ގަދަ 16 ބުރުގައި ޕޯޗުގަލް ނުކުންނާނީ، ސްލޮވީނިއާއާ ދެކޮޅަށެވެ.
