ޓިބްލިސީ، ޖޯޖިއާ (ޖުލައި 4) - ބައިނަލްއަގުވާމީ ބޮޑު މުބާރާތެއްގައި ޖޯޖިއާ އިން އަލަށް ވާދަކޮށްފައިވަނީ މި ފަހަރުގެ ޔޫރޯ ފުޓްބޯޅަ މުބާރާތުގަ އެވެ. އެ މުބާރާތުގެ ގަދަ 16 ބުރުގައި ވާދަކޮށް، އެނބުރި ގައުމަށް ދިއުމުން ޖޯޖިއާ ޓީމަށް ޝަރަފްވެރި މަރުހަބާއެއް ވަނީ ކިޔައިފައިވާއިރު، އެ އިވެންޓްގައި ބައިވެރިވެ، ޖޯޖިއާގެ ބޮޑު ވަޒީރު، އިރާކްލީ ކޮބަކިޑްޒޭ ދެއްވީ ފުޓްބޯޅަ އަށް އަހައްމިއްޔަތުކަން ދެއްވާނެ ކަމުގެ ޔަގީންކަމެވެ.
"މި ޓީމާ މެދު އަހަރެމެން ވަރަށް ފަހުރުވެރިވޭ. ވަރަށް ބޮޑު ކާމިޔާބެއް މިއީ ފުރަތަމަ ފަހަރަށް ވާދަކޮށް މި ހޯދީ، ދެން ވިސްނަންވީ އިތުރަށް ކުރިއަށްދާން ކުރިއަށް ވުރެ ބޮޑު އަހައްމިއްޔަތުކަމެއް ސަރުކާރުން ދޭނަން،" ކޮބަކިޑްޒޭ ވިދާޅުވި އެވެ.
"ކުރިއަށް އޮތް އަހަރުތަކުގައި ޖޯޖިއާ ފުޓްބޯޅަ ޓީމު ކުޅޭނީ އެ ގައުމުގައި އަޅާ ސުޕަ މޮޑާން ސްޓޭޑިއަމެއްގައި،"
މި ފަހަރުގެ ޔޫރޯގައި ޖޯޖިއާ ކުޅުނު ފުރަތަމަ މެޗުން، ތުރުކީ އަތުން 3-1 އިން ބަލިވި އެވެ. ދެ ވަނަ މެޗުގައި، ޗެކް ރިޕަބްލިކާ ދެކޮޅަށް ޖޯޖިއާ އިން ލީޑުނެގި ނަމަވެސް އެ މެޗު ނިމުނީ 1-1 އިން އެއްވަރުވެގެންނެވެ. ތިން ވަނަ މެޗުގައި، ޖޯޖިއާ އިން ވަނީ 2-0 އިން ޕޯޗުގަލް ބަލިކޮށް އެންމެން ސިއްސުވާލައިފަ އެވެ.
ޕޯޗުގަލް މެޗަށް އިޝާރާތްކުރައްވައި، ޖޯޖިއާގެ ރައީސް، ސަލޯމް ޒައުރަބިޗްވިލީ ވިދާޅުވީ، ޕޯޗުގަލް އަތުން މޮޅުވެ، މި ހޯދި ކާމިޔާބީ އަކީ "މިރަކްލް" އެއް ކަމަށެވެ. އަދި ގަދަ 16 ޓީމުގެ ބުރުގައި ޖޯޖިއާ އިން ސްޕެއިން ވެސް ހާސްކޮށްލައި، އެ ދެއްކި ހިތްވަރަކީ ގިނަ ބަޔަކު އިބްރަތް ހާސިލްކޮށް ކުރިއަށްދާން ހިތްވަރު ހޯދާނެ ކަމެއް ކަމަށް ޒައުރަބިޗްވިލީ ވިދާޅުވި އެވެ.
ޖޯޖިއާ ޓީމު އެނބުރި އައުމުން، ޓިބްލިސީގެ ފްރީޑަމް ސްކޮޔާގައި ބޭއްވި ހާއްސަ އިވެންޓްގެ ތެރެއިން.
ޖޯޖިއާގެ ކޯޗުކަމާ ހަވާލުވެ ހުރީ، ފްރާންސް ގައުމީ ޓީމުގެ ކުރީގެ ފުލްބެކް، ވިލީ ސަންޔޯލް އެވެ. އޭނާ ބުނީ، އެ ޓީމާ ހަވާލުވިތާ މި ވީ ތިން އަހަރާއި ބައި މުއްދަތުގެ ތެރޭގައި ވަރަށް ޗެލެންޖިން ގިނަ ކަންތައްތަކެއް ތަހައްމަލުކުރަން ޖެހުނު ކަމަށެވެ. އަދި އެ ހުރިހާ ކަމެއްގެ ތެރޭގައި ވެސް ކުޅުންތެރިން ބުރަ މަަސައްކަތްކޮށް، ކުރިއަށްދާން އަޒުމު ކަނޑައަޅައި، އެ ދެއްކި ހިތްވަރު ޔޫރޯގައި ވެސް ފެނިގެންދިޔަ ކަމަށް، ސަންޔޯލް ފާހަގަކުރި އެވެ.
"ކުރިއަށްދާނީ ހިތްވަރާ އެކު، ކޮންމެ ކަމެއް ވިޔަސް، ކޮންމެ ކަމެއް ކޮންމެ ގޮތަކަށް އޮތަސް، ޖޯޖިއާ ފުޓްބޯޅަ ކުރިއަށްދާނެ،" ސަންޔޯލް ބުންޏެވެ.
ޖޯޖިއާ ޓީމު، ޔޫރޯ އަށް ފަހު ޖަރުމަނުން އެނބުރި އައުމުން، ޓިބްލިސީގެ ފްރީޑަމް ސްކޮޔާގައި ބޭއްވި ހާއްސަ އިވެންޓްގައި ގިނަ އަދަދެއްގެ ރައްޔިތުން ބައިވެރިވި އެވެ. މިއީ ފަހުގެ ތާރީހެއްގައި ޖޯޖިއާގައި އެންމެ ގިނަ ބަޔަކު އެއްތަނަކަށް އިވެންޓަކަށް އެއްވި ފަހަރެވެ.
ޔޫރޯ އިން ޖޯޖިއާ ކެޓީ ސްޕެއިން އަތުން ގަދަ 16 ބުރުގައި 4-1 އިން ބަލިވުމުންނެވެ.
ޖޯޖިއާގެ ކެޕްޓަން، ގޫރަމް ކަޝިއާ ބުނީ، ޔޫރޯގައި ޖޯޖިއާ އިން ކުޅުނު ހުރިހާ މެޗެއްގައި ވެސް އެންމެ އަޑުގަދައީ އެ ޓީމުގެ ސަޕޯޓަރުންގެ ކަމަށެެވެ. އަދި ކޮންމެ މެޗެއްގައި ވެސް ޖޯޖިއާ އިން އެންމެ ފަހު ވަގުތާ ހަމައަށް ހިތްވަރުކޮށް ނަތީޖާ ނެރެން މަސައްކަތް ކުރުމުގައި ސަޕޯޓަރުންގެ ދައުރު ވަރަށް ބޮޑު ކަމަށް ކަޝިއާ ފާހަގަކުރި އެވެ.
ޖޯޖިއާ އިން މި ފަހަރުގެ ޔޫރޯގެ ގަދަ 16 އަށް ދަތުރުކުރުމުން އެ ގައުމުގެ ކުރީގެ ބޮޑުވަޒީރު އަދި ވިޔަފާރިވެރިޔާ، ބިޑްޒީނާ އިވަނީޝްވިލީ ވަނީ މުޅި ޓީމަށް 10 މިލިއަން ޑޮލަރުގެ ފައިސާގެ އިނާމެއް ދީފަ އެވެ.
