ސްލޮވީނިއާ އަކީ މި ފަހަރުގެ ޔޫރޯ ފުޓްބޯޅަ މުބާރާތަށް އެންމެ ފަހުން ކޮލިފައިވި ގައުމުތަކުގެ ތެރެއިން އެއް ގައުމެވެ. ސްލޮވީނިއާ އިން ޔޫރޯ ފުޓްބޯޅަ މުބާރާތުގައި މި ވާދަކުރަނީ، 24 އަހަރު ތެރޭ ފުރަތަމަ ފަހަރަށެެވެ. ޔޫރޯ އެއްގައި މިހާތަނަށް ސްލޮވީނިއާ ވާދަކުރި ހަމައެކަނި ފަަހަރަކީ، 2000 ވަނަ އަހަރު ބެލްޖިއަމާއި ނެދަލެންޑްސް އިން ހޯސްޓް ކުރި މުބާރާތުގަ އެވެ.
ފީފާ ވޯލްޑް ކަޕްގައި ވެސް ދެ ފަަހަރެއްގެ މަތިން ކުޅެފައިވާ ސްލޮވީނިއާ އިން ޔޫރޯގައި ކުޅުނު ހަމައެކަނި ފަަހަރު މުބާރާތް ނިންމާލަން ޖެހުނީ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅެއް ނުލިބި އެވެ. ސްޕެއިން އަތުން ސްލޮވީނިއާ 2-1 އިން ބަލިވިއިރު، ޔޫގޯސްލާވިއާއާ 3-3 އިން އެއްވަރުކޮށް، ނޯވޭއާ ލަނޑެއް ނުޖެހި ވީ އެއްވަރެވެ.
ސްލޮވީނިއާ އިން އަހަރުތަކަކަށް ފަހު ޔޫރޯ ފުޓްބޯޅަ މުބާރާތަށް މި ފަހަރު ކޮލިފައިވިއިރު، އެ ޓީމު ދިޔައީ ކޮލިފައިން ގްރޫޕްގެ ދެ ވަނަ އެވެ. އެ ގްރޫޕުން އެއް ވަނަ ހޯދި ޑެންމާކާއި ސްލޮވީނިއާއާ ލިބުނީ 22 ޕޮއިންޓެވެ. ޑެންމާކަށް ކުރި ލިބުނީ ހެޑް ޓު ހެޑް ގަވާއިދަށް ބަލައިގެންނެވެ.
ސްލޮވީނިއާގެ ކޯޗަކީ، 2018 ވަނަ އަހަރުން ފެށިގެން އެ ޓީމާ އެކު މަސައްކަތްކުރަމުން އަންނަ، މަޓްޖަޒް ކެކް އެވެ. ސްލޮވީނިއާ ގައުމީ ޓީމަށް އެއް މެޗު ކުޅެދީފައިވާ ކެކް އަކީ އެ ގައުމުގެ ފުޓްބޯޅަ އަށް ފަރިތަ ނަމެކެވެ. އޭނާ އެ ޓީމު ގޮވައިގެން ކުރަމުން އަންނަ ރަނގަޅު މަސައްކަތުގެ ހިތްވަރަކީ ވެސް އެއީ އެެވެ.
މި ފަހަރުގެ ޔޫރޯގައި ސްލޮވީނިއާ ހިމެނެނީ، ކޮލިފައިންގައި ވެސް އެ ޓީމާ އެކު އޮތް ޑެންމާކްގެ އިތުރުން، ސާބިއާ އާއި އިންގްލެންޑާ އެކުގަ އެެވެ.
ސްލޮވީނިއާގެ ތަރިންނަށް ބަލާއިރު، ލައިޕްޒިގުގެ ފޯވާޑް، ބެންޖަމިން ސެސްކޯ އާއި އެތުލެޓިކޯ ކީޕަރު ޔެން އޮބްލަކް ފާހަގަކުރަން ޖެހެ އެވެ.
