މި ފަަހަރުގެ ޔޫރޯ ފުޓްބޯޅަ މުބާރާތަށް ޕްލޭއޮފް ޖާގައިގެ ތެރެއިން ކޮލިފައިވި ތިން ޓީމުގެ ތެރެއިން އެއް ޓީމަކީ، ޔޫކްރެއިން އެވެ. ޕްލޭއޮފް ފުރަތަމަ ބުރުގައި ބޮސްނިއާ ބަލިކުރުމަށް ފަހު، ޔޫކްރެއިން އިން ވަނީ ޕްލޭއޮފް ފައިނަލުގައި، އައިސްލެންޑް ކަޓުވާލައިފަ އެވެ.
މިއީ ޔޫކްރެއިން އިން ޖެހިޖެހިގެން ޔޫރޯގައި ކުޅޭ ހަތަރު ވަނަ ފަހަރެެވެ. ޔޫކްރެއިނުން ފުރަތަމަ ޔޫރޯގައި ކުޅުނީ 2012 ވަނަ އަހަރު އެވެ. އެ ފަހަރު މުބާޜާތް ހޯސްޓްކުރީ ޔޫކްރެއިނާއި ޕޮލެންޑުން ގުޅިގެންނެވެ. އެ ފަހަރުގެ ޔޫރޯ އާއި 2016 ވަނަ އަހަރުގެ ޔޫރޯގައި ޔޫކްރެއިން ކެޓީ، ގްރޫޕް ސްޓޭޖުންނެވެ.
އެކަމަކު، އެންމެ ފަހުން ބޭއްވި ޔޫރޯގައި ޔޫކްރެއިން ވަނީ ކުއާޓާ ފައިނަލުގައި ވާދަކޮށްފަ އެވެ. އެންމެ ފަހުން ބޭއްވި ޔޫރޯގައި ޔޫކްރެއިން ނޮކައުޓް ބުރަށް ކޮލިފައިވީ، އެންމެ ރަނގަޅު ނަތީޖާ ނެރޭ ތިން ވަނަ އަށް ދިޔަ ޓީމުތަކުގެ ތެރެއިންނެވެ. ގަދަ 16 ބުރުގައި، ސްވިޑެން އަތުން ޔޫކްރެއިން މޮޅުވި އެވެ. އެކަމަކު، ކުއާޓާ ފައިނަލުގައި އިންގްލެންޑް އަތުން ބަލިވެ ކެޓީ އެވެ.
ރަޝިއާ އިން ޔޫކްރެއިން އަށް އަރައި، ކުރަށް ފެށި ހަނގުރާމައާ ހެދި، މިިދިޔަ ދޮޅު އަހަރެއްހާ ދުވަހު، ޔޫކްރެއިންގެ ހޯމް މެޗުތައް ކުޅެން ޖެހުނީ އެކި ދަނޑުތަކުގަ އެވެ. އެކަމަކު، އެ ޓީމުން ރަނގަޅަށް ޓީމެއްގެ ގޮތުގައި މަސައްކަތްކޮށް، މި ވަނީ ޔޫރޯ އިން އަނެއްކާ ވެސް ފުރުސަތު ހޯދައިފަ އެވެ.
ޔޫކްރެއިންގެ ކޯޗަކަށް ހުރީ އެ ގައުމުގެ ކުރީގެ ފޯވާޑް، ސާހޭއި ރެބްރޯވް އެވެ. މިދިޔަ އަހަރުގެ ޖޫން މަހު، ޔޫކްރެއިން ޓީމާ ހަވާލުވެ، މިދިޔަ ނުވަ ވަރަކަށް މަސް ދުވަހު، އޭނާ ވަނީ ރަނގަޅު މަސައްކަތްތަކެއް ކޮށްފަ އެވެ.
މިފަހަރުގެ ޔޫރޯގައި އެންމެ ހިތްވަރުގަދަ ކުޅުމެއް ފެންނާނެ އެއް ޓީމަކީ ޔޫކްރެއިން ކަމަށް ގިނަ ބަޔަކު ބުނެ އެވެ. ޔޫކްރެއިން ޓީމުން ފާހަގަކޮށްލެވޭ ކުޅުންތެރިންނަށް ބަލާއިރު، ރެއާލް މެޑްރިޑްގެ ކީޕަރު އަންޑްރީ ލުނިން އާއި ޗެލްސީގެ މިހައިލޯ މުޑްރިކް ހިމެނެ އެވެ.
