ރުމޭނިއާ އިން އެ ގައުމުގެ ފުޓްބޯޅަ ތާރީހުގައި ހަ ވަނަ ފަހަރަށް ޔޫރޯ ފުޓްބޯޅަ މުބާރާތުގައި ވާދަކުރަން ތައްޔާރުވާއިރު، މީގެ ކުރިން އެ ޓީމުން ވަނީ، އެއް ފަހަރު ކުއާޓާ ފައިނަލުގައި ކުޅެފަ އެެވެ. އަނެއް ހަތަރު ފަހަރު ކެޓީ ގްރޫޕް ސްޓޭޖުންނެވެ.
އެންމެ ފަހުން، ރުމޭނިއާ އިން ޔޫރޯގައި ވާދަކުރީ 2016 ވަނަ އަހަރު ފްރާންސްގައި ބޭއްވި މުބާރާތުގަ އެވެ. އެ ފަހަރު ދެ މެޗުން ބަލިވިއިރު، އެއް މެޗު ވަނީ އެއްވަރުވެފަ އެވެ.
މި ފަހަރުގެ ޔޫރޯ ފުޓްބޯޅަ މުބާރާތަށް ރުމޭނިއާ ކޮލިފައިވީ، ކޮލިފައިން ގްރޫޕް އައިގެ އެއް ވަނަ ޓީމުގެ ގޮތުގަ އެވެ. ކޮލިފައިން ބުރުގައި 10 މެޗު ކުޅުނުއިރު ރުމޭނިއާ ބަލިވެފައިނުވެ އެވެ. ހަ މެޗުން މޮޅުވިއިރު، ހަަތަރު މެޗުން ވަނީ އެއްވަރުވެފަ އެވެ. ރުމޭނިއާ އިން ކޮލިފައިން ބުރުގައި 16 ލަނޑު ޖެހިއިރު، ބައިކޮޅަށް ވަނީ ފަަސް ގޯލެވެ. ކޮލިފައިން ބުރުގައި އެންމެ ޑިފެންސް ރަނގަޅު ޓީމުތަކުގެ ތެރޭގައި ރުމޭނިއާ ހިމެނެ އެވެ.
ރުމޭނިއާގެ ކޯޗަކަށް ހުރީ މީގެ ކުރިން، އެ ގައުމުގެ ކްލަބްތަކަށް ކުޅެ، ކޯޗުކަން ކޮށްދީފައިވާ، އެޑްވާޑް އިއޮޑަނެސްކޫ އެވެ. އިއޮޑަނެސްކޫ، ރުމޭނިއާ ޓީމާ ހަވާލުވެފައިވަނީ، 2022 ވަނަ އަހަރުގެ ޖެނުއަރީ މަހުގަ އެވެ. މިދިޔަ އަހަރު، ރުމޭނިއާގެ އެންމެ މޮޅު ކޯޗުގެ މަގާމު ހޯދި އިއޮޑަނެސްކޫ، ރުމޭނިއާ ގައުމީ ޓީމާ ހަވާލުވި ފަހުން، އެ ޓީމުގެ ކުޅުމުގެ ސްޓައިލް ވަނީ ވަރަށް ބޮޑުތަން ރަނގަޅުވެފަ އެވެ.
މި ފަހަރުގެ ޔޫރޯގައި ރުމޭނިއާ ހިމެނޭ ގްރޫޕަށް ބަލާއިރު، އެ ޓީމަށް އެންމެ އުނދަގޫ ޗެލެންޖަކަށްވާނެ ކަމަށް ބެލެވޭ ޓީމަކީ، ބެލްޖިއަމް ކަމުގައި ވިޔަސް ދެން އޮތް، ސްލޮވާކިއާ އާއި ޔޫކްރެއިން ވެސް ރުމޭނިއާ އަށް ރަނގަޅު ފައިޓެއް ދޭނެ އެވެ.
ރުމޭނިއާ ޓީމުން މި ފަހަރު ފާހަގަކޮށްލެވޭނެ ތަރިންނަށް ބަލާއިރު، އަލަވޭސްގެ އިއަނިސް ހާޖީ އާއި ޓޮޓެންހަމް ހޮޓްސްޕާސްގެ ޑިފެންޑަރު، ރަޑޫ ޑްރަގޫސިން އަދި ސައުދީ އަރަބިއްޔާގެ ޑަމާކް އަށް ކުޅޭ ނިކޮލައެ ސްޓަންކޫ ހިމެނެ އެވެ.
