ސްވިޒަލެންޑުން ވަނީ މީގެ ކުރިން ފަސް ފަހަރު ޔޫރޯ ފުޓްބޯޅަ މުބާރާތުގައި ވާދަކޮށްފަ އެވެ. އެ ޓީމު އެންމެ ފުރަތަމަ 1996 ވަނަ އަހަރު ޔޫރޯ ފުޓްބޯޅަ މުބާރާތެއްގައި ވާދަކުރިއިރު، އޭގެ ފަހުން ބޭއްވި ޔޫރޯގެ ހަ މުބާރާތުގެ ތެރެއިން ހަތަރު މުބާރާތުގައި އެ ޓީމުން ވާދަކުރި އެވެ. އެއީ، 2004، 2008، 2016 އަދި 2020 އެވެ.
އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގައި، ކުއާޓާ ފައިނަލުގައި ސްވިޒަލެންޑް ވާދަކުރި އެވެ. އެ ގޮތުން، ކުއާޓާ ފައިނަލުގައި އެ ޓީމު ބަލިވީ ޕެނަލްޓީ ޖަހައިގެން ސްޕެއިން އަތުންނެވެ. ނޮކައުޓަށް ސްވިޒަލެންޑް ކޮލިފައިވީ، އެންމެ ރަނގަޅު ނަތީޖާ ނެރުނު ތިން ވަނަ އަށް ދިޔަ ޓީމުތަކުގެ ތެރޭގައި ހިމެނިގެންނެވެ. ގަދަ 16 ބުރުގައި ސްވިޒަލެންޑުން، ވަނީ ޕެނަލްޓީ ޖަހައިގެން ފްރާންސް ކަޓުވާލައިފަ އެވެ.
ސްވިޒަލެންޑް މި ފަހަރުގެ ޔޫރޯ އަށް ކޮލިފައިވެފައި މި ވަނީ، ކޮލިފައިން ގްރޫޕް އައިގެ ރަނަރަޕްގެ ގޮތުގަ އެވެ. ސްވިޒަލެންޑަށް ގްރޫޕްގެ އެއް ވަނަ ނުލިބުނު އެންމެ ބޮޑު ސަބަބަކީ، ކޮލިފައިންގެ ފަސް މެޗުން އެއްވަރުވުމުންނެވެ. އެ ޓީމު ބަލިވީ އެއް މެޗުންނެވެ. މޮޅުވީ، ހަތަރު މެޗުންނެވެ. އެ ގްރޫޕްގެ އެއް ވަނަ ހޯދީ ބަލިނުވެ ކޮލިފައިވި، ރުމޭނިއާ އެވެ.
ސްވިޒަލެންޑްގެ ކޯޗަކަށް ހުރި މުރާތު ޔަކިން، އެ ޓީމާ ހަވާލުވީ 2021 ވަނަ އަހަރު އެވެ. ކުރިން ސްވިޒަލެންޑް ގައުމީ ޓީމަށް ކުޅެފައިވާ މުރާތު އެ ޓީމާ ހަވާލުވި ފަހުން، އެ ޓީމުން އަންނަނީ އެކަށީގެންވާ ބޮޑު ކުރިއެރުންތަކެއް ހޯދަމުންނެވެ.
އާންމު ގޮތެއްގައި ބައިނަލްއަގުވާމީ މުބާރާތްތަކުގައި ސްވިޒަލެންޑަކީ ހިތްވަރުގަދަކޮށް ފެންނަ ޓީމެކެވެ. އެ ޓީމުގައި ތަފާތު ދައްކާ ކުޅުންތެރިންނަށް ބަލާއިރު، ޖަރުމަނުގެ ބަޔާ ލެވަކޫސަނަށް ކުޅޭ ގްރަނިޓް ޝަކާ އާއި އިންޓަ މިލާންގެ ކީޕަރު ޔެން ސޮމާގެ އިތުުރުން، އެމެރިކާ ލީގުގައި މި ވަގުތު ކުޅެމުން އަންނަ، ޒެރްޑަން ޝަގީރީ ހިމެނެ އެވެ.
ޖަރުމަނާ އެކު، ގްރޫޕް އޭ އިން ނޮކައުޓަށް ދާނެ ކަމަށް ބެލެވޭ އެއް ޓީމަކީ ސްވިޒަލެންޑް އެވެ.
