ޑަސެލްޑޯފް (ޖުލައި 6) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި މިރޭ ސްވިޒަލެންޑާ ދެކޮޅަށް ކުޅޭ މެޗަކީ އިންގްލެންޑް ޓީމުގެ ކޯޗުގެ މަގާމުގައި ގަރެތު ސައުތުގޭޓްގެ 100 ވަނަ މެޗު ކަމުގައި ވިޔަސް އެ ކަމާ މާ ބޮޑު ސަމާލުމަމެއް ނެތް ކަމަށް އޭނާ ބުނެފި އެވެ.
އިންގްލެންޑްގެ ކޯޗަކަށް އަށް ވަނަ އަހަރު މަސައްކަތް ކުރަމުން އަންނަ ސައުތުގޭޓަށް މަގާމުގައި ދެމިހުންނަން އެންމެ ޕްރެޝަރު ބޮޑު މުބާރާތަކީ މި ފަހަރުގެ ޔޫރޯ އެވެ.
"ތިއީ (އިންގްލެންޑަށް އަހަރެން ކޯޗުކޮށްދޭ 100 ވަނަ މެޗަށް) މި މެޗަށް ނުކުންނައިރު އަހަންނަށް އެންމެ ކުޑަކޮށް ސަމާލުކަން ދެވޭނެ ސްޓެޓިސްޓިކްސް، އަހަރެންގެ ކަމަކަށް ވުރެ ކުރިމަތީގައި މި އޮތް، ޗެލެންޖް މާ މުހިންމު،" ސައުތުގޭޓް ބުންޏެވެ.
ސްވިޒަލެންޑާ ދެކޮޅަށް މިރޭ އިންގްލެންޑުން ނުކުންނައިރު، އެ ޓީމުގެ ޑިފެންޑަރު، މާކް ގޭހީ ވަނީ ސަސްޕެންޑްވެފަ އެވެ. ރިޕޯޓްތައް ބުނާގޮތުން ސައުތުގޭޓްގެ ނިންމުމަކީ، ތިން ޑިފެންޑަރުން ލައިގެން ކުޅޭ ސިސްޓަމަށް ބަދަލުކުރުމެވެ. ސައުތުގޭޓް އިންގްލެންޑަށް ކޯޗުކޮށްދިން ތިން ބައި ކުޅަ އެއް ބައި މެޗުގައި ކުޅެފައިވަނީ އެ ފޯމޭޝަނަަށެވެ.
އިންގްލެންޑުން ފައިނަލަށް ދާނަމަ މި މެޗުން ސްވިޒަލެންޑް ބަލިކޮށް، ސެމީގައި ބައްދަލުކުރަން ޖެހޭނީ ތުރުކީ އާއި ނެދަލެންޑްސް ތެރެއިން ޓީމަކާ އެވެ. ސައުތުގޭޓް ބުނީ މި ވަގުުތަށް ބަލާއިރު، އޭނާ އަށް ވާހަކަ ދެއްކެން އޮތީ އެންމެ މެޗެއްގެ ކަމަށާއި އެއީ ކުއާޓާ ފައިނަލުގައި ސްވިޒަލެންޑާ ދެކޮޅަށް އޮތް ކުރިމަތިލުމާ ބެހޭގޮތުން ކަމަށެވެ.
"ވަރަށް ވަރުގަދަ ފުޓްބޯޅައިގެ ގައުމަކާ މި ކުޅެނީ. އެ މީހުން (ސްވިޒަލެންޑް) މި ހިސާބަށް އައިސް އެ ތިބީ ވަރަށް ފަހުރުވެރިކަމާ އެކު މޮޅު ކުޅުމެއް ދައްކައިގެން،" ސައުތުގޭޓް ބުންޏެވެ.
އިންގްލެންޑް ގައުމީ ޓީމަށް ކުރިން ކުޅުނު ސައުތުގޭޓް ބުނީ، އެ ގައުމުގެ ފުޓްބޯޅަ ތާރީހަށް ބަލާއިރު ކުޅެފައިވަނީ ދެ ފައިނަލް ކަމަށާއި ސެމީ ފައިނަލަށް ދަތުރުކުރީ ތިން ފަހަރު ކަމަށްވާއިރު، ކޮންމެ މުބާރާތެއްގައި ވެސް އެ ހިސާބަށް ދާން ކުރަން ޖެހޭ މަސައްކަތާއި ކުރިމަތިލާން ޖެހޭ ޗެލެންޖްތައް ގިނަ ކަމަށެވެ.
"އަހަރެމެންނަށް ކާމިޔާބު ލިބިފައި އޮތް މިންވަރާ ބެހޭގޮތުން މީހުން ދެކޭ ދެކުން އެއީ އަހަރެމެން ވިސްނަން ޖެހޭ ކަމެއް ކަމުގައި ނުދެކެން. އަަހަރެެމެންގެ ކިބައިގައި ނަތީޖާ ނެރެން ފެންވަރު ހުރިކަން ސާބިތުކޮށްދޭންވީ،" ސައުތުގޭޓް ބުންޏެވެ.
އިންގްލެންޑުން ވަނީ އެންމެ ފަހުން ކުޅުނު ބައިނަލްއަގުވާމީ ހަތަރު މުބާރާތުގައި ވެސް އެންމެ ކުޑަމިނުން ކުއާޓާ ފައިނަލަށް ދަތުރުކޮށްފަ އެވެ. މިއީ އެ ގައުމުން ސައުތުގޭޓްގެ ކޯޗުކަމުގައި ހާސިލްކުރި ތާރީހީ ކާމިޔާބެކެވެ.
މިއީ ބައިނަލްއަގުވާމީ ބޮޑު މުބާރާތެއްގައި އިންގްލެންޑާއި ސްވިޒަލެންޑްގެ ހަތަރު ވަނަ ކުރިމަތިލުމެވެ. އިންގްލެންޑް އަދި މުބާރާތެއްގައި ސްވިޒަލެންޑް އަތުން ބަލިނުވެ އެވެ. އެ ގޮތުން، މީގެ ކުރިން، ކުޅުނު މެޗުތަކަށް ބަލާއިރު، 1954 ވަނަ އަހަރުގެ ވޯލްޑް ކަޕްގައި އިންގްލެންޑުން 2-0 އިން މޮޅުވިއިރު، 2004 ވަނަ އަހަރުގެ ޔޫރޯގައި އިންގްލެންޑް މޮޅުވީ 3-0 އިންނެވެ. އަދި 1996 ވަނަ އަހަރުގެ ޔޫރޯގައި 1-1 އިން އެއްވަރުވި އެވެ.
އިންގްލެންޑާއި ސްވިޒަލެންޑް ކުޅޭ މެޗު ފަށާނީ މިރޭ 9 ޖަހާއިރު އެވެ.
