ޑަސެލްޑޯފް (ޖުލައި 6) - ޕެނަލްޓީގައި 5-3 އިން ސްވިޒަލެންޑް ބަލިކޮށް، އިންގްލެންޑުން ޔޫރޯ ފުޓްބޯޅަ މުބާރާތުގެ ސެމީ ފައިނަލުން ޖާގަ ހޯދައިފި އެވެ.
އެންމެ ފަހުގެ ޔޫރޯގެ ފައިނަލުން ޕެނަލްޓީ ޖަހައިގެން ބަލިވި އިންގްލެންޑުން މި ފަހަރުގެ ޔޫރޯގެ ސެމީ އަށް ޕެނަލްޓީގައި ދަތުރުކުރީ، މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފު ނިމުނުއިރު، 1-1 އިން އެއްވަރުވެގެންނެވެ. އިންގްލެންޑުން ވަނީ ޕެނަލްޓީގައި ފޮނުވާލި ފަސް ޕެނަލްޓީ ވެސް ވައްދާލައިފަ އެވެ.
ސެމީ ފައިނަލުގައި އިންގްލެންޑުން ކުޅޭނީ ކުއާޓާ ފައިނަލުގައި ނެދަލެންޑްސް އާއި ތުރުކީ ކުޅެގެން މޮޅުވާ ޓީމަކާ އެވެ.
މެޗު ފަށައިގެން ދެ ޓީމުން ވެސް މަސައްކަތް ކުރަމުން ދިޔައީ މެދުތެރެއިން ކޮންޓްރޯލް ނަގައިގެން ކުޅެ، ފުރުސަތު ތަަނަވަސްކުރާށެވެ. އެހެން ނަމަވެސް ދެ ޓީމުގެ ޑިފެންސް ލައިން ރަނގަޅަށް މަސައްކަތްކުރުމުން، ކީޕަރު ޓެސްޓްކޮށްލެވޭ ވަރުގެ ހަމަލާއެއް ފޮނުވާލެވޭ ގޮތެއްނުވެ އެވެ.
އިންގްލެންޑް ޓީމުގެ މައިނޯ (ކ) ސްވިޒަލެންޑް ޝަކާ އާއި ވާގަސް ކައިރިން ބޯޅަ ފޮނުވާލަނީ
އިނގިރޭސި ޓީމުގެ މެދުތެރޭގައި ކުޅެމުންދިޔަ، ދެ ކުޅުންތެރިން ކަމަށްވާ، ކޯބީ މައިނޫ އާއި ޖޫޑް ބެލިންހަމް ބޯޅަ ހިފައިގެން އެޓޭކަށް އަރައި، ގޯލު ޖަހަން ފުރުސަތު ހޯދޭތޯ ބަލަމުންދިޔަ އެެވެ. މައިނޫ ޖެހި ބޯޅައެއް ބްލޮކްވިއިރު، ފިލް ފޯޑެން ޖެހި ޝޮޓެއް ދިޔައީ ގޯލާ ސީދާނުވެ އެވެ.
އަނެއްކޮޅުން، ސްވިޒަލެންޑްގެ އެންމެ ކުރިއަށް ކުޅެމުންދިޔަ، ބްރީލް އެމްބޯލޯ އަށް ލިބޭ ބޯޅަތަކުގައި، އޭނާ ހުއްޓުވަން، އިނގިރޭސި ޑިފެންޑަރު، އެޒްރީ ކޮންސާ ދިޔައީ ރަނގަޅު މަސައްކަތްތަކެއް ކުރަމުންނެވެ.
ދެ ވަނަ ހާފު ފަށައިގެން ސްވިޒަލެންޑުން ވަރަށް ބޮޑަށް ކުރިއަށް ޖެހިގެން ކުޅެމުންދިޔައިރު، މެޗުގެ 65 ވަނަ މިނިޓްގައި އިންގްލެންޑްގެ ހާފުގެ ތެރެއިން އެ ޓީމުގެ ޑިފެންޑަރުންނަށް ސަލާމަތްނުކުރެވުނު ބޯޅައެއް ހޯދައި، ސްވިޒަލެންޑްގެ މިޝެލް އޭބިޝާ ޖެހި ބޯޅަ ދިޔައީ ހުރަސްދަނޑިމަތިންނެވެ.
ސްވިޒަލެންޑްގެ ބްރީލް އެމްބޯލޯ ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އޭއެފްޕީ
ސްވިޒަލެންޑުން މި ހާފުގައި ދައްކަމުންދިޔަ ރަނގަޅު ކުޅުމުގެ ނަތީޖާ ރަނގަޅެވެ. އެ ޓީމުން ވަނީ މެޗުގެ 75 ވަނަ މިނިޓްގައި ލަނޑު ޖަހައި ލީޑުނެގި އެވެ. މިއީ އޭރިއާތެރެއިން، ޑޭން އެންޑޯއި ނެގި ހުރަހަކަށް އަރައި، އެމްބޯލޯ ގޯލު ކުރިމަތިން ޖެހި ގޯލެކެވެ.
އިންގްލެންޑުން ބަދަލުތަކެއް ގެނެސް ކުޅުން އަވަސްކޮށް، ކުރި ފުރަތަމަ އެޓޭކުގައި ލަނޑު ޖަހައި އެއްވަރުކުރި އެވެ. މި ލަނޑު ޖެހީ ބުކާޔޯ ސަކާ އެވެ. އަރިމަތިން ސަކާ އަށް ލިބުނު ބޯޅަ ހިފައިގެން، އޭރިއާ ރޮނގުކައިރިން ކުރިއަށް ޖެހިލައިފައި ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު އެއްވަރުވެފައި އޮތުމުން، ނަތީޖާ ނެރެން ވަނީ އިތުރު ވަގުުތުގެ ދެ ހާފް ކުޅެފަ އެވެ. މި ފަހަރުގެ ޔޫރޯގެ ކުއާޓާ ފައިނަލުގައި ކުޅުނު ފުރަތަމަ ތިން މެޗުގައި ވެސް އިތުރު ވަގުތުގެ ދެ ހާފް ކުޅެން ޖެހުނެވެ.
އިތުރު ވަގުުތުގެ ފުރަތަމަ ހާފު ފެށިގެން ހަަތަރު ވަނަ މިނިޓްގައި، އޭރިއާބޭރުން އިންގްލެންޑްގެ ޑެކްލަން ރައިސް ޖެހި ބޯޅަ ސްވިޒަލެންޑް ކީޕަރު، ޔެން ސޮމާ ވަނީ މަތަކޮށްފަ އެވެ. އޭގެ ފަހުން، އޭރިއާތެރެެއިން ޖާގައެއް ހޯދައި، ބެލިންހަމް ޖެހި ބޯޅަ ވެސް ސޮމާ ވަނީ އަތަށް ނަގައިފަ އެވެ.
ދެ ޓީމަށް ވެސ އިތުރު ވަގުތުގެ ދެ ހާފްގެ ކުޅުން ނިމުނުއިރު، ލަނޑެއް ނުހުމުން، ނަތީޖާ ނެރެން މި މެޗުގައި ޖެހުނީ ޕެނަލްޓީ ޖަހާށެވެ.
ސްވިޒަލެންޑްގެ ޝަކާ (ކ) އިންގްލެންޑްގެ ކޭން ކައިރިން ބޯޅަ ހިފައިގެން ދެވޭތޯ މަސައްކަތްކުރަނީ.--- ފޮޓޯ: އޭއެފްޕީ
ޕެނަލްޓީގައި އިންްގްލެންޑްގެ ފުރަތަމަ ޕެނަލްޓީ ކޯލް ޕާމާ ވަނީ ކާމިޔާބުކޮށްފަ އެވެ. ސްވިޒަލެންޑްގެ ފުރަތަމަ ޕެނަލްޓީ މެނުއަލް އަކަންޖީ ފޮނުވާލި ބޯޅަ އިނގިރޭސި ކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ. އިންގްލެންޑްގެ ދެ ވަނަ ޕެނަލްޓީ ބެލިންހަމް ވަނީ ގޯލަށް ފޮނުވާލައިފަ އެވެ. ސްވިޒަލެންޑްގެ ދެ ވަނަ ޕެނަލްޓީ ފަބިއަން ޝެއާ ވަނީ ގޯލަށް ވައްދާލައިފަ އެވެ.
އިންގްލެންޑްގެ ތިން ވަނަ ޕެނަލްޓީ ސަކާ ކާމިޔާބުކުރިއިރު، ސްވިޒަލެންޑްގެ ތިން ވަނަ ޕެނަލްޓީ ޒެރްޑަން ޝަގީރީ ވަނީ ގޯލަށް ފޮނުވާލައިފަ އެވެ. އިންގްލެންޑްގެ ހަތަރު ވަނަ ޕެނަލްޓީ، އައިވަން ޓޯނީ ކާމިޔާބުކުރިއިރު، ސްވިޒަލެންޑްގެ ހަތަރު ވަނަ ޕެނަލްޓީ ޒެކީ އަމްދޫނީ ވަނީ ކާމިޔާބުކޮށްފަ އެވެ.
އިންގްލެންޑްގެ ޓްރެންޓް އަލެކްސަންޑަ އާނޯލްޑް (ކ) އެ ޓީމުގެ ފަސް ވަނަ ޕެނަލްޓީ ކާމިޔާބުކޮށް ކީޕަރު ޕިކްފޯޑާ އެކު އުފާފާޅުކުރަނީ.
އިންގްލެންޑްގެ ފަސް ވަނަ ޕެނަލްޓީ ޓްރެންޓް އަލެކްސަންޑަ އާނޯލްޑް ކާމިޔާބުކޮށް އިންގްލެންޑް ސެމީ ފައިނަލަށް ގެންގޮސްދިނީ އެވެ.
މިއީ، އިންގްލެންޑްގެ ކޯޗު، ގަރެތު ސައުތުގޭޓް އެ ޓީމަށް ކޯޗުކޮށްދިން 100 ވަނަ މެޗެވެ. އޭނާ ވަނީ އެ ޓީމަށް 61 މޮޅު ހޯދައިދީފަ އެވެ. ތޭވިސް މެޗުން އެއްވަރުވިއިރު، 16 މެޗުން ވަނީ ބަލިވެފަ އެވެ.
ސްވިޒަލެންޑް މި ވަނީ ޖެހިޖެހިގެން ދެ ޔޫރޯގެ ކުއާޓާ ފައިނަލުން ކަޓައިފަ އެވެ.
