ޒިއުރިކް (ޖުލައި 16) - ސްވިޒަލެންޑް ގައުމީ ޓީމަށް ބައިނަލްއަގުވާމީ މުބާރާތްތަކުގައި ތަފާތު ދައްކާފައިވާ ހުނަރުވެރި ފޯވާޑް، ޒެރްޑަން ޝަކީރީ ގައުމީ ޓީމުން ރިޓަޔާކޮށްފި އެވެ.
ޝަކީރީ، 32، ވަނީ މި ފަހަރު ޖަރުމަނުގައި ކުރިއަށްދިޔަ ޔޫރޯ ފުޓްބޯޅަ މުބާރާތުގައި ވެސް ކުޅެފަ އެވެ. މި ފަހަރުގެ ޔޫރޯގައި ޝަކީރީ ގިނަ މެޗުތަކުގައި ކުޅެފައިވަނީ ބަދަލު ކުޅުންތެރިއެއްގެ ގޮތުގަ އެވެ. ސްވިޒަލެންޑުން ކުއާޓާ ފައިނަލްގައި އިންގްލެންޑާ ބައްދަލުުކުރި މެޗުގައި ލަނޑެއް ޖެހުމާ ވެސް ޝަކީރީ ވަނީ ގާތަށް ޖެހިލައިފަ އެވެ.
މި ފަހަރުގެ ޔޫރޯގައި ސްކޮޓްލެންޑާއި ސްވިޒަލެންޑް އެއްވަރުވި މެޗުގައި، ގޯލު ޖެހި ޝަކީރީ ވަނީ ސްވިޒަލެންޑްގެ ގައުމީ ޓީމުގައި ހޭދަކުރި 14 އަހަރު ތެރޭ ބައިނަލްއަގުވާމީ ހަތް މުބާރާތް އެ ޓީމަށް ކުޅެދީފަ އެވެ. އޭގެއިން ކޮންމެ މުބާރާތެއްގައި ވެސް އޭނާ ވަނީ ތަފާތު ދައްކައިފަ އެވެ.
އެ ގޮތުން، އެންމެ ފަހުން، ތިން ވޯލްޑް ކަޕާއި ތިން ޔޫރޯގައި ލަނޑު ޖެހި ހަމައެކަނި ކުޅުންތެރިއަކީ ޝަކީރީ އެވެ.
ސްވިޒަލެންޑަށް ޝަކީރީ ފުރަތަމަ ފަހަރަށް މެޗެއް ކުޅެދިނީ 2010 ވަނަ އަހަރުގެ މާޗް މަހު އުރުގުއޭއާ އެކު، އެކުވެރިކަމުގެ މެޗެކެވެ. ރިޓަޔާކުރުމާ ހަމައަށް ޝަކީރީ ގައުމީ ޓީމަށް ކުޅެދީފައިވަނީ، 125 މެޗެެވެ. އެ މެޗުތަކުގައި އޭނާ ވަނީ 32 ލަނޑު ޖަހައިފަ އެވެ.
ޝަކީރީ މި ވަގުތު ކްލަބް ފުޓްބޯޅަ ކުޅެމުން އަންނަނީ އެމެރިކާ ލީގުގެ ޝިކާގޯ ފަޔާ އަށެވެ.
