ގްރީން ޒޯނުގައި ހުރި ސައިކަލުތަކެއްގައި ރޯކޮށްލި ކަމަށް ތުހުމަތު ކުރެވޭ މީހާ ފުލުހުން ހައްޔަރުކޮށްފި އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނީ ހައްޔަރުކުރީ 36 އަހަރުގެ ދިވެހި ފިރިހެނެއް ކަމަށެވެ. އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް މިއަދު ހާޒިރު ކުރުމުން 30 ދުވަސް ޖަހައިދީފައިވާ ކަމަށް ވެސް ފުލުހުން ބުންޏެވެ.
ހޮޓެލް ޖެން ކައިރީގައި ހުންނަ ޕާކިން ޒޯނުގައި ހުރި ސައިކަލުތަކުގަ ހޯމަ ދުވަހުގެ ދަންވަރު ރޯކޮށްލި މައްސަލައާ ގުޅިގެން އަންގާރަ ދުވަހު ފުލުހުން ބުނީ އެކަން ކުރި މީހާ ދެނެގަނެވި، އެމީހާ ހައްޔަރު ކުރުމުގެ މަސައްކަތް ކުރަމުންދާ ކަމަށެވެ.
ނަމަވެސް މައްސަލައާ ގުޅިގެން ފުލުހުން ހައްޔަރުކުރީ އެ ދުވަހު ހައްޔަރުކުރަން މަސައްކަތް ކުރި މީހާ ކަމެއް ނުވަތަ އެހެން މީހެއް ކަމެއް ސާފެއް ނުވެ އެވެ.
ރައްޔިތުންގެ މަޖިލީހުގެ ކުރިމަތީގައި އޮންނަ ޕާކިން ޒޯނުގައި ހުރި ހަތް ސައިކަލަކާއި ވޭނެއްގައި ރޯވި އެވެ. އަދި ތިން ސައިކަލެއް ބޭނުން ނުކުރެވޭ ވަރަށް ވަނީ ހަލާކުވެފަ އެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
ރޯކޮށްލި ސައިކަލުތައް ހުރި ސަރަހައްދުގައި ރައްޔިތުންގެ މަޖިލީހުގެ އިތުރުން ރައީސުލްޖުމްހޫރިއްޔާގެ އޮފީހާއި ސައުދީ އަރަބިއްޔާގެ އެމްބަސީ ހުރެ އެވެ. އޭގެ އިތުރުން ހޮޓެލް ޖެންގައި ވެސް އެމްބަސީއެއް ހިންގަ އެވެ. އަދި އެ ސަރަހައްދުގައި ވަރަށް ގިނަ ކެމެރާތައް ވެސް ހަރުކޮށްފައި ހުރެ އެވެ.
