ނިމިދިޔަ މެއި މަހު ވެސް އެންމެ ގިނައިން ފުލުހުންނަށް ރިޕޯޓުކޮށްފައިވަނީ ވައްކަމުގެ މައްސަލަތައް ކަމަށް އެ އިދާރާއިން މިއަދު ބުނެފި އެވެ.
ކޮންްމެ މަހެއް ނިމުމުން ފުލުހުންް އާންމުކުރާ ތާފާސްހިސާބުގެ މެއި މަހުގެ ނަންބަރުތަކަށް ބަލާއިރު ޖުމްލަ 795 މައްސަލައެއް ވަނީ ރިޕޯޓުކޮށްފަ އެވެ. އޭގެ ތެރޭގައި ވައްކަމުގެ 244 މައްސަލައެއް ހިމެނެ އެވެ. އޭޕްރީލް މަހު ރިޕޯޓުކުރީ ވައްކަމުގެ 285 މައްސަލަ އެވެ.
އޭގެ އިތުރުން އެންމެ ގިނައިން މެއި މަހު ރިޕޯޓު ކުރީ މަގުމަތީގެ އެކްސިޑެންޓުތަކުގެ މައްސަލަތަކެވެ. މިދިޔަ މަހު 169 މައްސަލައެއް ރިޕޯޓުކޮށްފައިވެ އެވެ. އޭޕްރީލް މަހުގެ ތެރޭގައި އެކްސިޑެންޓުގެ 219 މައްސަލައެއް ރިޕޯޓުކޮށްފައިވެ އެވެ.
މިދިޔަ މަހު މަސްތުވާތަކެތީގެ 88 މައްސަލައެއް ހުށަހެޅި އިރު އޭޕްރީލް މަހު މަސްތުވާތަކެތީގެ 116 މައްސަލައެއް ބަލައިފައި ވާކަމަށް ފުލުހުންގެ ތަފާސް ހިސާބުތަކުން ދައްކަ އެވެ.
މެއި މަހު ފުލުހުންނަށް ރިޕޯޓުކޮށްފައިވާ އެހެން މައްސަލަތަކުގެ ތެރޭގައި ގެއްލޭތަކެތީގެ 78 މައްސަލަ، މުދަލަށް ގެއްލުން ދިނުމުގެ 45 މައްސަލަ، ފޭރުމުގެ 36 މައްސަލަ، މާރާމާރީގެ 30 މައްސަލަ އަދި މަކަރާއި ހީލަތުގެ 25 މައްސަލައިގެ އިތުރުން ގެވެށި އަނިޔާގެ 18 މައްސަލަ ހިމެނެ އެވެ.
ތަފާސްހިސާބުތަކުން ދައްކާ ގޮތުގައި ބަދުއަހުލާގީ އަމަލުގެ 13 މައްސަލައަކާއި، ފޯޖަރީގެ 12 މައްސަލަ އަދި ޗެކް ބައުންސްވުމުގެ އެއް މައްސަލަ މިދިޔަ މަހު ފުލުހުންނަށް ރިޕޯޓުކުރި އެވެ.
