ސަރުކާރުގެ ހުރިހާ ސްކޫލެއްގެ ކްލާސް ރޫމްތަކުގައި އޭސީ ހަރުކުރުމުގެ މަޝްރޫއު "ކޫލް ސްކޫލް" އާއިއެކު ދަރިވަރުންގެ އުޅުމަށް ބަދަލު އައިސް، ބުލީ ކުރުން ފަދަ ވިޔާނުދާ އަމަލުތަކާއި ދުރުވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
މާފުށީ ސްކޫލްގައި މިއަދު ބޭއްވި ހާއްސަ ރަސްމިއްޔާތެއްގައި "ކޫލް ސްކޫލް" މަޝްރޫއު އިފުތިތާހު ކޮށްދެއްވައި ވާހަކަދައްކަވަމުން މިނިސްޓަރު ޝަފީއު ވިދާޅުވީ، މި މަޝްރޫއުއާއެކު ކޫލް ވެށްޓަކީ އުފާވެރި ހިތްހަމަޖެހޭ ވެށްޓަކަށް ބަދަލުވެ، ދަރިވަރުންގެ ސުލޫކާއި އުޅުމަށް ހެޔޮ ބަދަލުތަކެއް އަންނާނެކަމަށެވެ. އަދި ކޫލް ސްކޫލެއްގައި ބުލީ ކުރުން ނޯންނާނެ ކަން ފާހަގަކުރެއްވި އެވެ.
"ކޫލް ސްކޫލެއްގަ ހިތަށް ފިނިކަން އަންނާނެ، އުފާވެރިކަން އިހުސާސްވާނެ، ފިނިކަމާއެކުގަ ދަރިވަރުންގެ ސުލޫކާ އުޅުމަށް ހެޔތޮ ބަދަލުތަކެއް އަންނާނެ. ވިޔާނުދާ ކަންތައްތަކުން ދަރިވަރުން ދުރުހެލިވާނެ، ބުލީއެއް ނުކުރާނެ، ރުޅިވެރިކަމެއް މިފަދަ މާހައުލެއްގަ ނޯންނާނެ،" މިނިސްޓަރު ވިދާޅުވި އެވެ.
އެގޮތުން ސްކޫލްތަކުގައި އޭސީ ހަރުކުރުމުގެ މަޝްރޫއުއެއް ފެށުމުގެ އެންމެ ބޮޑު އެއް ބޭނުމަކީ ކާމިޔާބު ދަރިވަރެއް އުފެއްދުމަށް ބޭނުންވާ ހުރިހާ ވަސީލަތެއް ދަރިވަރުންނަށް ފަހި ކޮށްދިނުން ކަމަށް ވެސް މިނިސްޓަރު ޝަފީއު ވިދާޅުވި އެވެ.
"ކާމިޔާބު އިންސާނެއް އުފެއްދުމަށް ލިބެންޖެހޭ ހުރިހާ ތަޢުލީމަކާއި ތަރުބަވީ ކަންތައްތަކެއް ފުރިހަމަވެފައިވާ ވެށްޓަކަށް ސްކޫލް ވެށި ވެގެންދިޔުމަކީ އަޅުގަނޑުމެންގެ އަމާޒު. އަދި މިފަދަ ޕްރޮޖެކްޓެއް ފެށުމުގެ ބޭނުމަކީވެސް އެއީ،" މިނިސްޓަރު ވިދާޅުވި އެވެ.
މަޝްރޫއުގެ ހަރަދާއި ގުޅެގޮތުން މިނިސްޓަރު ވިދާޅުވީ، ތައު؛ީމަށް ކުރާ ހޭދައަކީ ގެއްލިގެންދާނެ އެއްޗެއްކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ގަބޫލުނުކުރައްވާ ކަމަށެވެ. އަދި ތައުލީމަށް ވުރެ މުހިއްމުކަމެއް އެމަނިކުފާނަށް ނެތް ކަމަށެވެ.
ސަރުކާރުން ހިންގާ މި މަޝްރޫއުގެ ދަށުން އޭސީތަކަށް ދޭ ކަރަންޓުގެ 30 ޕަސެންޓު ކަރަންޓަކީ ސޯލާ ޕެނަލް ފަދަ ރިނިއުބަލް އެނާޖީ ބޭނުންކޮށްގެން އުފައްދާ ކަރަންޓަށް ހެދުމަށް ރައީސް މުއިއްޒު އިރުޝާދުދެއްވާފައިވާ ކަމަށް މިއަދުވެސް މިނިސްޓަރު ވިދާޅުވި އެވެ. އަދި، އެ މަޝްރޫއު ދަށުން ކުރިއަށް މިއޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ސަރުކާރު ސްކޫލުތަކެއް އޭސީ ކުރެވޭނެ ކަމަށްވެސް މިއަދު ވަޒީރު ވިދާޅުވި އެވެ.
ހޫނު ގަދަ ކްލާސްތައް އޭސީ ކުރުމަށް އެންމެ ފުރަތަމަ ރައީސް އެންގެވީ ފެބްރުއަރީ 27، ގައި ހދ. މަކުނުދޫއަށް ވަޑައިގަނެ ވާހަކަދައްކަވަމުންނެވެ.
އޭގެ ފަހުން ޖަމާލުއްދީން ސްކޫލުގެ ކްލާސް ރޫމްތަކަށް ހޫނުގަދަވާތީ ފަންކާ ބަހައްޓަން ބެލެނިވެރިންގެ އެހީއަށް އެދުނު މައްސަލަ ބޮޑުވެ، ސަރުކާރުގެ ހުރިހާ ސްކޫލެއްގެ ކްލާސް ރޫމްތަކުގައި "ކޮމިއުނިޓީގެ އެހީތެރިކަމާއެކު" އޭސީ ހަރުކުރަން އެޑިއުކޭޝަން މިނިސްޓްރީއިން ނިންމީ މިމަހު 13 ގަ އެވެ.
މި މަޝްރޫއުގެ ދަށުން އޭސީ ހަރުކުރުމަށް 600 މިލިއަން ރުފިޔާ އަދި އެއަށްފަހު އޭސީތައް ބެލެހެއްޓުމާއި ބިލުތަކަށް އަހަރެއްގެ މައްޗަށް 178.5 މިލިއަން ރުފިޔާ ހޭދަވާނެ ކަމަށް މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ޗާންސެލަރު އަދި ފަންނީ ތަޖުރިބާކާރު ޑރ. ހަސަން ހަމީދު ލަފާކުރެ އެވެ.
