ދޮޅުމަހުގެ ޗުއްޓީއަކަށްފަހު ދިރާސީ އާ އަހަރުގެ ކިޔެވުން މިއަދު ފަށައިފި އެވެ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަދަދު އަށް ވިދާޅުވީ ދިރާސީ އައު އަހަރު ކިޔަވަން ފަށާއިރު ކިޔަވައިދިނުމަށް ތައްޔާރުވެ، ސްކޫލްތަކުގެ ހުރިހާ މަސައްކަތްތަކެއް ފުރިހަމަކޮށްފައިވާ ކަމަށެވެ.
އެގޮތުން، ކިޔެވުން މިއަދު ފަށަނީ ދަރިވަރުންނަށް ބޭނުންވާ ފޮތްތައް ފޮނުވައި، ޓީޗަރުން ވެސް ބޭނުންވާ ވަރަށް ހަމަކުރުމަށްފަހު ކަމަށް މިނިސްޓަރު ވިދާޅުވި އެވެ.
މި އަހަރުގެ ދިރާސީ އަހަރުގެ ކިޔެވުން 219 ސްކޫލެއްގައި ފެށީ 77،000 އަށްވުރެ ގިނަ ދަރިވަރުންނާއި 9،000 އަށްވުރެ ގިނަ ޓީޗަރުންނާއެކުގަ އެވެ.
މި އަހަރު ސަރުކާރު ސްކޫލްތަކުގައި ގްރޭޑް އެކެއްގައި ކިޔަވަން 4،000 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރޭގައި މާލެ ސަރަހައްދުން ގްރޭޑް އެކެއްގައި ކިޔަވާނެ 1،700 އަށް ގިނަ ދަރިވަރުން ހިމެނެ އެވެ.
ދިރާސީ އައު އަހަރުގެ ކިޔެވުން ފެށުން -- ފޮޓޯ: މުހައްމަދު ޝަހުޒާން / އަދަދު
މީގެއިތުރުން އަތޮޅުތެރެއިން މާލެއަށް 1،500 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރެއިން އެންމެ ގިނަ ދަރިވަރުން ބަދަލުވީ ހުޅުމާލެއަށެވެ. އެއީ 800 އަށްވުރެ ގިނަ ދަރިވަރުންނެވެ.
ދިރާސީ އައު އަހަރުގެ ކިޔެވުން މިއަދު ފެށިއިރު، މާޗު 8، ގެ ނިޔަލަށް ކިޔެވުން ކުރިއަށް ގެންދިޔުމަށްފަހު ސްކޫލްތައް އަނެއްކާވެސް ބަންދުވާނެ އެވެ. އެއަށްފަހު ސްކޫލްތައް އަލުން ހުޅުވޭނީ އަންނަ މާޗު 23، ގަ އެވެ. އެހެންކަމުން ރޯދަ މަހު ސްކޫލްތައް ހުޅުވިފައި ހުންނާނީ އެއް ހަފްތާއަށެވެ.
މީގެއިތުރުން ދިރާސީ އައު އަހަރުގެ ފުރަތަމަ ޓާމްގެ މިޑްޓާމް ބްރޭކަށް މެއި 24، އިން ފެށިގެން 30، ގެ ނިޔަލަށް ސްކޫލްތައް ބަންދުވާނެ އެވެ. އެއަށްފަހު ފުރަތަމަ ޓާމްގެ ކިޔެވުން ނިމި ޖުލައި 17، އިން ފެށިގެން އޮގަސްޓް 1، ގެ ނިޔަލަށް ބަންދުވާނެ އެވެ.
ދިރާސީ އައު އަހަރުގެ ދެވަނަ ޓާމު ނިމި ދަރިވަރުންނަށް ބޮޑު ޗުއްޓީ ލިބޭނީ މި އަހަރުގެ ޑިސެމްބަރު 18، އިން ފެށިގެން އަންނަ އަހަރުގެ ޖެނުއަރީ 12، ގެ ނިޔަލަށެވެ. އެހެންކަމުން ދެވަނަ ޓާމްގެ ކިޔެވުން ކުރިއަށްދާނީ އޯގަސްޓް 2، އިން ފެށިގެން ޑިސެމްބަރު 17، ގެ ނިޔަލަށެވެ.
