ދިރާސީ އައު އަހަރުގެ ކިޔެވުން ފެށުނުއިރު ރާއްޖޭގެ ހުރިހާ ސްކޫލެއް އޭސީ ކުރުމަށް ހިންގާ "ކޫލް ސްކޫލް" މަޝްރޫއު ނުނިންމުނެވެ.
އަދަދު އަށް އެނގިފައިވާ ގޮތުގައި ސްކޫލްތައް އޭސީ ކުރުމަށް ބޭނުންވާ އޭސީތައް ބައެއް ރަށްރަށަށް ފޮނުވާ ނުނިމޭއިރު، ގިނަ ރަށްތަކުގެ ސްކޫލްތައް އޭސީކުރުމުގެ މަސައްކަތް މިހާތަނަށް ނިމިފައެއް ނުވެ އެވެ.
ސްކޫލްތައް އޭސީ ކުރުމުގެ މަޝްރޫއު މިދިޔަ އަހަރުގެ ޖޫން 12، ގައި ފެނަކަ ކޯޕަރޭޝަނާ ހަވާލުކުރީ 55 މިލިއަން ރުފިޔާއަށެވެ.
ނަމަވެސް ބީލަމަށް ނުލައި ސަރުކާރުން ނޮވެމްބަރު 6، ގައި ބަހާލި 206 މަޝްރޫއުތަކުގެ ތެރޭގައި ސްކޫލްތައް އޭސީކުރުމުގެ މަޝްރޫއު އެސްޓާސްއާ ހަވާލުކުރި އެވެ. އެ މަޝްރޫއު އެސްޓާސްއާ ހަވާލުކުރީ 58.4 މިލިއަން ރުފިޔާއަށް ކަމަށްވާއިރު، އެއީ ފެނަކައާ ހަވާލުކުރި އަގަށްވުރެ 3.4 މިލިއަން ރުފިޔާ ބޮޑު އަގެކެވެ.
ކޫލް ސްކޫލް މަޝްރޫއުގެ މަސައްކަތް ދިރާސީ އައު އަހަރު ފެށިއިރު ނުނިމުނު ސަބަބެއް އެޑިއުކޭޝަން މިނިސްޓްރީން ހާމަކޮށްފައެއް ނުވެ އެވެ. އެކަމާ ގުޅިގެން އެޑިއުކޭޝަން މިނިސްޓްރީގެ ބަހެއް އަދަދު އިން ހޯދަން މަސައްކަތް ކުރި ނަމަވެސް މިހާތަނަށް އެއްޗެއް ބުނެފައެއް ނުވެ އެވެ.
ޖެނުއަރީ 22، 2025 ގައި މުހައްމަދު މުއިއްޒު ވިދާޅުވީ ރާއްޖޭގެ ހުރިހާ ސްކޫލެއް އިޔާދަކުރަނިވި ހަކަތަ ބޭނުންކޮށްގެން އެ އަހަރުގެ ސެޕްޓެމްބަރަށް އޭސީކޮށް ނިންމާނެ ކަމަށެވެ.
ނަމަވެސް ފަހުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެފައި ވަނީ އޭސީކުރުމުގެ މަޝްރޫއު ނިމޭނީ މި އަހަރުގެ ދިރާސީ އަހަރު ފެށެންވާއިރަށް ކަމަށެވެ.
މި މަޝްރޫއުގެ ދަށުން ކްލާސްރޫމްތަކުގައި ހަރުކުރާނީ 24،000 ބީޓީޔޫގެ 1500 އޭސީ އާއި 18،000 ބީޓީޔޫގެ 6500 އޭސީ ކަމަށް، އަދަދު ނޫހަށް ލިބިފައިވާ ބަހާލި ޕްރޮޖެކްޓުތަކުގައި މައުލޫމާތު ކަރުދާހެއްގައި ބުނެފައިވެ އެވެ.
ސަރުކާރުގެ ހުރިހާ ސްކޫލެއްގެ ކްލާސް ރޫމްތަކުގައި އޭސީ ހަރުކުރުމުގެ މަޝްރޫއު ފެށީ ޖޫން 2، 2024 ގަ އެވެ. އެ މަޝްރޫއުގެ މަސައްކަތް ފެނަކައާ ހަވާލުކުރީ އަހަރުގެ ޖޫން 12، 2025 ގަ އެވެ.
މި މަޝްރޫއުގެ ދަށުން ރާއްޖޭގެ އެކި ރަށްރަށުގެ ސްކޫލްތަކުން ޖުމްލަ 3،704 ކްލާސްރޫމް އޭސީ ކުރާނެ ކަމަށް މިނިސްޓަރު ޝަފީއު ކުރިން ވިދާޅުވި އެވެ.
މަޝްރޫއުގެ ދަށުން މިދިޔަ އަހަރުގެ މެއި މަހުގެ ނިޔަލަށް ޖުމްލަ 401 ކްލާސް ރޫމެއްގައި 802 އޭސީ ހަރުކުރެވިފައިވާ ކަމަށް މިނިސްޓްރީން ބުންޏެވެ.
