ހުޅުމާލެ ފޭސް 2 ގައި އިމާރާތްކުރި ޖާގަ ތަނަވަސް ޝަހީދު އަލީ ސްކޫލް މިއަދު ހުޅުވައިފި އެވެ.
ޖުމްލަ 2،500 އެއްހާ ދަރިވަރުންގެ ޖާގަ ހިމެނޭ ޝަހީދު އަލީ ސްކޫލުގައި 54 ކްލާސްރޫމާއި، ތިން ސައިންސް ލެބާއި، ފެންވަރު ރަނގަޅު އޮޑިޓޯރިއަމެއްގެ އިތުރުން މާލެ ސަރަހައްދުގައި އެންމެ ފެންވަރު ރަނގަޅު ސްޕޯޓްސް ހޯލެއް ހިމެނިފައިވެ އެވެ.
ސްކޫލް ހުޅުވި ރަސްމިއްޔާތުގައި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ 2،000 އަށްވުރެ ގިނަ ދަރިވަރުންނާއެކު ކިޔަވަމުންދާ ޝަހީދު އަލީ ސްކޫލުން މުދަރިސުންގެ ބުރަ މަސައްކަތާއެކު ފެންވަރު ރަނގަޅު ތައުލީމެއް ދެވޭނެ ކަމަށެވެ.
ޝަހީދު އަލީ ސްކޫލަށް ބަދަލުވި 2،000 އަށްވުރެ ގިނަ ދަރިވަރުންގެ ތެރެއިން 77 ޕަސަންޓު ދަރިވަރުންނަކީ އަތޮޅުތެރޭގެ ރަށްތަކަށް ނިސްބަތްވާ ދަރިވަރުން ކަމަށް މިނިސްޓަރު ވިދާޅުވި އެވެ.
ޝަހީދު އަލީ ސްކޫލް ހުޅުވުން: އެ ސްކޫލްގައި 54 ކްލާސްރޫމް ވަނީ ގާއިމުކޮށްފައި -- ފޮޓޯ: މުހައްމަދު ޝަހުޒާން / އަދަދު
މިނިސްޓަރު ވިދާޅުވީ އެ ސްކޫލް ހުޅުމާލެ ފޭސް 2 ގައި ގާއިމުކުރެވިފައި ވިޔަސް، އެ ސްކޫލް ވެގެންދާނީ މުޅި ރާއްޖެ ޝާމިލުވާ ސްކޫލަކަށް ކަމަށެވެ.
"77 އިންސައްތަ އަތޮޅުތެރެއަށް ނިސްބަތްވާ ދަރިވަރުންނަކީ އެއީ ވަރަށް ބޮޑު އަދަދެއް. އެހެންވީމާ މި ސްކޫލް ވެގެންދާނީ ހުރިހާ ރަށްތަކެއް، ހުރިހާ އަތޮޅުތަކެއް މި ސްކޫލްގެ ތެރެއިން ޝަމިލުވެގެންދާ ސްކޫލެއް ގޮތުގައި މި ސްކޫލް އޮންނާނީ،" މިނިސްޓަރު ވިދާޅުވި އެވެ.
ޝަހީދު އަލި ރަސްގެފާނުގެ ނަމުން ނަން ދެވިފައިވާ ޝަހީދު އަލީ ސްކޫލްގެ އަމަލީ މަސައްކަތް ފެށީ ޑިސެމްބަރު 25، 2023 ގަ އެވެ. އެހެންކަމުން އެ ސްކޫލް ހުޅުވައި ކިޔަވައިދޭން ފަށާފައި މިވަނީ ދެ އަހަރު ދުވަހުގެ މަސައްކަތަށް ފަހު އެވެ.
ޝަފީއު ވިދާޅުވީ ކުރިއަށް އޮތް ދުވަސްތަކުގައި ވެސް ހުޅުމާލޭގައި އިތުރު ސްކޫލްތައް އެޅުމަށް ޕްލޭންކޮށްފައި އެބަހުރި ކަމަށެވެ. އެގޮތުން އެއް ސްކޫލެއްގެ ކޮންސެޕްޓް ފައިނަލްކޮށް، ޑައިޒައިން މަރުހަލާ ވެސް ނިމިފައިވާ ކަމަށް ވެސް މިނިސްޓަރު ވިދާޅުވި އެވެ.
