މި އަހަރަށް ފާސްކޮށްފައިވާ ދަރަނި ބޮޑު ބަޖެޓަށް ފައިސާ ހޯދަން ސަރުކާރުން ކުރަމުންދާ މަސައްކަތުގެ ދަށުން އަމިއްލަ ފަރާތަކަށް 157 މިލިއަން ދިވެހި ރުފިޔާގައި އަގުކުރެވިފައިވާ ޑޮލަރު ޓްރެޝަރީ ބޮންޑެއް ވިއްކައިފި އެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން އެނގޭ ގޮތުގައި މި ބޮންޑު ވިއްކީ މި މަހުގެ ނުވަ ވަނަ ދުވަހާއި 16 ވަނަ ދުވަހާ ދޭތެރޭގަ އެވެ.
ސަރުކާރުން މި ޕްރައިވެޓް ޓްރަޝަރީ ބޮންޑު ވިއްކީ އެއް އަހަރާއި ދެ އަހަރާއި ދެމެދުގެ މުއްދަތަކަށެވެ. މިއީ ރާއްޖޭގެ ޕްރައިވެޓް ސެކްޓާއަށް (އަމިއްލަ ފަރާތަކަށް) ބޮންޑެއް ވިއްކައިގެން ބަޖެޓަށް ފައިސާ ހޯދި ފުރަތަމަ ފަހަރު ކަމަށް "އަދަދު" އަށް މައުލޫމާތު ލިބިފަ އެވެ.
މިކަމާ ގުޅޭގޮތުން ފިނޭންސް މިނިސްޓްރީގައި ސުވާލުކުރުމުން ބޮންޑު ވިއްކައިގެން ފައިސާ ހޯދިކަން ކަށަވަރުކޮށް ދިން ނަމަވެސް އެ ވިއްކި ފަރާތެއް ހާމައެއް ނުކުރެ އެވެ.
"އިންވެސްޓާ ކޮންފިޑެންޝާލިޓީ ހިފެހެއްޓުމުގެ ގޮތުން ސަރުކާރުގެ ސެކިއުރިޓީތަކަށް އިންވެސްޓުކުރާ ވަކިވަކި ފަރާތްތަކުގެ މައުލޫމާތު ހިއްސާކުރެވޭކަށް ނެތް" ފިނޭންސުގެ އޮފިޝަލަކު ބުންޏެވެ.
މި އަހަރަށް ފާސްކުރި ބަޖެޓަކީ 15 ބިލިއަން ރުފިޔާއިން ޑެފިސިޓު ބަޖެޓެކެވެ. މި ފައިސާގެ ތެރެއިން 8.4 ބިލިއަން ރުފިޔާ ހޯދަން މީގެ ހަތަރު މަސް ކުރިން ފިނޭންސުން އިއުލާނެއް ކޮށްފައިވެ އެވެ. ބެލެވެނީ މި ފައިސާ ވެސް ހޯދީ އެ އިއުލާނާ ގުޅިގެން ޝައުގުވެރިކަން ފާޅުކުރި އިންވެސްޓަރެއްގެ އަތުންނެވެ.
ފިނޭންސުގެ އެ އިއުލާނުގައި ވަނީ ސަރުކާރުން އާންމުކޮށްފައިވާ ދަރަނި ނެގުމުގެ ޕްލޭނާ އެއްގޮތަށް ލޯނާއި ޓްރެޝަރީ ސެކިއުރިޓީގެ ގޮތުގައި ފައިސާ ދޭނެ ފާރާތްތަކުގެ ހުށަހެޅުންތަކަށް ހުޅުވާލާފަ އެވެ. މި ފައިސާ ހަރަދުކުރަނީ ސަރުކާރުން އިސްކަންދޭ ޕްރޮޖެކްޓުތަކަށެވެ.
އެންމެ ފަހުގެ ތަފާސްހިސާބުތަކުން ދައްކާ ގޮތުގައި ދައުލަތުން ވިއްކާފައިވާ ސެކުއިރިޓީސްއަށް ދައްކަން ޖެހޭ ފައިސާގެ އަދަދު އެންމެ ފަހުން ހުރީ 83.3 ބިލިއަން ރުފިޔާގަ އެވެ. މި އަހަރު ފެށުނުއިރު މި އަދަދު ހުރީ 81.5 ބިލިއަން ރުފިޔާގަ އެވެ. މިއީ 1.8 ބިލިއަން ރުފިޔާގެ އިތުރުވުމެކެވެ.
