ވިހި ވަނަ ރައްޔިތުންގެ މަޖިލީހުގެ ރައީސް ކަމަށް، ޕީއެންސީގެ ޗެއާޕާސަން އަދި ފޮނަދޫ ދާއިރާގެ އިންތިހާބީ މެމްބަރު އަބްދުއްރަހީމް އަބްދުﷲ (އަދުރޭ) އަދި ނައިބު ރައީސް ކަމަށް ދިއްގަރު ދާއިރާގެ އިންތިހާބީ މެމްބަރު އަހުމަދު ނާޒިމް އިންތިހާބުކުރަން ރައީސް ޑރ. މުހައްމަދު މުއިއްޒު މިއަދު ހުށަހަޅުއްވައިފި އެވެ.
ރައީސް މި ނަންތައް ހުށަހެޅުއްވީ މިހާރު މުލިއާގޭގައި ސަރުކާރާއި ސަރުކާރު ކުންފުނިތަކުގެ ވެރިންނާއި ސަރުކާރު ހިންގާ ޕީއެންސީގެ މަޖިލިސް މެމްބަރުންނާއި އެ ޕާޓީގެ އިންތިހާބީ މަޖިލިސް މެމްބަރުން އެއްތަންކޮށްގެން ކުރިއަށް ގެންދާ މަޝްވަރާ ބައްދަލުވުމުގެ ތެރެއިންނެވެ.
ރައްޔިތުންގެ މަޖިލީހުގެ ރައީސް ކަމަށް އިންތިހާބުކުރަން ރައީސް ހުށަހެޅުއްވި އަބްދުއްރަހީމަކީ، މި ސަރުކާރު ގެންނަން އެންމެ އިސްކޮށް މަސައްކަތް ކުރި އެކަކެވެ. މި ސަރުކާރުގައި އެންމެ ނުފޫޒުގަދަ ބޭފުޅުންގެ ތެރޭގައި ވެސް ހިމެނިވަޑައިނަވާ އަބްދުއްރަހީމް މި ވަގުތު ވެސް ހުންނެވީ ރައީސްގެ ހާއްސަ އެޑްވައިޒަރުގެ ގޮތުގައި މި ސަރުކާރުގެ އެންމެ އިސް ވަޒީރުގެ މަގާމުގަ އެވެ.
ނައިބު ރައީސް ކަމަށް ހުށަހެޅުއްވި އަހުމަދު ނާޒިމަކީ (ގޮނޑި ގެއްލުމާ ހަމައަށް) 18 ވަނަ ރައްޔިތުންގެ މަޖިލީހުގެ ނައިބު ރައީސެވެ. އެ މަޖިލީހުގައި ވެސް އޭނާ ތަމްސީލުކުރެއްވީ ދިއްގަރު ދާއިރާ އެވެ. ނާޒިމަށް ގޮނޑި ގެއްލުނީ ކޮރަޕްޝަންގެ މައްސަލައެއްގައި 25 އަހަރުގެ ހަލު ހުކުމެއް އިއްވުމުންނެވެ. ސުޕްރީމް ކޯޓުން ފަހުން ވަނީ އެ ހުކުމް ބާތިލުކޮށްފަ އެވެ.
ޕީޖީ ލީޑަރަކަށް ފަލާހު
ފަލާހު އަދި ޝުޖާއު
އޭގެ އިތުރުން އެ ޕާޓީގެ ޕާލިމެންޓަރީ ގްރޫޕު (ޕީޖީ)ގެ ލީޑަރު ކަމަށް އިނގުރައިދޫ ދާއިރާގެ އިންތިހާބީ މެމްބަރު އަހުމަދު ފަލާހައި ސީނިއާ ޑެޕިއުޓީ ލީޑަރަކަށް ބާރަށު ދާއިރާގެ އިންތިހާބީ މެމްބަރު އަހުމަދު ސުޖާއުގެ ނަން ރައީސް ހުށަހަޅުއްވާފައިވާ ކަމަށް ވެސް މައުލޫމާތު ލިބިފައިވެ އެވެ.
ޕީއެންސީގެ ޕީޖީގައި އިސްކޮށް ދެން ތިއްބަވާނެ ޑެޕިއުޓީ ލީޑަރުންގެ ރައީސް ހުށަހެޅުއްވީ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) އާއި ވިލިމާލޭ ދާއިރާގެ އިންތިހާބީ މެމްބަރު މުހައްމަދު އިސްމާއިލްގެ އިތުރުން ހުޅުދޫ ދާއިރާގެ އިންތިހާބީ މެމްބަރު މުހައްމަދު ޝާހިދު (ޝާޑު) އެވެ.
އާ މަޖިލީހުގެ މެމްބަރުން ހުވާކުރަން ހަމަޖެހިފައިވަނީ އަންނަ ހަފުތާގެ އަންގާރަ ދުވަހެވެ.
