ދިވެހި ކަނޑުފަޅުތަކުގައި ރައްކާކޮށްފައި ހުރި ކާބަންގެ މިންވަރު ހިސާބުކޮށް، ބޭރުގެ ބާޒާރުތަކަށް ކާބަން ކްރެޑިޓްސް ވިއްކޭތޯ ބަލަން އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އާ އެކީ އެމްއޯޔޫއެއްގައި ސޮއިކޮށްފި އެވެ.
އައިޓީއެފްސީ އިން އެކްސްގައި ކުރި ޕޯސްޓެއްގައި ބުނި ގޮތުގައި، ބްލޫ ކާބަން ޖެނެރޭޝަން ޕްރޮޖެކްޓުގެ ނަން ދެވިފައިވާ، މި މަޝްރޫއުގެ ބޭނުމަކީ ރާއްޖޭގެ ކަނޑުތަކާއި ފަޅުތަކުން ބްލޫ ކާބަން ކްރެޑިޓްސް ހިސާބުކުރެވޭތޯ ބަލައި، ކާބަން މާކެޓުތަކަށް ވިއްކުމަށް އޮތް ފުރުސަތުތައް ދެނެގަތުމެވެ.
މިއީ އެ ކޯޕަރޭޝަނުގެ އެންވަރަމެންޓަލް، ސޯޝަލް އެންޑް ގަވަނަންސް (އީއެސްޖީ) ސްޓްރެޓަޖީން ހާސިލުކުރަން އަމާޒުހިފާފައިވާ ކަންކަމުގެ ތެރެއަށް ފެތޭ މަސައްކަތެއް ކަމަށް ވެސް އައިޓީއެފްސީ އިން ބުންޏެވެ.
މި އެމްއޯޔޫގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ. އައިޓީއެފްސީގެ ފަރާތުން ސޮއިކުރެއްވީ އައިޓީއެފްސީގެ ސީއީއޯ ހާނީ ސަލީމް ސޮންބޮލް އެވެ.
ކާބަން ކްރެޑިޓު ވިއްކައިގެން ދައުލަތަށް އާމްދަނީ ހޯދުމަކީ ސަރުކާރުން މިދިޔަ އަހަރު އާންމުކުރި 2026-2024 ގެ ފިސްކަލް ސްޓްރެޓީޖައި އާމްދަނީ އިތުރުކުރަން ހުށަހަޅާފައިވާ އާ ކަމެކެވެ.
މިކަމާ ގުޅޭ ގޮތުން ފިސްކަލް ސްޓްރެޓަޖީ ކަރުދާހުގައިވާ ގޮތުގައި ރާއްޖޭގެ ކުޅިތަކާއި މޫދުވިނަ ހުރި ކަނޑުގެ ސަރަހައްދުތައް ހިމާޔަތްކޮށްގެން ނުވަތަ އެ ސަރަހައްދުތައް އިޔާދަކޮށްގެން، މި ތަންތަނުން ކާބަން ރައްކާކުރާ މިންވަރު ހިސާބުކުރުމަށް ފަހު "ކާބަން ކްރެޑިޓްސް" ދުނިޔޭގެ ބާޒާރުގައި ވިއްކޭނެ އެވެ.
ކާބަން ކްރެޑިޓުތައް ގަންނަނީ ކާބަން އެމިޝަންސް ނުވަތަ ޖައްވަށް ގިނައިން ވިހަ ގޭސްތައް ދޫކުރާ ކުންފުނިތަކުން، ރެގިއުލޭޓަރުންގެ މިންގަނޑުތަކާ އެއް ހަމައަށް އެމިޝަންސް ތިރިކުރުމަށެވެ. ކުންފުނިތަކެކޭ އެއްގޮތަށް، ކާބަން އެމިޝަން މަތި ގައުމުތަކަށް ވެސް ކާބަން ކްރެޑިޓު ވިއްކޭނެ އެވެ.
ފިނޭންސުން ފިސްކަލް ސްޓްރެޓަޖީގައި ލަފާކޮށްފައިވަނީ ކާބަން ކްރެޑިޓު ވިއްކަައިގެން އާމްދަނީއަށް 863.5 މިލިއަން ރުފިޔާ ލިބޭނެ ކަމަށެވެ.
