ކުށުގެ ފައިސާ ހޯދުމަށް ފަހު ރާއްޖެއިން ބޭރަށް ގެންދާ ކަން ފާހަގަ ކުރެވޭ ކަމަށާއި އެ ކަން ހައްލުކުރަން ޑޮލަރު ގެންދެވޭ އުސޫލު ހަރުކަށިކޮށްފައިވާނެ ކަމަށް ސަރުކާރުން މިއަދު ބުނެފި އެވެ.
ހޯމް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ އިހުސާން ވިދާޅުވި ގޮތުގައި އުސޫލަށް ގެނައި ބަދަލަކީ 10،000 ޑޮލަރަށް ވުރެ އިތުރަށް ފައިސާ ބޭރަށް ގެންދާ ނަމަ އެ ފައިސާގެ މަސްދަރު ނުވަތަ ހޯދި ގޮތް ބުނެދޭން ޖެހުމެވެ. ފައިސާ ބޭރު ކުރަން ބޭނުންވާ ފަރާތުން ފައިސާ ހޯދި ގޮތުގެ ތަފުސީލު ވެސް ދޭންޖެހޭނެ ކަމަށް މިނިސްޓަރު ވިދާޅުވި އެވެ.
"ކުރީގައި 10،000 ޑޮލަރު ހިފައިގެންދާ މީހާ، ތިމަންނަ މި ދަނީ އެ ވަރަށް ޑޮލަރު ހިފައިގެންނޭ ބުނެފައި ދާންވީ، އޭނާއާ ސުވާލެއް ވެސް ނުކުރޭ، ބައިނަލްއަގުވާމީ ގޮތުން ވެސް ހަމަތަކެއް އޮންނަ ކަމެއް އެއީ. އޭގެ ސޯސް އޮފް ފަންޑްސް، ކިހިނެއް ހޯދި ފައިސާ ކަން ބުނެދޭން ޖެހޭ،" މިނިސްޓަރު ވިދާޅުވި އެވެ.
ރާއްޖޭގައި ސޭލްސް އެސިސްޓަންޓް، ކެފޭ/ރެސްޓޯރަންޓް ވެއިޓަރުން، ކައްކާއިން، ނުވަތަ ލޭބަރުންގެ ގޮތުގައި މަސައްކަތްކުރާ ބިދޭސީން ވެސް ރާއްޖޭގައި މަސައްކަތްކުރާތާ މަދު ދުވަސްތަކެއްގެ ތެރޭގައި ރާއްޖޭން ބޭރަށް ލައްކައަށް ވުރެ ގިނަ ޑޮލަރު ގެންދާ ކަން ފާހަގަ ކުރެވިފައިވާ ކަމަށެވެ.
"ދިވެއްސަކު ވިޔަސް، ބޭރު މީހަކު ވިޔަސް، ރާއްޖޭން ބޭރަށް، 10،000 ޑޮލަރަށް ވުރެ މަތިން، ދިވެހި ފައިސާ ވިޔަސް، ބޭރު ފައިސާ ވިޔަސް، ކިހިނެއް ލިބުނު ފައިސާއެއް ކަން، ރަނގަޅަށް ބުނު ނުދެވޭހާ ހިނދަކު، އެ ފައިސާ އަޅުގަނޑުމެން ދުލެއް ނުކުރާނަން،" އޭނާ ވިދާޅުވި އެވެ.
