ބަންގްލަދޭޝްގައި މިހާރު ކުރިއަށްދާ ސްޕެޝިއަލް އޮލިމްޕިކްސް، ސައުތު އޭޝިއާ ކަޕް، ޔުނިފައިޑް ފުޓްބޯލްގައި ރާއްޖޭން 4-2 އިން އިންޑިއާ ބަލިކޮށްފި އެވެ.
ބަޝުންދަރާ އެރީނާގައި ކުރިއަށްދާ މި ސެވަން އަ ސައިޑް ފުޓްބޯޅަ މުބާރާތުގައި ރާއްޖޭގެ ފިރިހެން ޓީމުން ކުުޅުނު ފުރަތަމަ ތިން މެޗުން ވަނީ ބަލިވެފަ އެވެ. އެ ގޮތުން ބަންގްލަދޭޝް އޭ ޓީމު އަތުން ފުރަތަމަ މެޗުގައި ވަނީ 6-0 އިން ބަލިވެފަ އެވެ. ދެ ވަނަ މެޗުގައި ބަންގްލަދޭޝްގެ ބީ ޓީމު އަތުން ބަލިވީ 3-0 އިންނެވެ.
ރާއްޖޭން ތިން ވަނަ މެޗުގައި ބައްދަލުކުރީ އިންޑޮނީޝިއާއާ އެވެ. އެ ޓީމު އަތުން ރާއްޖެ ބަލިވީ 4-2 އިންނެވެ.
މުބާރާތުގައި ރާއްޖޭން ހޯދި ފުރަތަމަ މޮޅަކީ، މިއަދު އިންޑިއާ އަތުން 4-2 އިން ހޯދި ކާމިޔާބެވެ. މި މެޗުގައި ރާއްޖޭގެ ޓީމުގެ، ހުމައިދު ވަނީ ހެޓްރިކެއް ހަދައިފަ އެވެ. އަނެއް ލަނޑު ޖެހީ، އަޝަމް އެވެ.
ޔުނިފައިޑް ފުޓްބޯލްގައި، ހާއްސަ އެހީއަށް ބޭނުންވާ ހަތަރު ކުޅުންތެރިންނާއި ހާއްސަ އެހީއަށް ބޭނުންވާ ތިން ކުޅުންތެރިންނަށް އެއް ފަހަރާ ޓީމަށް އަރައި ކުޅެވޭނެ އެވެ.
ބަންގްލަދޭޝްގެ ސްޕެޝިއަލް އޮލިމްޕިކްސް ކޮމިޓީން އިންތިޒާމްކުރި މި މުބާރާތުގައި ރާއްޖޭގެ ޓީމަށް އިރުޝާދުދިނީ، ތަޖުރިބާކާރު ފުޓްބޯޅަ ކޯޗު އަހުމަދު ނާޝިދު (ނާދު) އެވެ. ގައުމީ އެކި އުމުރުފުރާ ޓީމުތަކުގެ ކޯޗުކަން ކުރި ނާދު އަކީ ފުރަތަމަ ޑިވިޝަނުގައި ވެސް ގިނަ ކްލަބްތަކެއްގައި މަސައްކަތްކޮށްފައިވާ ކޯޗެކެވެ.
މުބާރާތަށް ޓީމު ފުރުމުގެ ކުރިން، ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވަނީ ޓީމާ ބައްދަލުކޮށް ހިތްވަރުދެއްވައިފަ އެވެ.
