މެންޗެސްޓާ (އޭޕްރީލް 15) - މެންޗެސްޓާ ޔުނައިޓެޑަށް ކުޅެމުންދާ ފްރާންސްގެ ފޯވަޑް އެންތަނީ މާޝިއާލްގެ ކޮންޓުރެކްޓް މި ސީޒަންގެ ނިޔަލަށް ހަމަވުމުން، އެ ކްލަބުން އޭނާ ދޫކޮށްލާނެ ކަމަށް މީޑިއާ ރިޕޯޓްތަކުން ބުނެފި އެވެ.
ފްރާންސްގެ މޮނާކޯ އިން 2015 ވަނަ އަހަރު ޔުނައިޓެޑަށް ބަދަލުވި މާޝިއާލް، 28، އަށް މި ސީޒަންގައި ވެސް އަނިޔާގެ މައްސަލަތަކެއް ކުރިމަތިވެ، މާ ގިނަ މެޗެއް ނުކުޅެވުނެވެ. މި ސީޒަންގެ ޕްރިމިއާ ލީގުގައި އޭނާ ކުޅުނު 13 މެޗުން ޖެހުނީ އެންމެ ލަނޑެކެވެ.
ޔުނައިޓެޑްގެ ޖޯޒީގައި ކުޅުނު ފުރަތަމަ މެޗުގައި ލިވަޕޫލް ކޮޅަށް ލަނޑު ޖަހައި، މާޝިއާލް، ޔުނައިޓެޑްގެ ކެރިއަރު ފެށީ އުންމީދު ބޮޑުކޮށެވެ. އެކަމަކު، އެ ކްލަބުގައި ހޭދަކުރި އަށް ސީޒަންގައި އަނިޔާގެ ގިނަ މައްސަލަތަކެއް ކުރިމަތިވެ، އޭނާގެ ބޭނުން ޔުނައިޓެޑަށް އެންމެ އެކަށީގެންވާ ގޮތުގައި ނުހިފުނެވެ.
ރިޕޯޓްތަކުން ބުނާގޮތުގައި މި ސީޒަންގެ ނިޔަލަށް މާޝިއާލްގެ ކޮންޓުރެކްޓް ހަމަވާއިރު، އިތުުރު އެއް އަހަރަށް ކޮންޓުރެކްޓް އާކުރަން އޮތް އިހުތިޔާރު ޔުނައިޓަޑުން ބޭނުމެއް ނުކުރާނެ އެވެ. އެހެންކަމުން، މާޝިއާލްގެ ކެރިއަރު ދެން ކުރިއަށް ގެންދަންޖެހޭނީ އެހެން ކްލަބެއްގަ އެވެ.
މިދިޔަ އަހަރު އިޓަލީގެ އިންޓަ މިލާނުން މާޝިއާލް އަށް ޝައުގުވެރިވިއެވެ. އެއީ ދެން ވެސް އޭނާ ގެންދަން މަސައްކަތްކޮށްފާނެ އެއް ކްލަބެވެ. އޭގެ އިތުރުން ތުުރުކީ އާއި ފްރާންސްގެ ބައެއް ކްލަބުތަކުން ވެސް އޭނާ ގެންދަން ޝައުގުވެރިވާ ކަމަށްވެ އެވެ.
