މެންޗެސްޓާ (މެއި 29) - މެންޗެސްޓާ ޔުނައިޓެޑްގައި ނުވަ ސީޒަން ހޭދަކުރުމަށް ފަހު، ފްރާންސްގެ ފޯވާޑް އެންތަނީ މާޝިއާލް އެ ކްލަބަށް އަލްވަދާއު ކިޔައިފި އެވެ.
މާޝިއާލް، 28، ޔުނައިޓެޑާ އެކު ހަދާފައިވާ ކޮންޓުރެކްޓް އޮތީ މި ސީޒަންގެ ނިޔަލަށެވެ. ޔުނައިޓެޑުން އޭނާ ކޮންޓުރެކްޓް އާކުރަން ބޭނުމެއްނުވި އެވެ.
ފްރާންސްގެ މޮނާކޯ އިން 2015 ވަނަ އަހަރު 36 މިލިއަން ޕައުންޑް (56 މިލިއަން ޑޮލަރު)ގެ ޓްރާންސްފާ ފީއެއްގައި ޔުނައިޓެޑަށް ބަދަލުވި މާޝިއާލްއާ މެދު ޔުނައިޓެޑުން ފޮނި އުންމީދުތަކެއް ކުރިއެވެ.
އެކަމަކު، އަނިޔާ އާއި ފޯމުގެ މައްސަލަތަކާ ގުޅިގެން ޔުނައިޓެޑް އިން އުންމީދުކުރި ފެންވަރަށް އޭނާ އަކަށް ނުދެވުނެވެ.
ޖެނުއަރީގައި ވެސް ސާޖަރީއެއްހެދި މާޝިއާލް އެންމެ ފަހުން ޔުނައިޓެޑަށް މެޗެއް ކުޅުނީ މިދިޔަ އަހަރުގެ ޑިސެމްބަރު މަހުގެ ކުރީކޮޅެވެ.
މާޝިއާލް ވަނީ ޔުނައިޓެޑަށް އަލްވަދާއު ކިޔުމަށް އޭނާގެ ސޯޝަލް މީޑިއާގެ އެކައުންޓްތަކުން އިއްޔެ އަސަރުގަދަ މެސެޖެއް ޔުނައިޓަޑެޢި އެ ޓީމުގެ ސަޕޯޓަރުންނަށް ދީފައެވެ.
މާޝިއާލް ބުނީ ޔުނައިޓެޑާ ދުރަށް ދިއުމަކީ އޭނާ އަށް ލިބޭ ވަރަށް ބޮޑު ދެރައެއް ކަމަށެވެ.
"މެންޗެސްޓާ ޔުނައިޓެޑްގައި ތިބީ އެންމެ ރަނގަޅު ސަޕޯޓަރުން. އަހަރެންގެ ހިތުގައި ޔުނައިޓަޑަށް އަބަދުވެސް ޖާގަ އޮންނާނެ،" މާޝިއާލް ބުންޏެވެ،
ޔުނައިޓެޑާ އެކު މާޝިއާލް ވަނީ އެފްއޭ ކަޕް، ޔޫރޮޕާ ލީގު އަދި ލީގު ކަޕް ކާމިޔާބުކޮށްފަ އެވެ. ލޯނު އެއްބަސްވުމެއްގެ ދަށުން 2022 ވަނަ އަހަރު ސެވިއްޔާ އަށް ވެސް އޭނާ ކުޅުނެވެ.
