ލަންޑަން (މެއި 31) - އަންނަ ހޮނިހިރު ދުވަހު ކުޅޭ އިނގިރޭސި އެފްއޭ ކަޕް ފައިނަލް މެޗުގައި މެންޗެސްޓާ ޔުނައިޓެޑްގެ ފްރާންސް ފޯވާޑް، އެންތަނީ މާޝިއަލް އަށް ނުކުޅެވޭނެކަން ކަށަވަރުވެއްޖެ އެވެ.
ޔުނައިޓެޑް އެންމެ ފަހުން ކުޅުނު މެޗުގައި، އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް މާޝިއަލްގެ ފަލަމަސްގަނޑަށް ވަނީ އަނިޔާވެފަ އެވެ. އެ އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގުނު ގޮތުގައި މާޝިއަލްގެ ފަލަމަސްގަނޑުން ތަންކޮޅެއް ވަނީ އިރައިގެން ގޮސްފަ އެވެ.
އެހެންވެ، ދެން މި ސީޒަނުގައި އުމުރުން 27 އަހަރުގެ މާޝިއަލް ފެނުމުގެ ފުރުސަތެއް ނެތެވެ.
މާޝިއަލް ވަނީ ޔުނައިޓެޑުން ލުއީ ވެން ހާލްގެ ކޯޗުކަމުގައި 2016 ވަނަ އަހަރު އެފްއޭ ކަޕްގެ ޗެމްޕިއަންކަން ހޯދިއިރު، ޔުނައިޓެޑަށް ފައިނަލުގައި ކްރިސްޓަލް ޕެލަސްއާ ދެކޮޅަށް ކުޅެފަ އެވެ. އަނިޔާގެ ސަބަބުން މި ސީޒަނުގައި ގިނަ މެޗުތަކެއް ގެއްލުނު މާޝިއަލް ޕްރިމިއާ ލީގުގައި 21 މެޗުގައި ކުޅުނުއިރު، ޖެހުނީ އެންމެ ހަ ގޯލެވެ.
ހޮނިހިރު ދުވަހުގެރޭ މެންޗެސްޓާ ސިޓީއާ ދެކޮޅަށް ޔުނައިޓެޑުން ކުޅޭ އެފްއޭ ކަޕް ފައިނަލުގައި އެ ޓީމުގެ ބްރެޒިލްގެ ވިންގް، އެންޓޮނީ އަށް ވެސް ކުޅެވޭނެކަން އަދި ކަށަވަރެއް ނުވެ އެވެ. އެންމެ ފަހުން ފުލަމް އަތުން ޔުނައިޓެޑް މޮޅުވި މެޗުގައި އެންޓޮނީ އަށް އަނިޔާވެގެން ބަދަލުކުރަން ޖެހުނީ ސްޓްރެޗަރުގަ އެވެ.
މި ސީޒަނުގައި ޔުނައިޓެޑުން ވަނީ ފެބްރުއަރީ މަހު ލީގު ކަޕް ޗެމްޕިއަންކަން ހޯދައިފަ އެވެ. އެއީ ފައިނަލުގައި ނިއުކާސަލް ޔުނައިޓެޑް ބަލިކުރުމަށް ފަހު އެވެ. އެހެންކަމުން، އެފްއޭ ކަޕް ފައިނަލުގައި ޔުނައިޓެޑަށް ކާމިޔާބު ލިބިއްޖެނަމަ ނެދަލެންޑްސްގެ ކޯޗު އެރިކް ޓެން ހާގް ޔުނައިޓެޑްގައި ހޭދަކުރާ ފުރަތަމަ ސީޒަން ނިންމާލާނީ ދެ ތަށްޓާ އެކު އެވެ.
