މެންޗެސްޓާ (ޖެނުއަރީ 21) - މެންޗެސްޓާ ޔުނައިޓެޑްގެ ކޯޗުކަމާ ރަލްފް ރަންގްނިކާ ހަވާލުވި ހިސާބުން ޓީމަށް ހެޔޮ ބަދަލުތަކެއް ގެންނާނެ ކަމަށް ސަޕޯޓަރުން ތިބީ އުއްމީދު ކޮށްގެންނެވެެ. އެއީ ޓީމުގެ ކުޅުމުގެ ސްޓައިލަށް ބަދަލުތަކެއް ގެނެސް ޓީމްތެރޭގައި ހުރި ކުދިކުދި މައްސަލަތައް ހައްލު ކުރުމުގައި އޭނާގެ ތަޖުރިބާގެ ބޭނުންކުރެވޭނެތީ އެވެ.
މޮޅަކާ އެކު އޭނާ ޔުނައިޓެޑްގެ ދަތުރު ފެށިއިރު، މިހާތަނަށް އެންމެ ބޮޑަށް ޓީމު ތެރެއިން ފާހަގަވާކަމަކީ ކުރީގެ ކޯޗު އޮލެ ގުނަ ޝޮލްޝަޔާ ގަޔާވާ ބައެއް ކުޅުންތެރިންނަށް ލިބޭ ފުރުސަތުތައް މަދުވުމެވެ. ނަތީޖާއެއްގެ ގޮތުން މި ކުޅުންތެރިން ކޯޗު ރަންގްނިކާ މެދު ހިތްހަމަނުޖެހިގެން އުޅޭ ކަހަލަ ވާހަކަތަކެއް މިވަނީ އިނގިރޭސި މީޑިއާގައި ފެންމަތިވާން ފަށާފަ އެވެ.
ކޯޗު ރަންގްނިކާ، މާޝިއާލްގެ ކޯޅުން!
ލީގުގައި ދާދިފަހުން އެސްޓަން ވިލާއާ ދެކޮޅަށް ކުޅުނު މެޗުގެ ސްކޮޑުން އެންތަނީ މާޝިއަލް ނުފެނުމުން ގިނަ ބައެއްގެ ހިތުގަ ސުވާލުތަކެއް އުފެދުނެވެ. ޖަވާބުގައި ކޯޗު ރަންގްނިކް ބުނީ މެޗު ސްކޮޑުގަ ހިމެނެން މާޝިއާލް ބޭނުން ނުވީކަމަށެވެ. އަދި ގަދަ ކަމުން އެއްވެސް ކުޅުންތެރިއަކު ލައްވާ ކުޅުވަން ބޭނުންނުވާ ކަމަށެވެ.
މިވާހަކަތަކަށް ރައްދުދެމުން މާޝިއާލް އޭނާގެ އިންސްޓަގްރާމްގަ ކުރި ޕޯސްޓެއްގައި ބުނީ ކޯޗު ރަންގްނިކް އެހަދަނީ ދޮގުކަމަށާއި މެޗެއް ކުޅެން ފުރުސަތު ލިބޭއިރު، އެ ކަމަށް އޭނާ ނޫނެކޭ ބުނެފަ ނުވާނެ ކަމަށެވެ.
އެންމެ ފަހުން ލީގުގައި ބްރެންޓްފޯޑާ ދެކޮޅަށް ކުޅުނު މެޗުގެ ކުރިން ރަންގްނިކް ވަނީ އޭނާ އެހެން ބުނީ މާޝިއާލް ފަރިތަކުރުންތަކުގަ އޭގެ ކުރީ ދެ ދުވަހު ބައިވެރިނުވާތީ ކަމަށެވެ. އަދި މިހާރު ދެ މީހުންގެ މެދުގަ އުފެދިފަވާ "މިސްއަންޑަސްޓޭންޑީން" މިހާރު ހައްލުކުރެވިފައިވާ ކަމަށެވެ.
ބްރެންޓްފޯޑް މެޗު ސްކޮޑުގައި މާޝިއާލް ހިމެނި ނަމަވެސް މެޗުން އޭނާއަށް ފުރުސަތެއް ނުދެ އެވެ. ދެ ވަނަ ހާފުގައި ވޯމްއަޕަށް ނެރުނު ކުޅުންތެރިންގެ ތެރޭގައި ވެސް މާޝިއާލް ނުހިމެނެ އެވެ. މާޝިއަލް ހޯދަން ސްޕެއިނުގެ ސެވިއްޔާ އާއި އިޓަލީގެ ޔުވެންޓަސް އިން ޝައުގުވެރިވީ ނަމަވެސް ޔުނައިޓެޑްގެ ފޯވާޑުންގެ އަނިޔާގެ މައްސަލަތަކާ ހުރެ މާޝިއަލް ދޫކޮށްލަން ޔުނައިޓެޑް ތައްޔާރެއް ނޫނެވެ.
ކޯޗުގެ ސްޓައިލަށް ފިޓްނުވާ ކުޅުންތެރިން ބާކީވަނީ!
ރަންގްނިކް، ޔުނައިޓެޑުގެ ކޯޗުކަމާ ހަވާލުވިއިރު، އެޓީމުގެ ފުރަތަމަ 11 ބަރާބަރަށް ޖާގަ ހޯދާ ބައެއް ކުޅުންތެރިން މިހާރު ތިބީ ބާކީވެފަ އެވެ.
ސަޕޯޓަރުން އެންމެ ގަޔާވާ އެއް ކުޅުންތެރިޔާ ލޫކް ޝޯ މިހާރު އިންނަން ޖެހެނީ ބެންޗުގަ އެވެ. ޑިފެންސް ކުރުމުގަ ލޫކް ޝޯގެ މަސައްކަތު ރޭޓާ މެދު ހިތްހަމަ ނުޖެހިގެން މިހާރު ކޯޗު ރަންގްނިކް އިސްކަންދޭ ލިސްޓުގައި ޝޯ އަށް ވުރެ ކުރިން އަންނަނީ ބްރެޒިލްގެ އަލެކްސް ޓެލޭސް އެވެ.
މި ކުޅުންތެރިންގެ އިތުރުން މިހާރު ޔުނައިޓެޑް ކުޅޭ ސިސްޓަމަށް ފޯވާޑް ކަވާނީ ފިޓެއް ނޫނެވެ. ނަތީޖާއެއްގެ ގޮތުން ކަވާނީގެ ކުޅުން ދަށްވެ ފޯމު ކަޓައިފި އެވެ. ތޭވީސް އަހަރުން ދަށު ޓީމުގެ ޑޭވިޑް އެލަންގާ މިހާރު ރަންގްނިކްގެ ފޭވަރިޓަކަށް ވެއްޖެ އެވެ. މިދިޔަ ދެ މެޗުގެ ފުރަތަމަ އެގާރަ އިން ކޯޗު އޭނާ އަށް ޖާގަ ދިނެވެ.
ސޯލްޝެއާގެ ފޭވަރިޓް މާކަސް ރަޝްފޯޑަށް ވެސް މިދިޔަ އަށް މެޗުގަ މާ އެދެވޭ ކުޅުމެއް ނުދެއްކެ އެވެ. ރަޝްފޯޑަށް ވުރެ ކޯޗުގެ ލިސްޓުގެ ކުރީގައި މިހާރު އުޅެނީ މޭސަން ގްރީންވުޑެވެ.
ރޮނާލްޑޯއާ ރަންގްނިކުގެ ގުޅުން ގޯސްވަނީ
ކްރިސްޓިއާނޯ ރޮނާލްޑޯ އަކީ އަބަދުވެސް ކޮންމެ މެޗެއްގައި ވެސް ކުޅެ ގޯލު ޖަހަން ބޭނުންވާ ސްޓައިލްގެ ކުޅުންތެރިއެކެވެ. ރަންގްނިކް، ޔުނައިޓެޑާ ހަވާލުވުމާ އެކު އުފެދުނު ފުރަތަމަ ސުވާލަކީ އޭނާ ބޭނުންވާ ސްޓައިލަށް ރޮނާލްޑޯ އަށް ކުޅެވިދާނެތޯ އެވެ. މިގޮތުން "ޕްރެސިން" ގޭމަކަށް ރޮނާލްޑޯ ފިޓު ނޫން ކަމަށް ގިނަ މީޑިއާތަކުން ރިޕޯޓް ކުރި އެވެ.
ލީގުގެ ބައެއް މެޗުތަކުގައި ރޮނާލްޑޯ ދެ ވަނަ ހާފުގައި ބަދަލުކުރާތީ އެކަމާ ހިތްހަމަނުޖެހިގެން އުޅޭ މަންޒަރު މީގެ ކުރިންވެސް ފެނިފައިވެ އެވެ. އެންމެ ފަހުން ބްރެންޓްފޯޑް އަތުން ޔުނައިޓެޑް މޮޅުވި މެޗުގެ ދެ ވަނަ ހާފުގައި ރޮނާލްޑޯ ބަދަލުކުރުމުން ވެސް ރޮނާލްޑޯ ހުރީ ވަރަށް ބޮޑަށް ނުރުހިފަ އެވެ. އަދި އޭނާ ލާން ގެންގުޅުނު ޖެކެޓު ވެސް ހޫރާލި މަންޒަރު ފެނެ އެވެ.
އަނެއްކޮޅުން ދާދި ފަހުން ދީފައިވާ އިންޓަވިއުއްގައި ރޮނާލްޑޯ ވަނީ އަންނަ އަހަރުގެ ޗެމްޕިއަންސް ލީގުން ޔުނައިޓެޑަށް ޖާގަ ނުލިބިއްޖެނަމަ އެ ކުލަބުން އޭނާ ނުފެނިދާނެ ކަމުގެ އިޝާރާތެއް ދީފަ އެވެ. މި ވަގުތު ލީގު ތާވަލްގައި ޔުނައިޓެޑް އޮތީ ހަތް ވަނައިގަ އެވެ. ޖުމްލަކޮށް މެޗުތަކުގައި ޔުނައިޓެޑުން ދައްކާ ކުޅުމަށް ބަލާއިރު ވެސް މާ ބޮޑު ކުރިއެރުމެއް ނުފެންނާތީ ރޮނާލްޑޯ އަންނަ ސީޒަންގައި ޔުނައިޓެޑުން ނުފެނުން ގާތެވެ.
ރަންގްނިކް، ޔުނައިޓެޑަށް ގެންނަން ބޭނުންވަނީ ކޮންކަހަލަ ބަދަލެއް؟
ރަންގްނިކް، ޔުނައިޓެޑަށް ގެންނަން ބޭނުންވާ މައިގަނޑު ބަދަލުތައް އަންނާނީ މި ސީޒަން ނިމުމާއެކުގަ އެވެ. އެއީ ޔުނައިޓެޑަށް ދާއިމީ ކޯޗެއް ހަމަޖެއްސުމާ ކޮންސަލްޓަންޓެއްގެ ރޯލުގައި ހުރެ، ޔުނައިޓެޑް ދޫކޮށްލަން ބޭނުންވާ ކުޅުންތެރިންނަށް އު ފުރުސަތުދީ އާ ކުޅުންތެރިން ޔުނައިޓެޑަށް ހޯދައިދީގެންނެވެ.
ޔުނައިޓެޑްގެ ސްކޮޑަށް ބަލާއިރު މިޑްފިލްޑަރު ޕައުލް ޕޮގްބާ އާއި އެންތަނީ މާޝިއާލް މިހާރު ވެސް ތިބީ ކުލަބު ދޫކޮށްލަން ތައްޔާރުވެގެންނެވެ. ޕޮގްބާގެ ކޮންޓްރެކްޓް މި ސީޒަނުގެ ނިޔަލަށް ހަަމަވާނެ އެވެ. ޔުނައިޓެޑުން ބޮޑު މުސާރަ ކޮންޓްރެކްޓެއް ދިން ނަމަވެސް ޕޮގްބާ ދެން އެ ޓީމުން ނުފެނިދާނެ އެވެ.
ރަންގްނިކް ބުނީ މި ސީޒަނަށް ފަހު ކުލަބު ދޫކޮށްލިޔަސް އެންމެ ފަހު ވަގުތާ ހަމައަށް ޕޮގްބާ އަށް ޓީމުން ފުރުސަތު އޮންނާނެ ކަމަށެވެ. އަނިޔާއިން ރަނގަޅުވެ ދާދި ފަހުން ޕްރެކްޓިހުގައި ބައިވެރިވާން ފެށި ޕޮގްބާ އެންމެ އަވަހަށް ވެސް މެޗެއްގައި ކުޅެވޭނެ ކަމަށް ބެލެވެނީ އަންނަ މަހުގެ ފަސް ވަނަ ދުވަހު މިޑްލްސްބްރާއާ ދެކޮޅަށް ކުޅޭ މެޗުގަ އެވެ.
ކޮންމެ ގޮތެއް ވިޔަސް ޔުނައިޓެޑްގެ ހާލަތާ މެދު އެއްޗެއް ބުނަން އަދި މާ އަވަސް ކަމަށް ގިނަ ބަޔަކު ގަބޫލުކުރެ އެވެ. ޔަގީންވާ އެއް ކަމަކީ މި ސީޒަން ނިމުމާ އެކު ޓީމުން ބޮޑެތި ބަދަލުތަކެއް ފެނުމެވެ. އަދި ރަންގްނިކްގެ ކޯޗުކަމުގެ ދަށުން އެޓީމަށް ޗެމްޕިއަންސް ލީގުން ފުރުސަތު ނުލިބިއްޖެނަމަ އޭނާ ބޭނުން ވިޔަސް ކޯޗުގެ ރޯލުގައި ދެމިނުހުރެވުމެވެ.
