ލަންޑަން ( 11 ޑިސެމްބަރު) - މެންޗެސްޓާ ޔުނައިޓެޑްގެ ފްރާންސްގެ ފޯވަޑް އެންތަނީ މާޝިއާލް ބޭނުންވަނީ އެ ޓީމު ދޫކޮށް، އެހެން ކްލަބަކަށް ބަދަލުވާން ކަމަށް އޭނާގެ އޭޖެންޓް ބުނެފައިވަނިކޮށް، ޔުނައިޓެޑުން އެ ޓީމުގެ ފްރާންސް ތަރި ޕައުލް ޕޮގްބާ ގަދަކަމުން ކްލަބްގައި މަޑުނުކުރުވާނެ ކަމަށް ބުނެފި އެވެ.
މި ސީޒަންގެ އިނގިރޭސި ޕްރިމިއާ ލީގުގައި ޔުނައިޓަޑްގެ ފުރަތަމަ 11 އިން މާޝިއާލް އަށް ފުރުސަތު ލިބުނީ އެންމެ ދެ މެޗުގަ އެވެ. ޔުނައިޓަޑްގެ ކޯޗުކަމާ ރަލްފް ރަންގްނިކް ހަވާލުވި ފަހުން ކުޅުނު މެޗެއްގައި މާޝިއާލް އަދި ނުފެނެ އެވެ.
ރަންގްނިކް ކުރިން ބުނީ މާޝިއާލް ،26، ޓީމުގައި ނެތީ އޭނާ އަށް ޓްރެއިނިންގައި ލިބުނު އަނިޔާއެއްގެ ސަބަބުން ކަމަށެވެ.
ސްކައި ސްޕޯޓްސްއާ ވާހަކަދައްކަމުން މާޝިއާލްގެ އޭޖެންޓް ފިލީޕް ލަމްބޯލޭ ބުނީ ޔުނައިޓަޑްގައި މާޝިއާލް އަށް ކުޅުމުގެ ފުރުސަތެއް ނުލިބޭ ކަމަށާއި އޭނާ ބޭނުންވަނީ ޖެނުއަރީގެ ޓްރާންސްފާގައި އެހެން ޓީމަކަށް ބަދަލުވާން ކަމަށެވެ.
"މާޝިއާލް ހަމައެކަނި ބޭނުންވަނީ ކުޅުމުގެ ފުރުސަތު ލިބުން. އެހެންވެ އޭނާ ބޭނުމެއް ނުވޭ ޖެނުއަރީ (ޓްރާންސްފާގައި) ޔުނައިޓަޑްގައި މަޑުކުރާކަށް. އަހަރެން ވަރަށް އަވަހަށް ކްލަބާ ވާހަކަ ދައްކާނަން،" ލަމްބޯލޭ ބުންޏެވެ.
އިނގިޜޭސި ޕްރިމިއާ ލީގުގައި މިރޭ ނޯވިޗްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޔުނައިޓަޑްގެ ކޯޗު ރަންގްނިކް ބުނީ ކުޅުމުގެ ފުރުސަތު ނުލިބޭ ކުޅުންތެރިން ލޯނަކަށް ވިޔަސް ދޫކޮށްލުމަކީ އެ ކުޅުންތެރިޔާ އަށް އެންމެ ރަނގަޅު ގޮތަށް ވެދާނެ ކަމަށެވެ.
"އަހަރަމެން އެބަ ޔަގީންކުރަންޖެހޭ މިހާރު ސްކޮޑުގައި ތިބީ މި ކްލަބުގައި މަޑުކުރަން ބޭނުންވާ ކުޅުންތެރިންކަން. ކުޅުންތެރިއަކަށް ކުޅުމުގެ ފުރުސަތު ނުލިބެންޏާ، އެންމެ ރަނގަޅު ގޮތަކީ ވަކިވަކިން ވާހަކަދެއްކުން. އެ ކުޅުންތެރިން ލޯނެއްގެ ގޮތުގައި ދޫކޮށްލުމަކީ ވެސް ހައްލަކަށް ވެދާނެ،" ރަންގްނިކް ބުންޏެވެ.
ފްރާންސްގެ މޮނާކޯ އިން 2015 ވަނަ އަހަރު މާޝިއާލް ޔުނައިޓަޑަށް ބަދަލުވީ 36 މިލިއަން ޕައުންޑްގެ ޓްރާންސްފާ ފީއެއްގަ އެވެ. މިހާތަނަށް ޔުނައިޓަޑަށް ކުޅުނު 174 މެޗުގައި އޭނާ ވަނީ 56 ލަނޑު ޖަހައިފަ އެވެ.
ހޯސޭ މޮރީނިއޯގެ ކޯޗުކަމުގައި ޔުނައިޓެޑުން ދުނިޔޭގެ ރެކޯޑް ފީ އަކަށް އުމުރުން 28 އަހަރުގެ ޕޮގްބާ ގެނައީ 2016 ވަނަ އަހަރު އެވެ. އަންނަ އަހަރުގެ ޖޫން މަހު ޕޮގްބާގެ އެއްބަސްވުން ހަމަވާއިރު، މިހާތަނަށް ޔުނައިޓެޑުން ހުށަހެޅި އާ ކޮންޓްރެކްޓަށް ޕޮގްބާގެ ފަރާތުން އެކަށީގެންވާ އެއްބާރުލުމެއް ނުލިބި އޮތް އެންމެ ބޮޑު ސަބަބަކީ ޕޮގްބާ ބޭނުންވާ ވަރުގެ މުސާރައެއް ދޭން ޔުނައިޓެޑުން ދެކޮޅު ހެދުމެވެ.
ރަންގްނިކް ބުނީ ޕޮގްބާ ޔުނައިޓެޑްގައި ބަހައްޓަން ބޭނުންވިޔަސް އޭނާ ބޭނުންނުވާ ނަމަ އެކަން ނުކުރާނެ ކަމަށެވެ. ޔުނައިޓެޑް ފަދަ ބޮޑު ޓީމަކަށް ކުޅެން ބޭނުންނުވާ ކުޅުންތެރިއެއްގެ ވިސްނުން ބަދަލުކޮށްގެން އެކަން ކުރުވަން ބޭނުންނުވާ ކަމަށް ރަންްގްނިކް ވަނީ ބުނެފަ އެވެ.
"ހިނގާ އޭނަ (ޕޮގްބާ) އަނިޔާއިން ރަނގަޅުވެ ފިޓްވެގެން އެނބުރި ޓީމަށް އައީމަ ދެން ވާ ގޮތެއް ބަލަމާ،" ޕޮގްބާއާ ބެހޭގޮތުން ރަންގްނިކް ބުންޏެވެ. -- ބީބީސީ
