މި ވެރިކަމުގައި ވޭތުވެދިޔަ ހަތަރު މަހު ފެނިގެން ދިޔައީ، ރައީސް ޑރ. މުހައްމަދު މުއިއްޒުގެ ސިޔާސީ ތަޖުރިބާ މަދުކަން ކަން ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.
އަދަދު ނޫހުން ރޯދަ މަހު ގެނެސްދޭ 'ކުޅިކޮށް' ޕްރޮގްރާމުގެ ރޭގެ އެޕިސޯޑުގައި އަސްލަމް ވިދާޅުވީ ރައީސް މުއިއްޒުގެ ސިޔާސީ ތަޖުރިބާ ތަންކޮޅެއް މަދުވުމުން, ބައެއް ކަންކަން ކުރައްވަންޖެހޭ ގޮތް ނޫން އެހެން ގޮތްގޮތަށް ކުރެއްވޭ މަންޒަރު ފެނިވަޑައިގަންނަވާ ކަމަށެވެ.
"އަޅުގަނޑަށް ސިފަ ކުރެވެނީ ސިޔާސީ ތަޖުރިބާ ރައީސް މުއިއްޒުގެ ތަންކޮޅެއް މަދުކަމަށް. އެ ތަޖުރިބާ ދެން ލިބެން ފަށާނެ. ލިބެން ފެށީމަ މިއަށްވުރެ ރަނގަޅު ވެދާނެ ކަމަށް އަޅުގަނޑު އުއްމީދު ކުރަނީ. އެހެން ނަމަވެސް ސިޔާސީ ތަޖުރިބާ ތަންކޮޅެއް މަދުވީމަ ބައެއް ކަންކަން އަސްލުގައި ކުރަން ވާގޮތް ނޫން ގޮތްގޮތަށް އެބަ ކުރެވޭ," މެދުނުކެނޑި 20 އަހަރު ރައްޔިތުންގެ މަޖިލީހުގެ މެމްބަރުކަން ކުރެއްވި އަސްލަމް ވިދާޅުވި އެވެ.
ސިޔާސީ ތަޖުރިބާ މަދުވުމުން ގޯސްކޮށް ކުރެއްވިފައިވާ ކަންކަމުގެ ތެރެއިން މިސާލެއްގެ ގޮތުގައި އަސްލަމް ފާހަގަ ކުރެއްވީ ވެރިކަން ކުރާ ޕީއެންސީގެ ފަރާތުން ކުރިއަށް އޮތް ރައްޔިތުންގެ މަޖިލީހުގައި ވާދަކުރާ ބައެއް ކެންޑިޑޭޓުންނަށް ޓިކެޓި ދިނުމާއި, ޓިކެޓު އަތުލުން އަދި ޓިކެޓި ދީފައި ހުންނަ ކެންޑިޑޭޓު ނޫން އެހެން ކެންޑިޑޭޓަކަށް ރައީސް މުއިއްޒު ތާއިދު ކުރެއްވުމެވެ.
"މިސާލަކަށް ޕާޓީގެ ތެރޭގައި ވެސް ކަންކަން ހިނގަމުންދާ ގޮތާއި, ޓިކެޓު ދެވިފައި, ޓިކެޓު އަތުލާފައި, އަދި ޓިކެޓު ދެވިފައި ހުންނަ މީހާ ނޫން މީހާއަށް ތާއިދު ކުރުމާ. މިކަހަލަ ބައިވަރު ކަންކަން," އަސްލަމް ވިދާޅުވި އެވެ.
ބައެއް މުއައްސަސާތަކަށް މީހުން އައްޔަނު ކުރައްވަމުން ގެންދަވަނީ ވެސް ގައުމަށް އެންމެ ފައިދާ ހުރި ގޮތަށް ނޫން ކަމަށް ވެސް އަސްލަމް ވިދާޅުވި އެވެ.
ކުރީގެ ރައީސް އަބްދުﷲ ޔާމީން މިނިވަން ކުރުމުގެ ވައުދާއެކު ވެރިކަމަށް ވަޑައިގެން ފުރަތަމަ ދުވަހުން ފެށިގެން، ޔާމީނާ ގުޅުން ކަނޑައިލި އެވެ. މުއިއްޒަށް ސިޔާސީ ގޮތުން އެންމެ ބޮޑު ޕްރެޝަރަކަށް ވެގެން ދިޔައީ، ޕާޓީގެ އެތެރޭގައި އުފެދުނު ހިޔާލުތަފާތުވުން އެއްގޮތް ނުކުރެވި، ޔާމީން ވެސް ދުރުވެ އެހެން ޕާޓީއެއް އުފައްދަން މަސައްކަތް ކުރުމެވެ.
އެ މައްސަލަ ހައްލު ނުކުރެވި އެންމެ ފަހުން، ރައީސް މުއިއްޒު ވަނީ، ޔާމީން މަސައްކަތް ކުރެއްވީ "ހިޔަޅު" ވިސްނުމުގައި ކަމަށް ބުނެފައިވާ ޕޯސްޓެއް ރިޕޯސްޓު ވެސް ކުރެއްވި އެވެ. ނަމަވެސް، ރިޕޯސްޓު ފަހުން އަންޑޫ ކުރެއްވި އެވެ.
ރައީސް މުއިއްޒުގެ ސިޔާސީ ހަޔާތް ފެއްޓެވީ 2005 ވަނަ އަހަރު އަދާލަތު ޕާޓީންނެވެ. އެ ޕާޓީގައި އިދާރީ މުވައްޒަފަކަށް އުޅުއްވަމުން ގެންދަވަނިކޮށް، ރައީސް ޑރ. މުހައްމަދު ވަހީދު ހަސަން މަނިކު ސަރުކާރުގެ ހައުސިން މިނިސްޓަރުގެ މަގާމު ލިބިވަޑައިގަތެވެ. އެއަށްފަހު ރައީސް އަބްދުﷲ ޔާމީންގެ ވެރިކަމުގައި އެމްޑީއޭގެ މެމްބަރެއްގެ ގޮތުގައި ހުންނަވައިގެން ހައުސިން މިނިސްޓަރުކަން އަދާކުރެއްވި އެވެ. ނަމަވެސް ވެރިކަމުގެ ދައުރު ނިމުގެ ކުރިން އެމްޑީއޭއިން ވަކިވެ ޕީޕީއެމްއާ ގުޅިވަޑައިގަތެވެ.
ޖުމްލަ ހަތް އަހަރު ހައުސިން މިނިސްޓަރުކަން ކުރެއްވުމަށްފަހު, ދެން އެމަނިކުފާނު ވަޑައިގެންނެވީ 2021ގައި މާލެ ސިޓީގެ މޭޔަރު ކަމަށެވެ. މޭޔަރު ކަމުގައި ދެ އަހަރު ހުންނެވުމަށްފަހު ނިމިދިޔަ ރިޔާސީ އިންތިހާބާ ދިމާކޮށް, ޕީއެންސީއަށް ބަދަލުވެ ވަޑައިގެން, މިހާރު ރާއްޖޭގެ ވެރިކަން ކުރައްވަމުން ގެންދަވަނީ ޕީއެންސީގެ ވެސް ރައީސްގެ މަގާމުގައި ހުންނަވައިގެންނެވެ.
